കോഴിക്കോട്: ലക്ഷദ്വീപിലേക്ക് ബേപ്പൂരില്നിന്നു പുതിയ കപ്പല് സര്വീസ് വരുമെന്ന പ്രതീക്ഷകളെ അസ്ഥാനത്താക്കി ലക്ഷദ്വീപ് ഭരണകൂടം മംഗലാപുരത്തേക്ക് കൂടുതല് കപ്പല് സര്വീസ് ആരംഭിക്കുന്നു. ബേപ്പൂര് തുറമുഖത്ത് അടിസ്ഥാന സൗകര്യങ്ങളുടെ അപര്യാപ്ത ചൂണ്ടിക്കാട്ടിയാണു കപ്പല് സര്വീസ് പുനഃസ്ഥാപിക്കേണ്ടതില്ലെന്ന് ലക്ഷദ്വീപ് ഭരണകൂടം തീരുമാനിച്ചത്.
ഇത് ശക്തമായ പ്രതിഷേധത്തിനിടയാക്കി. ലക്ഷദ്വീപിലെ കടമത്ത്, കില്ത്താന് ദ്വീപുകളെ മംഗളൂരു പഴയ തുറമുഖവുമായി ബന്ധിപ്പിക്കുന്ന കപ്പല് സര്വീസ് ലക്ഷദ്വീപ് ഭരണകൂടം കഴിഞ്ഞ വ്യാഴാഴ്ച പുനരാരംഭിച്ചിരുന്നു. ബേപ്പൂര് തുറമുഖത്തെ പുതിയ വാര്ഫിന് 3.5 മീറ്റര് ആഴമുണ്ടെന്ന് പോര്ട്ട് ഓഫീസര് ലക്ഷദ്വീപ് ഭരണകൂടത്തിന് ഇ-മെയില് മുഖേന ഉറപ്പ് നല്കിയിട്ടും പരിഗണിച്ചില്ല.
ബേപ്പൂര്, കൊച്ചി തുറമുഖങ്ങളില്നിന്ന് മംഗളൂരു തുറമുഖത്തേക്ക് ചരക്കുഗതാഗതം വഴിതിരിച്ചുവിടാന് ലക്ഷദ്വീപ് ഭരണകൂടം ശ്രമിച്ചിരുന്നു. കേരളത്തിന്റെ ശക്തമായ എതിര്പ്പ് കാരണം തീരുമാനം മാറ്റിവയ്ക്കുകയായിരുന്നു. ബേപ്പൂര് തുറമുഖത്തോടുള്ള അവഗണന തുടരാന് കാരണം ലക്ഷദ്വീപ് ഭരണകൂടത്തിന്റെ താല്പര്യങ്ങള് കാരണമാണെന്ന് നഗരത്തിലെ വ്യാപാരി സംഘടനകള് ആരോപിച്ചു.
യൂണിയന് ടെറിട്ടറി ഓഫ് ലക്ഷദ്വീപ് അഡ്മിനിസ്ട്രേഷനിലെ ഏറ്റവും ചെറിയ ഓള് വെതര് പാസഞ്ചര് കപ്പലുകള്ക്കു പോലും എം.വി. അറബിക്കടലിനും എംവി ലക്ഷദ്വീപ് കടലിനും കുറഞ്ഞത് 3.5 മീറ്റര് ഡ്രാഫ്റ്റ് ആവശ്യമാണ്.
ബേപ്പൂരിലെ വാര്ഫില് നിലവില് ലഭ്യമായ ആഴം 3.4 മീറ്ററാണ്. അതിനാല്, ലക്ഷദ്വീപ് ഭരണകൂടത്തിന്റെ ഉടമസ്ഥതയിലുള്ളതും പ്രവര്ത്തിപ്പിക്കുന്നതുമായ എല്ലാ കാലാവസ്ഥാ യാത്രാ കപ്പലുകളുടെ സുരക്ഷിതമായ പ്രവര്ത്തനത്തിന് ബേപ്പൂര് വാര്ഫില് ലഭ്യമായ ആഴം പര്യാപ്തമല്ലെന്ന് ലക്ഷദ്വീപ് തുറമുഖ വകുപ്പ് ഡയറക്ടര് ആര്. ഗിരി ശങ്കര് കാലിക്കറ്റ് ചേംബര് ഓഫ് കൊമേഴ്സിനെ അറിയിച്ചു.
'ഗതാഗത സൗകര്യങ്ങള്ക്കായി ദ്വീപുകാര് മംഗലാപുരത്തേക്ക് പോകാന് നിര്ബന്ധിതരാകുന്നു. കോഴിക്കോട്ടേക്ക് പോകണമെങ്കില് മംഗലാപുരത്തേക്ക് സര്വീസ് നടത്തിയിട്ട് എന്ത് പ്രയോജനം? അഡ്മിനിസ്ട്രേറ്റര് പ്രഫുല് കെ പട്ടേലിന്റെ നേതൃത്വത്തിലുള്ള ലക്ഷദ്വീപ് ഭരണകൂടത്തിന് കീഴില് ഞങ്ങള് കാര്യമായ വെല്ലുവിളികള് നേരിടുകയാണെന്ന് ആന്ത്രോത്ത് ദ്വീപ് നിവാസിയായ റഹ്മത്തുല്ല പറഞ്ഞു.
ലക്ഷദ്വീപുകാര് കേരളത്തില് ഏറ്റവും ആശ്രയിക്കുന്നത് കോഴിക്കോട്, കൊച്ചി നഗരങ്ങളെയാണ്. ദ്വീപ് നിവാസികളില് ഭൂരിഭാഗവും ആരോഗ്യ സംരക്ഷണത്തിനും വിദ്യാഭ്യാസത്തിനുമായി ആശ്രയിക്കുന്നത് കോഴിക്കോടിനെയാണ്. ബിസിനസിനും പഠനത്തിനും ആരോഗ്യ സേവനങ്ങള്ക്കുമായി ബേപ്പൂരില് വന്നിറങ്ങാനാണു ദ്വീപുകാര്ക്ക് താല്പര്യം.
മൂന്ന് നാല് ദശകങ്ങള്ക്കപ്പുറം ബേപ്പൂരിനും ദ്വീപുകള്ക്കുമിടയില് നിരവധി യാത്രാ കപ്പലുകള് സര്വീസ് നടത്തിയിരുന്നു. അവയെല്ലാം ഒന്നൊന്നായി പിന്മാറിയപ്പോള് ദ്വീപുകാര്ക്ക് യാത്ര ദുരിതപൂര്ണമായി. കോവിഡ് മഹാമാരി വരെ വലിയപാണി, ചെറിയപാണി, പറളി തുടങ്ങിയ അതിവേഗ കപ്പലുകളാണ് ബേപ്പൂരിനും ലക്ഷദ്വീപിനും ഇടയില് പാസഞ്ചര് സര്വീസുകള്ക്കായി ഉപയോഗിച്ചിരുന്നത്.
