കൊച്ചി : നെടുമ്പാശേരി അവയവക്കടത്തു കേസ് അന്വേഷണം സി.ബി.ഐക്കു കൈമാറിയേക്കും. രാജ്യാന്തര ബന്ധമുള്ള കേസായതിനാല്, കേന്ദ്ര ഏജന്സി അന്വേഷിക്കണമെന്ന് പോലീസ് ആഭ്യന്തര വകുപ്പിനു റിപ്പോര്ട്ട് നല്കി. ഇപ്പോള് നടക്കുന്ന അന്വേഷണം പൂര്ത്തിയാക്കിയശേഷമാകും സി.ബി.ഐക്കു വിടുന്ന കാര്യത്തില് സര്ക്കാര് അന്തിമ തീരുമാനമെടുക്കുക.
നിലവില് സി.ബി.ഐ. കൊച്ചി യൂണിറ്റും കേസുമായി സഹകരിക്കുന്നുണ്ട്. രാജ്യാന്തര കുറ്റാന്വേഷണ സംഘടനയായ ഇന്റര്പോളിന്റെ ഇന്ത്യയിലെ നോഡല് ഏജന്സിയാണു സി.ബി.ഐ. പ്രതികളെപ്പറ്റിയുള്ള പല വിവരങ്ങളും സി.ബി.ഐയുടെ സഹായത്തോടെയാണു പോലീസ് കണ്ടെത്തിയത്. കേസ് ഏറ്റെടുക്കാമെന്നു സി.ബി.ഐ. അറിയിച്ചതായാണു വിവരം. ഇതോടെ സംസ്ഥാന സര്ക്കാരിനും പോലീസിനും തലവേദന ഒഴിവാകും.
വിവിധ സംസ്ഥാനങ്ങളിലെ അവയവക്കടത്തു കേസുകള് നിലവില് സി.ബി.ഐ. അന്വേഷിക്കുന്നുണ്ട്. ഇവയോടൊപ്പം നെടുമ്പാശേരി കേസും അന്വേഷിക്കാനാണു സി.ബി.ഐയുടെ നീക്കം. മനുഷ്യക്കടത്ത് നടത്തിയതായി തെളിവു ലഭിച്ചാല്, സംഭവത്തില് കേസെടുത്ത് അന്വേഷിക്കുമെന്ന് എന്.ഐ.എ. വൃത്തങ്ങള് സൂചിപ്പിച്ചു. പോലീസ് എഫ്.ഐ.ആറില് പ്രതികള്ക്കെതിരേ യു.എ.പി.എ. വകുപ്പുകൂടി ചുമത്തിയാല് എന്.ഐ.എ. കേസ് രജിസ്റ്റര് ചെയ്യും. എന്നാല്, ഇതുവരെ മനുഷ്യക്കടത്തിന്റെ തെളിവുകള് ലഭിച്ചതായി വിവരമില്ലെന്ന് എന്.ഐ.എ. വൃത്തങ്ങള് പറഞ്ഞു.
അവയവം എടുത്തശേഷം മടങ്ങിയെത്തിയതിനാല്, മനുഷ്യക്കടത്തായി കാണാനാവില്ല. മാത്രമല്ല, തിരിച്ചെത്താത്തവരെപ്പറ്റി ഇതുവരെ ആരും പരാതിയും നല്കിയിട്ടില്ല. ഇറാന് ഒഴികെയുള്ള എല്ലാ രാജ്യങ്ങളും അവയവങ്ങള്ക്കായുള്ള സാമ്പത്തിക ഇടപാടുകള് നിരോധിച്ചിട്ടുണ്ട്.
രാജ്യാന്തര അവയവ റാക്കറ്റിലെ കണ്ണിയായ തൃശൂര് സ്വദേശി സാബിത്ത് നാസര് ഹൈദരബാദില് വച്ചാണു അവയവ റാക്കറ്റ് സംഘത്തിന്റെ ഭാഗമായത്. അഞ്ചു വര്ഷം മുമ്പ് അവയവം ദാനം ചെയ്തു പണം സമ്പാദിക്കാനെത്തിയ സാബിത്ത് അവയവ റാക്കറ്റിന്റെ വില്പന ഏജന്റായി നേടിയതു കോടികളാണ്. ഇയാളെ ഇറാനില് കൊണ്ടുപോയ കൊച്ചി സ്വദേശി മധുവിനേപ്പറ്റി ചില വിവരങ്ങള് ലഭിച്ചിട്ടുണ്ട്.
മധു ഇറാനിലുണ്ടെന്നാണു വിവരം. ഇന്റര്പോളിന്റെ സഹായത്തോടെ ഇയാളെ എത്തിക്കേണ്ടതുണ്ട്. സി.ബി.ഐ. ഏറ്റെടുക്കുന്നതോടെ ഇക്കാര്യത്തില് നടപടിയുണ്ടാകും. ഇറാനിലെ ആശുപത്രികളില് ജോലി ചെയ്യുന്ന ഡോക്ടര്മാര് ഉള്പ്പെടെയുള്ളവരെപ്പറ്റി സാബിത്ത് മൊഴി നല്കിയിട്ടുണ്ട്. ഇവരെയും ചോദ്യംചെയ്യേണ്ടി വരും. അവയവ വില്പന ഇറാനില് നിയമവിധേയമായതിനാല്, അവിടെ കേസെടുക്കാനാവില്ല.
സാബിത്തുമായി ബന്ധമുള്ള തൃശൂര് സ്വദേശിയായ യുവതിയെയുറിച്ചും അന്വേഷണം നടക്കുന്നുണ്ട്. ബംഗ്ലാദേശ്, ശ്രീലങ്കന് അഭയാര്ഥികളെ മനുഷ്യക്കടത്തായി വിദേശത്ത് എത്തിച്ചതായും സംശയമുണ്ട്.
