പ്രണയ ബന്ധങ്ങള് നിലനില്ക്കാന് എന്തും ചെയ്യാന് മടിയില്ലാത്തവരാണ് ഇന്നത്തെ തലമുറ. കാമുകന് അല്ലെങ്കില് കാമുകിയ്ക്കായി ഇത്തരത്തില് പല പ്രവണതകളും കാണിക്കുന്ന ആളുകളെകുറിച്ച് മുന്പും നാം കേട്ടറിഞ്ഞിട്ടുണ്ട്. എന്നാല് ഇതില് നിന്നെല്ലാം ഏറെ വിചിത്രമായ ഒരു വാര്ത്തയാണ് കഴിഞ്ഞ ദിവസം സോഷ്യല് മീഡിയയിലൂടെ പുറത്തുവന്നത്.
സംഭവം ഇങ്ങനെയായിരുന്നു. പെട്രോള് പമ്പില് വച്ച് ഒരാളില് നിന്നും അഞ്ച് ലക്ഷം രൂപ തട്ടിയെടുത്തതിന് മുഖ്യപ്രതി ഉള്പ്പെടെ മൂന്ന് പേരെ മധ്യപ്രദേശില് കഴിഞ്ഞ ദിവസം അറസ്റ്റ് ചെയ്തു. ക്രൈംബ്രാഞ്ചിന്റെയും ഛോട്ടി ഗ്വാള്ട്ടോളി പോലീസിന്റെയും സംയുക്ത സംഘമാണ് മൂന്നുപേരെയും പിടികൂടിയത്. എന്നാല്, മോഷ്ടിക്കാനുണ്ടായ കാരണമാണ് പോലീസുകാരെ അമ്പരപ്പിച്ചിരിക്കുന്നത്.
പിടിയിലായ പ്രതികളില് ഒരാള് പറഞ്ഞത് തങ്ങളുടെ കൂട്ടുകാരന് ഒരു കാമുകിയുണ്ട്. അവള്ക്ക് വില കൂടിയ സമ്മാനങ്ങള് വേണം. അതിനുള്ള കാശ് അവന്റെ കയ്യിലുണ്ടായിരുന്നില്ല. അതുകൊണ്ടാണ് തങ്ങള് കൊള്ളയടിച്ചത് എന്നാണ്. ഈ പറഞ്ഞ കാമുകിയുള്ള കൂട്ടുകാരനാണ് അറസ്റ്റ് ചെയ്യപ്പെട്ടവരില് ഒരാള്. പെട്രോള് പമ്പില് വച്ച് ദീപക് എന്നൊരു പ്രോപ്പര്ട്ടി ബ്രോക്കറുടെ പണമാണ് മൂവരും ചേര്ന്ന് കൊള്ളയടിച്ചത്. മുഖ്യപ്രതിക്ക് ദീപക്കിനെ നേരത്തെ തന്നെ അറിയാമായിരുന്നു. പ്രതികളില് നിന്ന് രണ്ടര ലക്ഷം രൂപയും കുറ്റകൃത്യത്തിന് ഉപയോഗിച്ച ബൈക്കും പോലീസ് പിടിച്ചെടുത്തു.
ഒരാഴ്ച മുമ്പാണ് കേസിനാസ്പദമായ സംഭവം നടന്നത്. ഛോട്ടി ഗ്വാള്ട്ടോളിയിലെ പെട്രോള് പമ്പില് വച്ച് ദീപക്കിന്റെ ജോലിക്കാരനായ സുനില് ശര്മ്മ എന്നയാളില് നിന്നുമാണ് അഞ്ച് ലക്ഷം രൂപ അടങ്ങിയ ബാഗ് ഇവരില് രണ്ടുപേര് ബൈക്കിലെത്തിയ ശേഷം കവര്ന്നത്. ഇന്ധനം നിറയ്ക്കാന് കിബെ കോമ്പൗണ്ടിനടുത്തുള്ള പെട്രോള് പമ്പില് എത്തിയ സമയത്താണത്രെ ഇയാളുടെ പണമടങ്ങിയ ബാഗ് തട്ടിയെടുത്തത്. നവ്ലാഖയിലെ മഹേന്ദ്രന് എന്നൊരാള്ക്ക് നല്കാനുള്ളതായിരുന്നു പണം.
ചിന്തു എന്ന ധീരജ് ബഗ്ബാന്, അമീന് ഷെയ്ഖ്, അജയ് ചൗഹാന് എന്നിവരാണ് സംഭവത്തില് അറസ്റ്റിലായത്. മുഖ്യപ്രതിയായ ധീരജിന് ദീപക്കിനെ നേരത്തെ തന്നെ പരിചയമുണ്ട്. ഇരുവരും കാറില് പോകുന്ന സമയത്ത് ദീപക് ഈ പണത്തിന്റെ കാര്യം ഫോണിലൂടെ സംസാരിക്കുന്നത് ധീരജ് കേട്ടിരുന്നു. പിന്നാലെയാണത്രെ പദ്ധതി ആസൂത്രണം ചെയ്തതും കൂട്ടുകാരെ പണം തട്ടിയെടുക്കാന് ഏല്പ്പിക്കുന്നതും. നിരവധി സിസിടിവി ഫൂട്ടേജുകള് പരിശോധിച്ചും വിശദമായ അന്വേഷണം നടത്തിയുമാണ് പോലീസ് ഇവരെ പിടികൂടിയത്.
