മൈസൂര്: ഒരു വര്ഷം മുമ്പ് മൈസൂരില് പ്രധാനമന്ത്രി നടത്തിയ സന്ദര്ശനത്തിന്റെ ഹോട്ടല് ബില് അടയ്ക്കാന് കര്ണാടക സര്ക്കാര്. മൈസൂരിലെ റാഡിസണ് ബ്ലൂ ഹോട്ടലില് രണ്ട് ദിവസത്തെ സന്ദര്ശനത്തിന്റെ 80 ലക്ഷം ബില് കര്ണാടക അടയ്ക്കും.
പ്രധാനമന്ത്രി നരേന്ദ്ര മോദിയുടെ താമസത്തിനായി 80.6 ലക്ഷം രൂപയുടെ ബില്ലുകള് കെട്ടിക്കിടക്കുന്നതിനെക്കുറിച്ച് മൈസൂരിലെ റാഡിസണ് ബ്ലൂ ഹോട്ടലിന്റെ ധനകാര്യ വകുപ്പ് പലതവണ ഓര്മ്മിപ്പിച്ചെങ്കിലും അവര്ക്ക് പ്രതികരണമൊന്നും ലഭിച്ചില്ല. 2024 ജൂണ് 1-ന് മുമ്പ് ബില്ലുകള് അടച്ചില്ലെങ്കില് നിയമനടപടി സ്വീകരിക്കുമെന്ന് ഹോട്ടല് മാനേജ്മെന്റ് പിന്നീട് ഭീഷണിപ്പെടുത്തിയിരുന്നു.
കര്ണാടകാ നിയമസഭാ തെരഞ്ഞെടുപ്പിന് മുമ്പ് 2023-ല് ടൈഗര് പ്രോജക്ടിന്റെ 50-ാം വാര്ഷികത്തിന് സംസ്ഥാനം സന്ദര്ശിച്ച പ്രധാനമന്ത്രി മോദി മൈസൂരിലെ റാഡിസണ് ബ്ലൂ ഹോട്ടലില് രണ്ട് ദിവസം തങ്ങിയിരുന്നു. മൂന്ന് കോടി രൂപ ചെലവില് ഏപ്രില് 9 മുതല് 11 വരെ പ്രോജക്ട് ടൈഗര് പരിപാടിയുടെ 50 വര്ഷത്തെ ഉദ്ഘാടനം നടത്താന് കര്ണാടക വനം വകുപ്പിന് നിര്ദ്ദേശം നല്കിയതായി റിപ്പോര്ട്ടുകള് പുറത്തുവന്നിരുന്നു.
പരിപാടിയുടെ ചെലവില് 100% സഹായം യൂണിയന് ഗവണ്മെന്റ് ഉറപ്പുനല്കുകയും ചെയ്തിരുന്നതായിട്ടാണ് റിപ്പോര്ട്ട്. എന്നിരുന്നാലും, സമയക്കുറവ് കാരണം പരിപാടിയുടെ ചിലവ് 6.33 കോടി രൂപയായി ഉയര്ന്നു, കേന്ദ്ര സര്ക്കാര് 3 കോടി രൂപ മാത്രമാണ് സഹായം നല്കിയത്.
പ്രധാനമന്ത്രി, രാഷ്ട്രപതി തുടങ്ങിയ വിശിഷ്ട വ്യക്തികള് കര്ണാടക സന്ദര്ശിക്കുമ്പോള് സംസ്ഥാന സര്ക്കാരാണ് ബില്ലടയ്ക്കുന്നത്്. എന്നാല് മാതൃകാ പെരുമാറ്റച്ചട്ടം നിലവിലിരുന്നതിനാല് പ്രധാനമന്ത്രിക്ക് ആതിഥേയത്വം വഹിക്കുന്നതില് അന്നത്തെ സംസ്ഥാന സര്ക്കാര് ഇടപെട്ടില്ല.
കഴിഞ്ഞ വര്ഷം ഏപ്രിലില് പ്രധാനമന്ത്രി നരേന്ദ്രമോദി മൈസൂരു സന്ദര്ശനവേളയില് മൈസൂരില് തങ്ങിയതിന്റെ ബില്ലുകള് സംബന്ധിച്ച തര്ക്കത്തിനിടെ, സംസ്ഥാന സര്ക്കാര് കുടിശ്ശിക തീര്ക്കുമെന്ന് കര്ണാടക വനം മന്ത്രി ഈശ്വര് ഖണ്ഡ്രെ പറഞ്ഞിരുന്നു.
