നമ്മളില് ചിലരുടെ എങ്കിലും ഒക്കെ ആഗ്രഹമായിരിക്കും എവറസ്റ്റ് കീഴടക്കണം എന്നുള്ളത്. ഇതേ സ്വപ്നം പേറി നടക്കുന്ന നിരവധി ആളുകളുണ്ട് ഈ ലോകത്തില്. എന്നാല് പറയുന്നത്ര എളുപ്പമുള്ള കാര്യമല്ല. കാരണം കഠിന പ്രയത്നത്തിലൂടെയും പരിശ്രമത്തിലൂടെയും മാത്രമാണ് അത് സാധ്യമാകുക. അതുകൊണ്ട് തന്നെ വളരെ പരിമിതമായ ആളുകള്ക്കാണ് എവറസ്റ്റ് യാത്ര നടത്താനാവുക. എന്നാല്, എവറസ്റ്റിലേക്കുള്ള യാത്രയുടെ ഒരു വീഡിയോയാണ് ഇപ്പോള് സോഷ്യല് മീഡിയയില് അതിവേഗം വൈറലായിക്കൊണ്ടിരിക്കുന്നത്.
@everester.raj എന്ന ഇന്സ്റ്റഗ്രാം അക്കൗണ്ടാണ് 'എവറസ്റ്റിലെ ട്രാഫിക് ജാം എന്നും കുറിച്ചുകൊണ്ട് വീഡിയോ പങ്കുവച്ചിരിക്കുന്നത്. 29,000 അടി ഉയരത്തില് നിന്നുള്ള കാഴ്ചയാണ് ഈ വീഡിയോയില് എന്നാണ് കരുതുന്നത്. പുതുതായി വൈറലായിരിക്കുന്ന ഈ വീഡിയോ, ഇത്തരത്തിലുള്ള ആദ്യത്തെ വീഡിയോ അല്ല. എന്നാല്, എവറസ്റ്റ് കീഴടക്കാനെത്തിയവര് നേരിടുന്ന ചില ഭയാനകമായ അവസ്ഥ തിരിച്ചറിയാനുതകുന്ന ഒന്നാണ്. മെയ് 20 ന് ഷെയര് ചെയ്ത വീഡിയോ ലോകത്തിലെ ഏറ്റവും ഉയരമുള്ള കൊടുമുടിയില് നിന്നും ഇറങ്ങവെ പര്വതാരോഹകനായ രാജന് ദ്വിവേദി പകര്ത്തിയതാണ്. കൊടുമുടി കീഴടക്കാന് പോകുന്ന മറ്റ് പര്വതാരോഹകരെയാണ് വീഡിയോയില് കാണാനാവുന്നത്.
അതി കഠിനവും വളരെ ഗൗരവപൂര്ണമായ യാത്രയാണ് എവറസ്റ്റിലേക്കുള്ളത് എന്നാണ് ദ്വിവേദി പറയുന്നത്. ഒപ്പം അതിന്റെ ബുദ്ധിമുട്ടുകളെ കുറിച്ചും മറ്റും അദ്ദേഹം വിശദീകരിക്കുന്നുണ്ട്. കാലാവസ്ഥ അനുകൂലമായതിനാലാവാം ഇത്രയും പേര് ഒരുമിച്ച് എവറസ്റ്റിലേക്ക് കയറുന്നത്. എന്നാല്, മഞ്ഞുവീഴ്ചയും ചില ജീവികളുടെ ആക്രമണവും അടക്കം മറ്റ് പ്രതിസന്ധികള് അപ്പോഴും അവിടെയുണ്ട് എന്നും ദ്വിവേദി ചൂണ്ടിക്കാട്ടുന്നു. തന്നെ സംബന്ധിച്ച് ഇത്രയധികം പേര് മുകളിലേക്ക് വരുമ്പോള് താഴേക്കിറങ്ങുന്നത് വലിയ ബുദ്ധിമുട്ടായിരുന്നു എന്നും അദ്ദേഹം പറയുന്നു. വീഡിയോയില് പര്വതാരോഹകരുടെ ഒരു നീണ്ട നിര തന്നെയാണ് കാണാന് സാധിക്കുക. ഇത്ര കഠിനമായ യാത്രയില് ഇത്രയധികം തിരക്കുണ്ടാകുന്നത് ശരിക്കും നമ്മെ അമ്പരപ്പിക്കും എന്ന കാര്യത്തില് യാതൊരു സംശയവും വേണ്ട.
