മുത്തലാഖ് ചൊല്ലി ഉപേക്ഷിക്കപ്പെട്ട യുവതി മതം മാറി ഇന്സ്റ്റാഗ്രാമിലൂടെ പരിചയപ്പെട്ട ഹിന്ദു കാമുകനെ വിവാഹം കഴിച്ചു. ബീഹാറിലെ പൂര്ണിയയില് താമസിക്കുന്ന നസീമ ഖാട്ടൂണ് എന്നു പേരുള്ള യുവതിയാണ് ഭര്ത്താവിനാല് ഉപേക്ഷിക്കപ്പെടുകയും പിന്നീട് മതം മാറി ഹിന്ദുയുവാവുമായി വിവാഹം കഴിക്കുകയും ചെയ്തത്. വിവാഹമോചനത്തെത്തുടര്ന്ന്, ഹലാല സമ്പ്രദായത്തിന് വിധേയമാക്കാന് ഭര്ത്താവില് നിന്നും അമ്മായിയമ്മമാരില് നിന്നുള്ള സമ്മര്ദ്ദവും യുവതി നേരിട്ടിരുന്നു. ഇവര്ക്ക് മുന് വിവാഹത്തില് ഒന്നര വയസ്സുള്ള ഒരു മകളുണ്ട്.
ഉത്തര്പ്രദേശിലെ ബറേലി സ്വദേശിയായ മഹേഷ്ശര്മ്മയുമായി സോഷ്യല് മീഡിയ പ്ലാറ്റ്ഫോമായ ഇന്സ്റ്റാഗ്രാമിലൂടെയാണ് നസീമ പരിചയപ്പെട്ടത്. പിന്നീട് ഇരുവരും സൗഹൃദം പങ്കുവെയ്ക്കുകയും പിന്നീട് പ്രണയമായി മാറുകയുമായിരുന്നു. തുടര്ന്ന് ഫെബ്രുവരി 16 ന് ബറേലിയിലെ ക്ഷേത്രത്തില് ഹിന്ദു ആചാരപ്രകാരം വിവാഹിതരാകുകയും ചെയ്തു. മഹേഷിനെ വിവാഹം ചെയ്തതിന് ശേഷം മതംമാറിയ നസീമ ഖാട്ടൂണ് മീനാക്ഷി ശര്മ്മ എന്ന പേര് സ്വീകരിച്ചു. ആറ് മാസം മുമ്പാണ് ആദ്യ ഭര്ത്താവ് മുത്തലാഖ് ചൊല്ലിയതെന്ന് നസീമ പറഞ്ഞു.
2024 ജനുവരി 10-ന് യുവതി മതം മാറാനുള്ള ആഗ്രഹം പ്രകടിപ്പിച്ച് ജില്ലാ മജിസ്ട്രേറ്റിന് ഒരു അപേക്ഷ സമര്പ്പിച്ചിരുന്നു. വിവാഹമോചിതയായ 20 വയസുള്ള തനിക്ക് ഗുണകരമോ ദോഷകരമോ എന്താണെന്ന് വിവേചിച്ചറിയാന് തനിക്ക് പൂര്ണ ശേഷിയുണ്ടെന്നും തന്റെ അപേക്ഷ പരിഗണിക്കണമെന്നും ഇവര് ആവശ്യപ്പെട്ടിരുന്നു. തന്റെ പൂര്വ്വികര് ഇസ്ളാമതം സ്വീകരിച്ചവരാണെന്നും മുമ്പ് ഹിന്ദുമത വിശ്വാസികള് ആയിരുന്നെന്നും അതിനാല് തനിക്ക് മതം മാറാന് താല്പ്പര്യമുണ്ടെന്നും അനുവദിക്കണമെന്നുമായിരുന്നു അപേക്ഷ.
വിവാഹശേഷം സംരക്ഷണം ആവശ്യപ്പെട്ട് അവര് ബറേലി എസ്എസ്പിക്ക് കത്തെഴുതിയിട്ടുണ്ട്. ആഗ്രയില് വച്ചാണ് ആദ്യം വിവാഹിതയായത്. ആ വിവാഹത്തില് ഒരു മകളുമുണ്ട്. വീട്ടിലെ ചെറിയ പ്രശ്നങ്ങളുടെ പേരില് ആറ് മാസം മുമ്പ് ഭര്ത്താവ് മുത്തലാഖ് ചൊല്ലി. മുത്തലാഖിന് ശേഷം ഹലാല സമ്പ്രദായത്തിന് വിധേയയാകാന് അവള് നിര്ബന്ധിതയായെന്നും എന്നാല് ഹലാലയ്ക്ക് തയ്യാറാകാത്തതിനാല് വീട്ടില് നിന്നും പുറത്താക്കിയെന്നും ഈ സമയത്ത് മഹേഷ് ശര്മ്മയുമായി ഇന്സ്റ്റാഗ്രാമില് ബന്ധപ്പെട്ടതെന്നും ഇവര് പറഞ്ഞു.
