കോഴിക്കോട് : ന്യൂനപക്ഷം രണ്ടാം സ്ഥാനക്കാരാകുമെന്ന് പറയുന്ന കമ്മ്യൂണിസ്റ്റുകള് പാര്ട്ടി ഗ്രാമങ്ങളില് ചെയ്യുന്നത് ഹീന പ്രവര്ത്തികളാണെന്നും തെരഞ്ഞെടുപ്പ് സമയത്ത് മാത്രം മുസ്ലിം സംരക്ഷണം ഏറ്റെടുക്കുന്ന സിപിഎം പാര്ട്ടി ഗ്രാമങ്ങളില് നടത്തുന്നത് മുസ്ലിം വിദ്വേഷ പ്രവര്ത്തനമാണെന്നും സമസ്താ നേതാവ് സമസ്ത കേന്ദ്ര മുശാവറ അംഗം ബഹാഉദ്ദീന് മുഹമ്മദ് നദ്വി.
സിപിഎമ്മിനെ രൂക്ഷമായി വിമര്ശിച്ച അദ്ദേഹം ഫാസിസത്തിന്റെയും കമ്മ്യൂണിസത്തിന്റെയും മേല്ക്കോയ്മ ഇല്ലാതാവാന് സമ്മതിദാന അവകാശം ശ്രദ്ധയോടെ വിനിയോഗിക്കണമെന്നും പറഞ്ഞു. അധികാരത്തില് വന്നാല് എന്ത് ക്രൂരതയും ചെയ്യാന് മടിക്കാത്തവരാണ് കമ്മ്യൂണിസ്റ്റുകള് എന്നും കണ്ണൂരിലെയും കാസര്കോട്ടെയും പാര്ട്ടി ഗ്രാമങ്ങളില് മുസ്ലിം വിരുദ്ധ നിലപാടുകള് സ്വീകരിച്ചവരാണ് സിപിഎം എന്നും പറഞ്ഞു.
മലപ്പുറത്തെ വിദ്യാര്ത്ഥികള് കോപ്പി അടിച്ചു ജയിക്കുന്നവര് ആണെന്ന് പറഞ്ഞ വിഎസിന്റെയും ജില്ലയുടെ ഉള്ളടക്കം വര്ഗീയതയാണെന്ന്് പറഞ്ഞ കടകംപള്ളിയുടെയും പ്രസ്താവനകള് ആര്എസ്എസിനു വേണ്ടി നടത്തിയ ദാസ്യ പണിയാണ്. എംവി ഗോവിന്ദന് മുസ്ലിം വിരുദ്ധ സമീപനം സ്വീകരിച്ച ആളാണെന്നും പറഞ്ഞു. ഉമര് ഫൈസിയുടേത് വ്യക്തിപരമായ പരാമര്ശമാണെന്നും സമസ്തയുടെ നിലപാട് അല്ലെന്നും സമസ്തയുടെ നിലപാട് വ്യക്തമാക്കാന് ഉമര്ഫൈസിയെ സംഘടന ചുമതലപ്പെടുത്തിയിട്ടില്ലെന്നും അദ്ദേഹം പറഞ്ഞു.
