കൊല്ലം: പാലില് മയക്കുപൊടി ചേര്ത്ത് നല്കി മയക്കിക്കിടത്തിയ ശേഷമാണ് ഭാര്യയെയും മകളെയും കഴുത്തറുത്ത് കൊലപ്പെടുത്തിയതെന്ന് സംഭവത്തില് ഗുരുതരമായി പരിക്കേറ്റ് ചികിത്സയില് കഴിയുന്ന ഗൃഹനാഥന്. കഴിഞ്ഞ ദിവസം കൊല്ലത്താണ് മകളെയും മകനെയും ഭാര്യയേയും ഗൃഹനാഥന് കൊലപ്പെടുത്തി ആത്മഹത്യയ്ക്ക് ശ്രമിച്ചത്. കടബാധ്യതമൂലം കൂട്ടആത്മഹത്യക്കു ശ്രമിച്ചതാണെന്നാണ് മൊഴി.
സംഭവത്തില് കൈഞരമ്പ് മുറിച്ചതിനെത്തുടര്ന്ന് തിരുവനന്തപുരം മെഡിക്കല് കോളേജില് ചികിത്സയിലായിരുന്ന പൂതക്കുളം തെങ്ങില്വീട്ടില് ശ്രീജു (50) വിനെ പരവൂര് പൊലീസ് കേസില് അറസ്റ്റ് ചെയ്തു. കൊലപാതകവും കൊലപാതകശ്രമവുമാണ് ഇയാള്ക്കെതിരെ ചുമത്തിയിരിക്കുന്നത്. ശ്രീജുവിനെ ഡിസ്ചാര്ജ് ചെയ്തശേഷമാണ് അറസ്റ്റ് രേഖപ്പെടുത്തിയത്. ഒന്നാംക്ലാസ് മജിസ്ട്രേറ്റ് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. കൊട്ടിയത്ത് സ്വകാര്യ ആശുപത്രിയില് ചികിത്സയിലുള്ള മകന് ശ്രീരാഗ് അപകടനില തരണം ചെയ്തിട്ടുണ്ട്.
ശ്രീജുവിന്റെ ഭാര്യ പ്രീതയും മകള് ശ്രീനന്ദയുമാണ് തിങ്കളാഴ്ച രാത്രി കൊല്ലപ്പെട്ടത്. തിങ്കളാഴ്ച രാത്രിയായിരുന്നു സംഭവം. ചൊവ്വാഴ്ച രാവിലെ വീടിനു പുറത്ത് ആരെയും കാണാത്തതിനാല് അടുത്തുള്ള സഹോദരന് അന്വേഷിച്ചെത്തിയപ്പോഴാണ് രക്തത്തില് കുളിച്ചനിലയില് മൃതദേഹങ്ങള് കണ്ടത്. തുടര്ന്ന് അവശനിലയിലായ ശ്രീരാഗിനെയും ശ്രീജുവിനെയും ആശുപത്രിയില് പ്രവേശിപ്പിക്കുകയായിരുന്നു.
