തൃശൂര്: അറുപത്തിരണ്ടാം വയസില് വേമ്പനാട്ടുകായല് നീന്തിക്കടന്നു വേള്ഡ് വൈഡ് ബുക്ക് ഓഫ് റെക്കോര്ഡ്സില് ഇടംപിടിക്കാനുള്ള ശ്രമവുമായി ഡോ. കുഞ്ഞമ്മ മാത്യൂസ്. വേമ്പനാട്ടു കായലിന്റെ ഏറ്റവും വീതിയേറിയ ആലപ്പുഴ ജില്ലയിലെ അമ്പലക്കടവ് വടക്കുംകരയില്നിന്ന് ആരംഭിച്ച് കോട്ടയം ജില്ലയിലെ വൈക്കം ബീച്ചിലേക്കു ഏഴു കിലോമീറ്റര് നീന്താനാണ് തീരുമാനം.
നാളെ രാവിലെ എട്ടിനാണ് സാഹസ നീന്തല് ആരംഭിക്കുക. ഇത്രയും ദൂരം നീന്തുന്ന ഏറ്റവം പ്രായംകൂടിയ വനിതയാകാനാണ് ശ്രമം. ചെറുപ്പത്തിലേ നീന്തല് അറിയാമായിരുന്ന കുഞ്ഞമ്മ പിന്നീട് ജോലിയില്നിന്നു വിരമിച്ചപ്പോഴാണ് വ്യായാമത്തിനായി നീന്തല് ആരംഭിച്ചത്. ആഗ്രഹമറിഞ്ഞപ്പോള് കോതമംഗലം ഡോള്ഫിന് അക്വാട്ടികിലെ ബിജു തങ്കപ്പന് പരിശീലനം നല്കാന് തയാറായി.
കുത്തൊഴുക്കുള്ള മുവാറ്റുപുഴയാറില് മൂന്നരമാസത്തോളം പരിശീലനം നടത്തിയാണ് റെക്കോര്ഡ് ഉദ്യമത്തിനൊരുങ്ങിയത്. തൃശൂരിലെ നീന്തല്, ഓട്ടം, സൈക്ലിങ് കൂട്ടായ്മയായ എന്ഡ്യൂറന്സ് അത്ലറ്റ്സ് ഓഫ് തൃശൂര് (ഇ.എ.ടി.) അംഗമാണ് കുഞ്ഞമ്മ.
റിട്ട. എല്.ഐ.സി. ഉദ്യോഗസ്ഥയാണ്. മലഞ്ചരക്ക് വ്യാപാരിയായ അഞ്ചേരി ജവഹര് റോഡ് പുത്തന്പുര ഹൗസില് പി.വി. ആന്റണിയാണ് ഭര്ത്താവ്. ഏക മകള് ഡോ. ജ്യോത്സന ദുബായില് ഭര്ത്താവിനോടൊപ്പമാണ്. പത്രസമ്മേളനത്തില് ഡോ. കുഞ്ഞമ്മ മാത്യൂസ്, മേരി മാത്യൂസ്, വി.എ. രാമകൃഷ്ണന്, പ്രശാന്ത് പണിക്കര്, വിപിന് ബാലകൃഷ്ണന് എന്നിവര് പങ്കെടുത്തു.
