കൊല്ലം: പൂക്കോട് വെറ്റിനറി സര്വകലാശാലയില് വിദ്യാര്ത്ഥി ആത്മഹത്യ ചെയ്തതുമായി ബന്ധപ്പെട്ട കേസിലെ മുഖ്യപ്രതി സിഞ്ജോ ജോണ്സണ് അറസ്റ്റിലായി. ഇന്ന് രാവിലെ കൊല്ലം കരുനാഗപ്പള്ളിയിലെ ബന്ധുവീട്ടില് നിന്നുമാണ് പോലീസ് സിഞേ്ജായെ അറസ്റ്റ് ചെയ്ത്. ഇയാള്ക്കൊപ്പം കാശിനാഥന് എന്ന മറ്റൊരാള് കൂടി പോലീസില് കീഴടങ്ങി. ഓടാനവട്ടം സ്വദേശിയായ സിഞ്ജോ കരുനാഗപ്പള്ളിയില് ഉണ്ടെന്ന് മനസ്സിലാക്കിയ പോലീസ് ലോക്കല് പോലീസിനെ പോലും അറിയിക്കാതെ ഇന്ന് പുലര്ച്ചെ വീട്ടിലെത്തി സിഞ്ജോയെ കൊണ്ടുപോകുകയായിരുന്നു.
സിഞ്ജോയും കാശിനാഥനും ഉള്പ്പെടെ നാലു പേര്ക്കായി പോലീസ് ലുക്കൗട്ട് നോട്ടീസ് പുറപ്പെടുവിച്ചിരുന്നു. അതിനിടയിലാണ് സിഞ്ജോ അറസ്റ്റിലായത്. കേസില് സിദ്ധാര്ത്ഥനെ ഏറ്റവും കൂടുതല് തവണ മര്ദ്ദിച്ചവരില് ഒരാളാണ് സിഞ്ജോയെന്നാണ് സിദ്ധാര്ത്ഥന്റെ പിതാവ് നേരത്തേ ആരോപിച്ചത്. ഇയാളാണ് വിവരം പുറത്തുപറയരുതെന്ന് ഹോസ്റ്റലിലുണ്ടായിരുന്ന മറ്റു കുട്ടികളെ ഭീഷണിപ്പെടുത്തുകയും ചെയ്തത്. സിഞ്ജോ ഒളിവില് പോയതിന് പിന്നാലെ ഇയാളുടെ ബന്ധുവീടുകള് കേന്ദ്രീകരിച്ച് പോലീസ് രഹസ്യമായി അന്വേഷിച്ചു വരികയായിരുന്നു. കൊല്ലത്തും ഏതാനും ദിവസമായി തെരച്ചിലിലായിരുന്നു.
അതീവരഹസ്യമായിട്ടായിരുന്നു പോലീസിന്റെ നീക്കം. നാലുപേരില് രണ്ടുപേര് ഇപ്പോള് തന്നെ പോലീസിന്റെ കസ്റ്റഡിയില് ഉണ്ടെന്നാണ് വിവരം. ഇനി പിടിയിലാകാന് അഞ്ചുപേര്കൂടിയാണ് ബാക്കിയുള്ളത്. പോലീസ് 18 പേരെയാണ് പ്രതിപട്ടികയില് ചേര്ത്തിരിക്കുന്നത്. മരണം നടന്ന 13 ദിവസങ്ങള്ക്ക് ശേഷമാണ് പ്രതികള് അറസ്റ്റിലാകുന്നത്. കഴിഞ്ഞ 18 നായിരുന്നു സിദ്ധാര്ത്ഥിനെ മരണമടഞ്ഞതായി കണ്ടെത്തിയത്. കോളേജ് ഹോസ്റ്റലും പരിസരപ്രദേശങ്ങളുമടക്കം നാലിടങ്ങളില് വെച്ചായിരുന്നു എസ്എഫ്ഐ പ്രവര്ത്തകര് സിദ്ധാര്ത്ഥിനെ മര്ദ്ദിച്ചത്.
