തിരുവനന്തപുരം: സംസ്ഥാനത്തെ പോലീസ് സ്റ്റേഷനുകളുടെ സ്റ്റേഷൻ ഹൗസ് ഓഫീസർ (SHO) ചുമതല വീണ്ടും എസ്.ഐമാർക്ക് നൽകാനുള്ള തീരുമാനം ഓഗസ്റ്റ് 15 മുതൽ നടപ്പാക്കും. സംസ്ഥാന പോലീസ് മേധാവിയുടെ ശുപാർശ സർക്കാർ തത്വത്തിൽ അംഗീകരിച്ചതോടെയാണ് നടപടി.
ആകെ 64 പോലീസ് സ്റ്റേഷനുകൾ ഒഴികെ മറ്റ് സ്റ്റേഷനുകളിലായിരിക്കും എസ്.ഐമാരെ SHOമാരായി നിയമിക്കുക. ഈ 64 സ്റ്റേഷനുകളിൽ നിലവിലുള്ളതുപോലെ സി.ഐമാർ തന്നെയാകും സ്റ്റേഷൻ ഹൗസ് ഓഫീസർമാർ. കൂടാതെ, മൂന്നോ നാലോ സ്റ്റേഷനുകളുടെ മേൽനോട്ട ചുമതലയും സി.ഐമാർക്ക് നൽകും.
പുതിയ സംവിധാനം നടപ്പാക്കുന്നതിന് മുമ്പ് ജില്ലാതലത്തിൽ ഉദ്യോഗസ്ഥർക്കുള്ള പരിശീലനം പൂർത്തിയാക്കുമെന്ന് മന്ത്രി രമേശ് ചെന്നിത്തല അറിയിച്ചു.
ഓഗസ്റ്റ് 15നകം എല്ലാ പോലീസ് സ്റ്റേഷനുകളും ശുചീകരിക്കുമെന്നും ഒരേ മാതൃകയിൽ പെയിന്റ് ചെയ്യാൻ നിർദേശം നൽകിയിട്ടുണ്ടെന്നും മന്ത്രി വ്യക്തമാക്കി.
പോലീസിനെതിരായ പരാതികൾ വേഗത്തിൽ പരിഹരിക്കുന്നതിന് പുതിയ പരാതി പരിഹാര സംവിധാനവും ഉടൻ നടപ്പാക്കുമെന്നും അദ്ദേഹം അറിയിച്ചു.
