തിരുവനന്തപുരം : ലോക്സഭാ തെരഞ്ഞെടുപ്പിന് ശേഷം കൂടുതല് ശക്തിയാര്ജ്ജിച്ചെന്ന വിലയിരുത്തലില് അണിയറ നീക്കങ്ങള് സജീവമാക്കി കോണ്ഗ്രസിലെ എ വിഭാഗം. ഉമ്മന്ചാണ്ടി എന്ന വികാരം ആളിക്കത്തിച്ചു കേരളത്തില് കൂടുതല് സംഘടനാ ശക്തി നേടാനാണു നീക്കം. ഈ ലോക്സഭാ തെരഞ്ഞെടുപ്പില് ഉമ്മന്ചാണ്ടിയെ നെഞ്ചിലേറ്റുന്നവര് ജയിച്ചു കയറുമെന്ന വിലയിരുത്തലില് കൂടിയാണ് ഈ നീക്കം. തിരുവനന്തപുരത്തും കോട്ടയത്തും പത്തനംതിട്ടയിലും ചാലക്കുടിയിലും വടകരയിലും കോഴിക്കോടും അതിനിര്ണായകമായിരുന്നു കോണ്ഗ്രസിന് ഈ തെരഞ്ഞെടുപ്പ്.
തിരുവനന്തപുരത്ത് ഒഴികെയുള്ള ഈ മണ്ഡലങ്ങളില് എല്ലാം എ ഗ്രൂപ്പുകാരായിരുന്നു സ്ഥാനാര്ത്ഥികള്. തിരുവനന്തപുരത്ത് മത്സരിച്ച ശശി തരൂര് ഗ്രൂപ്പുകള്ക്ക് അതീതനാണ്. അപ്പോഴും കുറച്ചു കാലമായി എ ഗ്രൂപ്പിന് ഒപ്പമാണ് തരൂര്. എ ഗ്രൂപ്പിന്റെ എല്ലാ സ്ഥാനാര്ത്ഥികളും ഈ ലോക്സഭാ തെരഞ്ഞെടുപ്പില് മികച്ച വിജയം നേടും. ഇതെല്ലാം ചര്ച്ചയാക്കി കെ.പി.സി.സിയില് അടക്കം കൂടുതല് അര്ഹമായ പദവികള് നേടുകയാണ് അവരുടെ ലക്ഷ്യം. ഉമ്മന്ചാണ്ടിയുടെ കുടുംബം എല്ലാ അര്ത്ഥത്തിലും പ്രചരണത്തില് സജീവമായി.
തിരുവനന്തപുരത്ത് അടക്കം തരൂരിന് ഇതു ഗുണകരമായി. ഈ സാഹചര്യത്തില് ചാണ്ടി ഉമ്മനെ കൂടി മുന്നില്നിര്ത്തിയുള്ള ഗ്രൂപ്പ് സംഘാടനമാണ് എ ഗ്രൂപ്പ് ലക്ഷ്യമിടുന്നത്. നിയമസഭാ തെരഞ്ഞെടുപ്പില് എ ഗ്രൂപ്പിന് അര്ഹമായ പ്രാതിനിധ്യം ഉറപ്പിക്കുയാണു ലക്ഷ്യം. എല്ലാവര്ക്കും അംഗീകരിക്കാന് കഴിയുന്ന തരൂരിനെ കൂടി കൂടെ നിര്ത്തിയുള്ള പുനസംഘടാനവും ചര്ച്ചകളിലുണ്ട്. ബെന്നി ബെഹന്നാനും നിലവില് കെ.പി.സി.സിയില്നിന്നും അനുഭവിക്കുന്ന അവഗണനയില് അമര്ഷത്തിലാണ്.
പോളിങ് ശതമാനം അടക്കം കുറഞ്ഞതിനു പിന്നില് സംഘടനാ സംവിധാനത്തിന്റെ പോരായ്മയുണ്ടെന്ന ബെന്നിയുടെ നിരീക്ഷണം അതിനിര്ണായകമാണ്. ലോക്സഭാ തെരഞ്ഞെടുപ്പില് കേരളത്തില് കോണ്ഗ്രസിനു മിന്നുംജയം കിട്ടിയാല് അതില് എ ഗ്രൂപ്പിന്റെ പങ്ക് ചര്ച്ചയാക്കുകയാണ് ബെന്നിയുടെ അടക്കം ലക്ഷ്യം. സമ്മര്ദ ഗ്രൂപ്പായി മാറിയില്ലെങ്കില് ഭാവിയില് കേരളത്തിലെ കോണ്ഗ്രസില് എ ഗ്രൂപ്പിന്റെ പ്രസക്തി കുറയുമെന്ന വിലയിരുത്തല് പല നേതാക്കള്ക്കുമുണ്ട്. ഇത് മനസിലാക്കിയാണ് വീണ്ടും എ ഗ്രൂപ്പിനെ പുനരുജ്ജീവിപ്പിക്കാനുള്ള നീക്കം.
