ഹരിഹരൻ സംവിധാനം ചെയ്ത മയൂഖം എന്ന ചിത്രത്തിലൂടെ അരങ്ങേറി മലയാളികളുടെ പ്രിയപ്പെട്ട താരമായി മാറിയ അഭിനേത്രിയാണ് മംമ്ത മോഹൻ ദാസ്. തെലുങ്ക്, തമിഴ് ഭാഷകളിലും അഭിനയ രംഗത്ത് സജീവമാണ് താരം. അഭിനയത്തിനു പുറമെ പിന്നണി ഗാനരംഗത്തും മംമ്ത സജീവമാണ്.
തമിഴിൽ വിജയ് സേതുപതിയ്ക്കൊപ്പമുള്ള തന്റെ പുതിയ ചിത്രമായ മഹാരാജയുടെ റിലീസിനായി കാത്തിരിക്കുകയാണ് താരം. നിതിലൻ സംവിധാനം ചെയ്യുന്ന ചിത്രത്തില് അനുരാഗ് കശ്യപ്, നട്ടി നടരാജ്, അഭിരാമി തുടങ്ങിയവരാണ് മറ്റ് താരങ്ങള്.
ഇപ്പോഴിതാ അതിന്റെ റിലീസിന്റെ സന്തോഷം പങ്കിടുകയാണ് താരം. "ഞങ്ങളുടെ പുതിയ ചിത്രമായ മഹാരാജയുമായി എന്റെ പ്രിയപ്പെട്ടതും സ്വന്തം മക്കൾസെൽവൻ നടൻ വിജയ്സേതുപതിയുമായി ഞാൻ നിങ്ങളുടെ അടുത്തേക്ക് വരുന്നു നാളെ തീയറ്ററുകളിൽ... അനുരാഗ് കശ്യപ്, നട്ടി നടരാജ്, അഭിരാമി കൂടാതെ മറ്റ് മികച്ച അഭിനേതാക്കളുമായി ഹൃദയസ്പർശിയായ ഒരു ത്രില്ലിംഗ് സിനിമ, നിതിലൻ സംവിധാനം ചെയ്തത് അജനീഷിന്റെ സംഗീതം, എന്നിവർ നിങ്ങളിലേക്ക് കൊണ്ടുവരുന്നു..." എന്ന ക്യാപ്ഷൻ നൽകിയാണ് മംമ്ത ചടങ്ങിന്റെ വീഡിയോ പങ്കിട്ടിരിക്കുന്നത്.
വിജയ് സേതുപതിക്കും അനുരാഗ് കശ്യപിനും ഒപ്പമുള്ള ചിത്രങ്ങളും മംമ്ത സോഷ്യല് മീഡിയയിലൂടെ പങ്കുവച്ചിട്ടുണ്ട്. ‘‘മഹാരാജ ഇന്ന് മുതൽ തിയേറ്ററുകളിൽ ഏകദേശം 2000 സ്ക്രീനുകളിൽ...അതെ ലോകവ്യാപകമായി 2000 സ്ക്രീനുകൾ...ഇന്ന് തന്നെ നിങ്ങളുടെ ടിക്കറ്റുകൾ ബുക്ക് ചെയ്യൂ...’’ എന്ന ക്യാപ്ഷന് നല്കിയാണ് മംമ്തയുടെ പോസ്റ്റ്.
