സോഷ്യല് മീഡിയയില് ലൈക്കുകള് വാരിക്കൂട്ടി വൈറലാകാനും ആരാധകരെ സമ്പാദിക്കാനുമാണ് എല്ലാ വ്ളോഗര്മാരും ലക്ഷ്യമിടുന്നത്. ല്ഇതിനായി എന്ത് സാഹസികത കാണിക്കാനും ആളുകള് തയ്യാറാകാറുണ്ട്. ചിലര് വിലകൂടിയ കാറുകള് സമ്മാനിച്ചും മറ്റ് ചിലര് പണം നല്കിയും വൈറലാകുന്നു. ഇനി മറ്റ് ചിലര് പണം നല്കി പല അബദ്ധങ്ങളും ചെയ്യാന് മറ്റുള്ളവരെ പ്രേരിപ്പിക്കുന്നു. അത്തരത്തിലുള്ള ഒരു വീഡിയോ സമൂഹ മാധ്യമങ്ങളില് പങ്കുവയ്ക്കപ്പെട്ടപ്പോള് നിരവധി പേരാണ് യൂട്യൂബര്ക്കെതിരെ രംഗത്തെത്തിയിരിക്കുന്നത്.
അമേരിക്കയിലെ ടെക്സാസില് ഒരു യൂട്യൂബര് ചെയ്ത കാര്യമാണ് ആളുകളെ ചൊടിപ്പിച്ചിരിക്കുന്നത്. തന്റെ ചാനലില് ലൈവ് സ്ട്രീമിംഗ് നടത്താനായി ഒരു യൂട്യൂബര്, നീന്തല് അറിയാത്ത ഒരു സ്ത്രീയെ പണം നല്കി നിര്ബന്ധിച്ച് ടെക്സസ് തടാകത്തിലേക്ക് ചാടിച്ചു. വെള്ളത്തില് ചാടിയ സ്ത്രീ മുങ്ങിത്താഴുന്നതിനിടയില് രക്ഷിക്കാനായി നിലവിളിച്ചപ്പോള് യൂട്യൂബറും സംഘവും അവിടെ നിന്ന് രക്ഷപ്പെടുകയായിരുന്നു. സംഘം കാറില് സംഭവസ്ഥലത്ത് നിന്നും രക്ഷപ്പെടുമ്പോള് വെള്ളത്തില് ചാടിയെ സ്ത്രീയെ രക്ഷിക്കാനായി ഫയര്ഫോഴ്സ് സംഘം വരുന്നതും വൈറല് വീഡിയോയില് കാണാന് കഴിയുന്നുണ്ട്.
നെതാലി റെയ്നോള്ഡ്സ് എന്ന സമൂഹ മാധ്യമ താരമാണ് തന്റെ യൂട്യൂബ് ചാനല് റീച്ചിന് വേണ്ടി ഒരു സ്ത്രീയുടെ ജീവന് അപകടപ്പെടുത്തുന്ന രീതിയിലുള്ള പരിപാടി നടത്തിയത്. നീന്തല് അറിയാത്ത സ്ത്രീക്ക് തടാകത്തില് ചാടാന് 20 ഡോളറാണ് റെയ്നോള്ഡ്സ് വാഗ്ദാനം ചെയ്തത്. പണം ലഭിക്കുമെന്ന് അറിഞ്ഞപ്പോള് നീന്തല് അറിയാതിരുന്നിട്ട് കൂടിയും സ്ത്രീ തടാകത്തില് ചാടാന് തയ്യാറായി. എന്നാല്, തടാകത്തില് ചാടിയതും അവര് സഹായത്തിനായി നിലവിളിക്കാന് തുടങ്ങി. ഈ സമയം അവരെ രക്ഷിക്കാന് യാതൊരുവിധ ശ്രമവും നടത്താതെ റെയ്നോള്ഡ്സും അവരുടെ കൂട്ടത്തിലുണ്ടായിരുന്നവരും സ്ഥലത്ത് നിന്ന് ഓടിപ്പോവുകയും കാറില് രക്ഷപ്പെടുകയുമായിരുന്നു.
ഓടി രക്ഷപ്പെടുമ്പോഴും ഇക്കാര്യങ്ങളെല്ലാം അവര് തന്റെ യൂട്യൂബ് ചാനലിലൂടെ ലൈവായി പൊതുജനങ്ങളെ കാണിക്കുകയും ചെയ്തു. തടാകത്തിലേക്ക് ചാടിയ സ്ത്രീ സഹായത്തിനായി നിലവിളിക്കുന്നത് കേട്ടാണ് മറ്റുള്ളവര് ഓടിക്കൂടി ഫയര് ഫോഴ്സിനെ വിളിച്ചത്. പിന്നീട് ഇവരെത്തിയാണ സ്ത്രീയെ തടാകത്തില് നിന്നും രക്ഷപ്പെടുത്തിയത്. ഇവരുടെ ആരോഗ്യ സ്ഥിതിയെ കുറിച്ചുള്ള കാര്യങ്ങള് വെളിപ്പെടുത്തിയിട്ടില്ല. അതേസമയം ആളുകളെ ഇത്തരം കാര്യങ്ങള്ക്ക് പ്രേരിപ്പിച്ച്, അപകടമുണ്ടാകുമ്പോള് അവിടെ നിന്നും രക്ഷപ്പെടുകയും ചെയ്ത യൂട്യൂബര്ക്കെതിരെ വലിയ തോതിലുള്ള ജനരോഷമാണ് സമൂഹ മാധ്യമങ്ങളില് ഉയരുന്നത്.
