പരീക്ഷകളില് വിദ്യാര്ത്ഥികള് കോപ്പിയടിക്കുന്നത് നിയമ ലംഘനം ആണെങ്കിലും കോപ്പിയടിച്ച് ജയിക്കുന്ന നിരവധി വിദ്യാര്ത്ഥികള് ഓരോ സ്കൂളിലുമുണ്ട്. എങ്കിലും ഒരു പരിധി വരെ മാതാപിതാക്കളും സ്കൂള് അധികൃതരുമടക്കം കുട്ടികളുടെ ഈ പ്രവണതയെ മാറ്റിയെടുക്കാന് ശ്രമിക്കാറുണ്ട്. എന്നാല് കഴിഞ്ഞ ദിവസം ഹരിയാനയില് നിന്ന് പുറത്തുവന്ന ഒരു വീഡിയോയാണ് ഇപ്പോള് നെറ്റീസണ്സിനിടയില് വലിയ ഞെട്ടല് സൃഷ്ടിച്ചിരിക്കുന്നത്. പത്താം ക്ലാസിലെ കുട്ടികളെ പരീക്ഷയ്ക്ക് സഹായിക്കാന് വേണ്ടി സ്കൂളിന്റെ ചുവരില് വലിഞ്ഞു കയറുന്ന ബന്ധുക്കളുടെയും സുഹൃത്തുക്കളുടേയും അമ്പരപ്പിക്കുന്ന ദൃശ്യങ്ങളാണ് ഇത്.
ഹരിയാനയിലെ നുഹ് ജില്ലയിലാണ് ഒരു സ്കൂളില് പത്താം ക്ലാസ് ബോര്ഡ് പരീക്ഷയ്ക്കിടെ വ്യാപകമായ കോപ്പിയടി റിപ്പോര്ട്ട് ചെയ്തിരിക്കുന്നത്. ബോര്ഡ് പരീക്ഷ എഴുതുന്ന കുട്ടികള്ക്ക് ഉത്തരമെഴുതിയ തുണ്ടുപേപ്പറുകള് കൈമാറാനാണ് ഇവര് ചുമരില് വലിഞ്ഞു കയറുന്നത് എന്നാണ് പുറത്തുവരുന്ന റിപ്പോര്ട്ട്. നുഹ് ജില്ലയിലെ തൗരുവിലെ ചന്ദ്രാവതി സ്കൂളിലാണ് ഈ സംഭവം നടന്നിരിക്കുന്നത്. പരീക്ഷ തുടങ്ങി കുറച്ച് നേരം കഴിഞ്ഞപ്പോള് തന്നെ ചോദ്യപ്പേപ്പര് ചോര്ന്നിരുന്നു. അത് കുട്ടികള്ക്കൊപ്പം സ്കൂളിലെത്തിയിരുന്ന മാതാപിതാക്കളുടെയും ബന്ധുക്കളുടെയും വലിയ ബഹളത്തിന് ഇടയാക്കി. അവരും കുട്ടികളെ ഉത്തരം പറഞ്ഞുകൊടുത്ത് സഹായിക്കുന്നതിന് വേണ്ടി സ്കൂളിന്റെ ചുമരില് വലിഞ്ഞു കയറി.
സംഭവം അന്വേഷിച്ച് റിപ്പോര്ട്ട് നല്കാന് ഉദ്യോഗസ്ഥരോട് ഉത്തരവിട്ടതായി ജില്ലാ വിദ്യാഭ്യാസ ഓഫീസര് പരംജീത് ചാഹല് എഎന്ഐയോട് പറഞ്ഞു. 'കുട്ടികളെ പരീക്ഷയ്ക്ക് സഹായിക്കാനായി ചില കുട്ടികളും മറ്റും സ്കൂള് ചുവരില് കയറുന്നതിന്റെ ഒരു വീഡിയോ എന്റെ ശ്രദ്ധയില് പെട്ടിട്ടുണ്ട്. അതേക്കുറിച്ച് അന്വേഷിച്ച് റിപ്പോര്ട്ട് നല്കാന് ആവശ്യപ്പെട്ട് കഴിഞ്ഞു' എന്ന് അദ്ദേഹം പറയുന്നു. സോഷ്യല് മീഡിയയില് വൈറലായ വീഡിയോയില് സ്കൂളിന്റെ പുറത്ത് രക്ഷിതാക്കളും ബന്ധുക്കളും ഒക്കെയായി കുറേപ്പേര് നില്ക്കുന്നത് കാണാം. ഒപ്പം സ്കൂളിന്റെ ചുവരില് വലിഞ്ഞു കയറുന്നവരും ഈ വീഡിയോയില് വ്യക്തമാണ്. സംഭവം വലിയ ചര്ച്ചയ്ക്കാണ് വഴിവച്ചിരിക്കുന്നത്.
भाजपा के शासन में नकल का नज़ारा देखिए!
हरियाणा के नूंह में बोर्ड परीक्षा का ये हाल है, BJP वाले किस मुंह से ढिंढोरा पीटते घूमते हैं! pic.twitter.com/3uRZFEujI0— Govind Singh Dotasra (@GovindDotasra) March 6, 2024
