വിഴിഞ്ഞം: വിഴിഞ്ഞം രാജ്യാന്തര തുറമുഖ നിര്മ്മാണത്തിനു കരിങ്കല്ലുമായി വന്ന ടിപ്പര് ലോറിയില്നിന്നു കല്ല് തലയില് വീണു മെഡിക്കല് വിദ്യാര്ഥിയായ യുവാവിനു ദാരുണാന്ത്യം. വിഴിഞ്ഞം മുക്കോല കാഞ്ഞിരംവിള അനന്തു ഭവനില് ബിന്ദുവിന്റെയും അജികുമാറിന്റെയും മകന് അനന്തു(24) ആണ് മരണമടഞ്ഞത്. ഇന്നലെ രാവിലെ എട്ടിനു മുക്കോല മുള്ളുമുക്ക് ജങ്ഷനു സമീപമായിരുന്നു അപകടം.
അമിതഭാരവുമായി വന്ന ലോറി റോഡിലെ കുഴിയില് വീഴാതിരിക്കാന് വെട്ടിക്കുന്നതിനിടെ തെറിച്ച കരിങ്കല്ല് എതിര്ദിശയില്നിന്നു സ്കൂട്ടറില് വരികയായിരുന്ന അനന്തുവിന്റെ തലയില് പതിക്കുകയായിരുന്നു. തലയിലും മുഖത്തുമായി കല്ല് വീണതോടെ സ്കൂട്ടര് നിയന്ത്രണം വിട്ട് സമീപത്തെ വീടിന്റെ മതിലിലേക്ക് ഇടിച്ചുകയറി. ഗുരുതരമായി പരുക്കേറ്റ അനന്തുവിനെ നെയ്യാറ്റിന്കര നിംസ് ആശുപത്രിയില് പ്രവേശിപ്പിച്ചെങ്കിലും പതിനൊന്നരയോടെ മരണമടഞ്ഞു. നിംസില് നാലാം വര്ഷ ബി.ഡി.എസ്. വിദ്യാര്ഥിയാണ് അനന്തു.
രാവിലെ പതിവുപോലെ വീട്ടില്നിന്നു നിംസിലേക്കു പോകുന്നതിനിടെയാണ് അപകടത്തില്പ്പെട്ടത്. മെഡിക്കല് കോളജില് നടത്തിയ പോസ്റ്റ്മോര്ട്ടത്തിനുശേഷം മോര്ച്ചറിയില് സൂക്ഷിച്ചിരിക്കുന്ന മൃതദേഹം മസ്കറ്റില്നിന്നു പിതാവ് എത്തിയശേഷം ഇന്നു സംസ്കരിക്കും. പാലക്കാട് കല്ലടിക്കോടില് ഫോറന്സിക് സയന്സ് വിദ്യാര്ഥിനിയായ അരുണ ഏക സഹോദരിയാണ്.
അപകടത്തെത്തുടര്ന്നു കോണ്ഗ്രസ്, ബി.ജെ.പി, ഇടതുപക്ഷ പാര്ട്ടി പ്രവര്ത്തകര് തുറമുഖ കവാടമായ മുല്ലൂരില് റോഡ് ഉപരോധിച്ചതോടെ തുറമുഖ നിര്മ്മാണത്തിനു കല്ല് കൊണ്ടുവരുന്നതു താത്കാലികമായി നിര്ത്തിവച്ചു.
