തിരുവനന്തപുരം : മേയര് ആര്യാ രാജേന്ദ്രനും കെഎസ്ആര്ടിസി ഡ്രൈവറും തമ്മിലുളള തര്ക്കത്തില് പോലീസിന്റെ വ്യത്യസ്തമായ അന്വേഷണം. ഡ്രൈവര് യദു ലൈംഗിക ചേഷ്ട കാണിച്ചെന്ന പരാതിയില് സംഭവങ്ങള് പുനരാവിഷ്ക്കരിച്ച് പോലീസ് അന്വേഷണം നടത്തി. സംഭവ നടന്ന അതേ രാത്രി സമയത്ത് തന്നെയായിരുന്നു പോലീസിന്റെ പരിശോധനയും.
തിരുവനന്തപുരം നഗരത്തില് നടന്ന പരിശോധനയില് പട്ടം പ്ലാമൂട് മുതല് പി എം ജി വരെയാണ് ബസും കാറും ഓടിച്ചു പരിശോധിച്ചത്. ഡ്രൈവര് മോശമായി ആഗ്യം കാണിച്ചാല് കാറിന്റെ പിന് സീറ്റിലിരിക്കുന്നയാള്ക്ക് കാണാന് കഴിയുമെന്നാണ് പൊലീസ് കണ്ടെത്തല്. മേയറുടെ പരാതി ശരിവയ്ക്കുന്ന തെളിവുകള് ലഭിച്ചുവെന്നാണ് പോലീസ് വ്യക്തമാക്കുന്നത്. ഡ്രൈവര് യദു ബസ് ഓടിക്കുന്നതിടെ ലൈംഗികചേഷ്ട കാണിച്ചുവെന്ന മേയറുടെ പരാതി അന്വേഷിക്കുന്നതിന്റെ ഭാഗമായാണ് രാത്രിയിലെ പൊലീസ് നടപടി.
ആദ്യം കന്റോണ്മെന്റ് പൊലീസ് അന്വേഷിച്ച കേസ് ഇപ്പോള് മ്യൂസിയം പൊലീസാണ് അന്വേഷിക്കുന്നത്. യദുവിനെതിരെ നല്കിയ പരാതിയില് മേയര് ആര്യ രാജേന്ദ്രന്റെ രഹസ്യമൊഴിയും രേഖപ്പെടുത്തിയിട്ടുണ്ട്. ജുഡീഷ്യല് ഒന്നാംക്ലാസ് മജിസ്ട്രേറ്റ് കോടതി 12 ലാണ് രഹസ്യമൊഴി നല്കിയത്. രഹസ്യമൊഴി നല്കാനായി മ്യൂസിയം പൊലീസ് മേയര്ക്ക് നോട്ടീസ് നല്കിയിരുന്നു.
