മാന്നാര്: ലക്ഷങ്ങളുടെ സാമ്പത്തിക തട്ടിപ്പിനിരയായ മാന്നാര് ഗ്രാമപഞ്ചായത്ത് മുന് പ്രസിഡന്റ് വീട്ടിലെ പൂജാമുറിയില് തൂങ്ങി മരിച്ച നിലയില് കാണപ്പെട്ടു. മാന്നാര് പഞ്ചായത്ത് ഏഴാം വാര്ഡില് ഓങ്കാര് വീട്ടില് ശ്രീദേവിയമ്മ(71)യാണു മരിച്ചത്. ഭര്ത്താവ് സുകുമാരക്കുറുപ്പ് ചായയുമായി എത്തിയപ്പോഴാണു പൂജാമുറിയിലെ ഫാനില് കൈലി കൊണ്ട് കുരുക്കിട്ട് മരിച്ച നിലയില് കണ്ടത്.
സുകുമാരക്കുറുപ്പിന്റെ നിലവിളികേട്ട് റോഡിലൂടെ പോയവര് എത്തി കുരുക്ക് അറുത്ത് താഴെ കിടത്തി. തുടര്ന്ന് ഡോക്ടര് എത്തി മരണം സ്ഥിരീകരിച്ചു. മാന്നാറിലെ മുന് ഗ്രാമപഞ്ചായത്ത് അംഗം അടക്കമുള്ള സ്ത്രീകളുടെ നേതൃത്വത്തില് ശ്രീദേവിയമ്മയില്നിന്നും ലക്ഷങ്ങള് തട്ടിയെടുത്തതായി നേരത്തെ പരാതിയുണ്ടായിരുന്നു. അതു സംബന്ധിച്ച് അന്വേഷണം നടത്തി വരികയായിരുന്നുവെന്നു പോലീസ് പറയുന്നു.
ശ്രീദേവിയമ്മയുടെ പക്കല്നിന്നും പലപ്പോഴായി ഈ സംഘം പണം കൈപ്പറ്റിയിരുന്നു. ആദ്യം ചെറിയ തുക വാങ്ങി പറയുന്ന സമയത്ത് വാങ്ങിയ പണത്തിന്റെ പലിശയും കൃത്യമായി നല്കി വിശ്വാസം ആര്ജിച്ചു. പിന്നീട് ശ്രീദേവിയമ്മ മുഖേനേ പലരോടും വന്തുക വാങ്ങുകയും കൂടാതെ ശ്രീദേവിയമ്മയുടെ ആഭരണങ്ങളും മറ്റുള്ളവരുടെ ആഭരണങ്ങളും വാങ്ങി പണയംവച്ച് ഇക്കുട്ടര്ക്ക് നല്കി.
എന്നാല് പലിശയും മുതലും അടയ്ക്കാതെ വന്നപ്പോള് തന്ന തുകകള് തിരികെ തരണമെന്നാവശ്യപ്പെട്ടു. പ്രശ്നം രൂക്ഷമായതോടെ വസ്തു വിറ്റ് സാമ്പത്തിക ബാദ്ധ്യത തീര്ത്ത ശ്രീദേവിയമ്മ മനംനൊന്ത് ആത്മഹത്യ ചെയ്തെന്നാണ് വിവരം.
2000 മുതല് 2010 വരെയുള്ള കാലയളവില് മാന്നാര് ഗ്രാമപഞ്ചായത്ത് അംഗവും 2008 മുതല് 2010 വരെ പഞ്ചായത്ത് പ്രസിഡന്റുമായിരുന്നു. നിലവില് കുരട്ടിക്കാട് വായനശാല ജങ്ഷനു സമീപം ജനസേവന കേന്ദ്രം നടത്തിവരികയായിരുന്നു. മക്കള്: ശ്രീജ ദേവി ( യു.എസ്.എ), ശ്യാം കൃഷ്ണന് (കുവൈത്ത്), മരുമക്കള്: മണികണ്ഠന് ( യു.എസ്. എ),ശില്പ. സംസ്കാരം നാളെ 2.30നു വീട്ടുവളപ്പില് നടക്കും.
