കലാരഞ്ജിനി, കവിത, കല്പന... മലയാള സിനിമയിൽ ഒരു കാലത്തു നിറഞ്ഞു നിന്നിരുന്ന അഭിനേത്രികളായ സഹോദരിമാരായിരുന്നു. ഇതിൽ കവിതയാണ് പ്രേക്ഷകരുടെ സ്വന്തം ഉർവശി. ഉർവശിക്ക് മുൻപ് നായിക വേഷത്തിൽ തിളങ്ങിയിരുന്ന താരമായിരുന്നു കലാരഞ്ജിനി.
അഭിനയമെന്ന പോലെ കലാരഞ്ജിനി ശ്രദ്ധിക്കപ്പെട്ടത് ശബ്ദം കൊണ്ട് കൂടിയാണ്.
ഇപ്പോഴിതാ ശ്വസനനാളത്തിനും ശബ്ദത്തിനും മാറ്റം വന്നതിന്റെ കാരണം തുറന്ന് പറയുകയാണ് കലാരഞ്ജിനി. വായില് ആസിഡ് വീണതോടെയാണ് ശബ്ദം മാറിയതെന്നാണ് നടി പറയുന്നത്. തന്റെ ജീവിതത്തില് ഇങ്ങനെയൊക്കെ സംഭവിച്ചത് വിധിയെന്നാണ് താരം പറയുന്നത്.
"കുട്ടിക്കാലത്ത് പാപ്പിലോമ എന്നൊരു രോഗം ബാധിച്ചിരുന്നു. മറുക് പോലുള്ള ചെറിയ തടിപ്പ് ശ്വസന നാളത്തില് വരുന്ന അവസ്ഥയാണ് പാപ്പിലോമ. ഒരു പ്രായം കഴിയുമ്പോൾ അത് ഭേദമാകുമെന്നാണ് ഡോക്ടർമാർ അന്ന് പറഞ്ഞത്. പേടിക്കേണ്ടതല്ലെന്നും പറഞ്ഞിരുന്നു. അത് പിന്നീട് മാറി.
സിനിമയില് അഭിനയിക്കുന്ന സമയത്ത് മേക്കപ്പ്മാൻ ഷൂട്ടിന് വേണ്ടി സാധാരണ ബ്ലെഡ് ഉണ്ടാക്കിയിരുന്നത് വെളിച്ചെണ്ണയിലായിരുന്നു. ഒരു ദിവസം പ്രേം നസീർ സാറിനൊപ്പം അഭിനയിക്കുകയായിരുന്നു. അവിടെ ഉണ്ടായിരുന്ന മേക്കപ്പ് മാൻ ബ്ലെഡ്തയ്യാറാക്കാൻ ചായം ആസിറ്റോണില് മിക്സ് ചെയ്ത് വച്ചിരുന്നു. അതറിയാതെ ഞാനെടുത്ത് വായില് ഒഴിച്ചു. അതോടെ എന്റെ വായ മുഴുവൻ പൊള്ളി. അന്നു മുതല് തന്റെ ശ്വാസനാളം ഡ്രൈയാകൻ തുടങ്ങി.
പ്രായമേറുന്തോറും ഡ്രൈ ആകുന്ന അവസ്ഥയും അധികമായി. അതായിരുന്നു ശബ്ദത്തിന്റെ മാറ്റത്തിനുള്ള കാരണം. അയാള് മനപൂർവ്വം ചെയ്തതല്ല. അന്നതെല്ലാം അറിയാതെ സംഭവിച്ചതായിരുന്നു. ഇങ്ങനെയൊക്കെ ആയത് എന്റെ വിധി..." അല്പം സങ്കടവും തമാശയും കലർത്തി കലാരഞ്ജിനി പറയുന്നു.
