ബ്ലെസിയുടെ സംവിധാനത്തിൽ പൃഥ്വിരാജ് നായകനായി എത്തുന്ന ആടുജീവിതം മാർച്ച് 28ന് തിയറ്ററുകളില് എത്തുകയാണ്. മലയാളികൾ ഒന്നടങ്കം വായിച്ച് തഴമ്പിച്ച ബെന്യാമിന്റെ ആടുജീവിതം സിനിമയാകുമ്പോൾ പ്രേക്ഷകരും ആരാധകരും ആവേശത്തോടെയാണ് കാത്തിരിക്കുന്നത്. അതിന്റെ ഓരോ അപ്പ്ഡേഷനുകളും പ്രേക്ഷകര് ഇരുകൈയും നീട്ടിയാണ് സ്വീകരിക്കുന്നത്. കഴിഞ്ഞ ദിവസമാണ് ആടുജീവിതം, ദി ഗോട്ട് ലൈഫി'ന്റെ ഓഡിയോ ലോഞ്ച് ഇവന്റ് നടന്നത്. ആടുജീവിതത്തിന്റെ സംഗീത സംവിധായകൻ എ ആർ റഹ്മാൻ, മെഗാ സ്റ്റാർ മോഹൻലാൽ എന്നിവർ മുഖ്യാതിഥികളായി എത്തിയ ചടങ്ങിന്റെ വീഡിയോകള് റീലുകളായി സോഷ്യല് മീഡിയയില് ട്രെന്ഡിംഗാകുന്നുണ്ട്.
ഇപ്പോഴിതാ വേദിയില് മോഹന്ലാലിനെയും പൃഥ്വിരാജിനെയും സംവിധായകന് ബ്ലെസിയെയും ഒരുമിച്ച് കിട്ടിയപ്പോള് അവതാരക മീര അനില് ചോദിച്ച മണ്ടന് ചോദ്യമാണ് സോഷ്യല് മീഡിയയില് വൈറലാകുന്നത്. മോഹന്ലാല് നല്കുന്ന തഗ്ഗ് മറുപടിയാണ് ആരാധകര് ഏറ്റെടുക്കുന്നത്.
‘‘എന്തുകൊണ്ടായിരിക്കും നമ്മുടെ ലാലേട്ടനെ നജീബായി പരിഗണിക്കാതിരുന്നത്, ബ്ലെസി സാര് ?’’ എന്നായിരുന്നു മീരയുടെ ചോദ്യം.
‘‘വലിയ കാര്യമാ അത്. ആവശ്യമില്ലാത്ത കാര്യം ചോദിക്കേണ്ട. ഞാന് മര്യാദയ്ക്ക് ജീവിച്ചു പോയ്ക്കോട്ടെ...’’ എന്നായിരുന്നു മോഹന്ലാലിന്റെ മറുപടി. ചോദ്യം ബ്ലെസിയോടായിരുന്നെങ്കിലും അവതാരകയ്ക്ക് വാ അടപ്പിക്കുന്ന മറുപടി നല്കിയ മോഹന്ലാലിന് കൈയടി നല്കുകയാണ് ആരാധകര്. ‘എന്താ ഏഷ്യാനെറ്റെ വേറെ അവതാരകയെ കിട്ടിയില്ലേ...?’ എന്നതടക്കമാണ് വിമര്ശന കമന്റുകള് വീഡിയോയ്ക്ക് താഴെ നിറയുന്നത്.
