ചെന്നൈ: ഒളിമ്പിക്സിന് യോഗ്യതനേടി 4 - 400 മീറ്റര് റിലേയില് മലയാളികള് അടങ്ങിയ പുരുഷ ടീം. മലയാളികളായ മുഹമ്മദ് അനസ് യഹിയ, അമോജ് ജേക്കബ്, മുഹമ്മദ് അജ്മല് എന്നിവര് അടങ്ങുന്നതാണ് പുരുഷ റിലേ ടീം. ഇവര്ക്കൊപ്പം നാലാമനായി ആരോഗ്യരാജീവും ഉണ്ടായിരുന്നു. പുരുഷ വനിതാ ടീമുകള് ഈ ഇനത്തില് യോഗ്യത നേടിയിട്ടുണ്ട്.
ലോക അത്ലറ്റിക് റിലേയിലെ ഹീറ്റ്സിന്റെ രണ്ടാം റൗണ്ടില് രണ്ടാമത് എത്തിയാണ് ഇന്ത്യന് പുരുഷ ടീം ഒളിംപിക്സ് യോഗ്യത ഉറപ്പാക്കിയത്. അമേരിക്കക്ക് പിന്നില് ഇന്ത്യന് പുരുഷ ടീം രണ്ടാം സ്ഥാനത്ത് ഫിനിഷ് ചെയതു. 3:3.23 ആയിരുന്നു ഇന്ത്യന് സമയം. അമേരിക്കന് ടീം 2:59.95 എന്ന സമയം കുറിച്ചു. മൂന്ന് ഹീറ്റ്സുകളിലെയും ആദ്യ രണ്ട് സ്ഥാനക്കാര്ക്കായിരുന്നു ഒളിംപിക്സ് യോഗ്യത.
വനിതകളില് രൂപാല് ചൗധരി, എം ആര് പൂവമ്മ, ജ്യോതിക ശ്രി ദണ്ഡി, ശുഭ വെങ്കടേശന് എന്നിവരടങ്ങിയ സംഘമാണ് ഒളിംപിക്സ് യോഗ്യത നേടിയത്. ഹീറ്റ്സില് 3:28.54 സമയം കണ്ടെത്തിയ ജമൈക്കക്കയ്ക്ക് പിന്നില് 3:29.35 മിനിറ്റില് ഓടിയെത്തിയാണ് ഇന്ത്യന് വനിതാ സംഘം പാരീസ് ഒളിംപിക്സിന് ടിക്കറ്റെടുത്തത്.
റിലേയിലെ പുരുഷ-വനിതാ ടീമുകള് കൂടി യോഗ്യത ഉറപ്പാക്കിയതോടെ പാരീസ് ഒളിംപിക്സിലെ ഇന്ത്യന് ട്രാക്ക് ആന്ഡ് ഫീല്ഡ് താരങ്ങളുടെ എണ്ണം 19 ആയി. ജാവലിനിലെ നിലവിലെ ഒളിംപിക് ചാമ്പ്യന് നീരജ് ചോപ്ര അടക്കമാണിത്. ജൂലൈ 26 മുതല് ഓഗസ്റ്റ് 11വരെ പാരീസിലാണ് ഒളിംപിക്സ്. ഓഗസ്റ്റ് ഒന്നു മുതലാണ് പാരീസ് ഒളിംപിക്സിലെ അത്ലറ്റിക്സ് മത്സരങ്ങള് തുടങ്ങുക.
