മഞ്ഞ് പുതുച്ചുകിടക്കുന്ന പര്വ്വതനിരകളും താഴ്വരകളും എന്നും കൗതുകമുണര്ത്തുന്ന കാഴ്ചയാണ്. അതുകൊണ്ട് തന്നെ മഞ്ഞുമൂടിയ ഇടങ്ങള് ആസ്വദിക്കാന് ഇഷ്ടമില്ലാത്തതായി ആരും തന്നെ ഉണ്ടാകില്ല. മഴയും വേനലും മാത്രം കണ്ട് ജീവിച്ചിട്ടുള്ള ആളുകള്ക്ക് മഞ്ഞുമൂടി സ്ഥലങ്ങളിലേക്ക് എത്താന് അതിയായ ആഗ്രഹം ഉണ്ട്. ഇപ്പോഴിതാ ഒരു സ്കൂളിലെ ഭിന്നശേഷിക്കാരായ കുട്ടികള്ക്ക് അവരുടെ ആഗ്രഹംപോലെ മഞ്ഞ് സമ്മാനമായി നല്കിയിരിക്കുകയാണ് ഒരു ചൈനീസ് കമ്പനി. മഞ്ഞില് കളിക്കണമെന്ന ഭിന്നശേഷിക്കാരായ ഏതാനും കുട്ടികളുടെ ആഗ്രഹം സാധ്യമാക്കുന്നതിനായി 23 ലക്ഷത്തിലധികം രൂപയാണ് ഈ കമ്പനി ചെലവഴിച്ചത്. കമ്പനിയുടെ കാരുണ്യ പ്രവര്ത്തിയെ അഭിനന്ദിച്ച് നിരവധി സോഷ്യല് മീഡിയ ഉപഭോക്താക്കാളാണ് രംഗത്തെത്തിയിരിക്കുന്നത്.
വടക്കന് ചൈനയിലെ വാണിജ്യ വാഹനങ്ങള്ക്കായുള്ള ട്രക്ക് സര്വീസ് പ്ലാറ്റ്ഫോമായ ബീജിംഗ് ട്രക്ക് ഹോം ഇന്ഫര്മേഷന് ടെക്നോളജിയാണ് ഇത്തരത്തിലൊരു അമ്പരപ്പിക്കുന്ന സമ്മാനം കുട്ടികള്ക്കായി ഒരുക്കിയത്. ഗ്വാങ്ഷോ സിംഗ്സി ചെങ്ഷാങ് സ്കൂളിലെ കുട്ടികള്ക്കായി മൂന്ന് ട്രക്ക് നിറയെ മഞ്ഞാണ് കമ്പനി ഇവരുടെ സ്കൂളില് എത്തിച്ചു നല്കിയത്. വടക്കുകിഴക്കന് ചൈനയിലെ ഹീലോംഗ്ജിയാങ് പ്രവിശ്യയിലെ ഹാര്ബിന് നഗരത്തില് നിന്ന് 80 ക്യുബിക് മീറ്റര് മഞ്ഞാണ് കുട്ടികള്ക്ക് സമ്മാനമായി സ്കൂളില്ഡ എത്തിച്ചത്. 3,300 കിലോമീറ്റര് ദൂരം സഞ്ചരിച്ച് നാല് ദിവസം കൊണ്ടാണ് ഈ മഞ്ഞ് സ്കൂളില് എത്തിച്ചത്. ഓട്ടിസം പോലുള്ള അവസ്ഥകളുള്ള തങ്ങളുടെ കുട്ടികളില് പലര്ക്കും ഹാര്ബിനിലേക്ക് യാത്ര ചെയ്യാന് കഴിയില്ലെന്നും എന്നാല് അവരുടെ ആഗ്രഹം മനസ്സിലാക്കി ഇത്തരത്തിലൊരു സമ്മാനം ഒരുക്കിയ കമ്പനിയോട് ഒരു പാട് നന്ദിയുണ്ടെന്നും സ്കൂള് അധികൃതര് പറഞ്ഞു.
ഇതിനോടകം തന്നെ കമ്പനി ജീവനക്കാര് ട്രക്കുകളില് മഞ്ഞു ശേഖരിക്കുന്നതിന്റെയും സ്കൂളിലേക്ക് എത്തിക്കുന്നതിന്റെയും വീഡിയോ ക്ലിപ്പുകള് ഇപ്പോള് ചൈനീസ് മീഡിയകളില് വൈറലായിക്കഴിഞ്ഞു. നിരവധി പേരാണ് കമ്പനിയുടെ ഈ മഹത്തായ പ്രവര്ത്തിക്ക് അഭിനന്ദനം അറിയിച്ചത്. ദീര്ഘദൂര യാത്രകള്ക്കായുള്ള തങ്ങളുടെ പുതിയ മോഡല് കോള്ഡ് ചെയിന് ട്രക്കുകള് പരീക്ഷിക്കാന് നടപ്പിലാക്കിയ പദ്ധതിയുടെ ഭാഗമായിട്ടാണ് കമ്പനി ഇത്തരത്തിലൊരു ആശയം നടപ്പിലാക്കിയതെന്നാണ് സൗത്ത് ചൈന മോണിംഗ് പോസ്റ്റ് റിപ്പോര്ട്ട് ചെയ്യുന്നത്.
