ചെങ്ങന്നൂര്: ആലായില് സ്കൂള്വിദ്യാര്ഥികളുമായി പോയ ബസ് കത്തിനശിച്ചു. ഡ്രൈവറുടെ സമയോചിതമായ ഇടപെടല് മൂലം വന്ദുരന്തം ഒഴിവായി. മാന്നാര് ശ്രീഭുവനേശ്വരി ഇംഗ്ലീഷ് മീഡിയം സ്കൂളിലെ ബസാണ് ഓടിക്കൊണ്ടിരിക്കെ കത്തിയത്. അത്തലക്കടവ്-പെണ്ണുക്കര ക്ഷേത്രം റോഡില് ആലാ ഗവ. ഹയര്സെക്കന്ഡറി സ്കൂളിനു സമീപം ഇന്നലെ രാവിലെ 8.45 നായിരുന്നു സംഭവം.
ബസിന്റെ മുന്വശത്തുനിന്ന് പുക ഉയരുന്നതുകണ്ട് ഡ്രൈവര് ശ്രീകുമാര് ബസ് റോഡരികിലേക്കു മാറ്റി എന്ജിന് ഓഫ് ചെയ്യുകയായിരുന്നു. വിദ്യാര്ഥികള് ബഹളം വയ്ക്കുന്നതു കേട്ട് സമീപവാസിയായ അഡ്വ. ജെയ്സണ് ജോണും ഓടിയെത്തി. തുടര്ന്ന് ഡ്രൈവറും ബസ് ജീവനക്കാരനും ചേര്ന്ന് വിദ്യാര്ഥികളെ മുഴുവന് പുറത്തിറക്കി. ഇവരെ സമീപത്തെ വീട്ടിലേക്ക് സുരക്ഷിതമായി മാറ്റി.
ചെറിയ പുക മാത്രമാണ് ആദ്യം കണ്ടതെങ്കിലും പിന്നീട് തീ ആളിപ്പടരുകയായിരുന്നു. ബസിലെയും ജെയ്സന്റെ വീട്ടിലെയും അഗ്നിരക്ഷാ ഉപകരണങ്ങള് ഉപയോഗിച്ചെങ്കിലും തീ നിയന്ത്രണവിധേയമാക്കാന് കഴിഞ്ഞില്ല. തുടര്ന്ന് അഗ്നിരക്ഷാസേന എത്തിയാണു തീയണച്ചത്. 17 കുട്ടികളാണു ബസിലുണ്ടായിരുന്നത്. പോലീസും മോട്ടോര് വാഹന വകുപ്പ് ഉദ്യോഗസ്ഥരും ബസില് പരിശോധന നടത്തി.
സ്കൂള് തുറക്കുംമുമ്പ് ചെങ്ങന്നൂര് ജോ.ആര്.ടി.ഒ. നേരിട്ടു പരിശോധിച്ച് ബസിനു ഫിറ്റ്നസ് സര്ട്ടിഫിക്കറ്റ് നല്കിയിരുന്നതാണ്. എന്ജിന് ഭാഗത്ത് പുക കണ്ടപ്പോഴേക്കും ഡ്രൈവറും സഹായിയും കൂടി കുട്ടികളെ മാറ്റിയതാണ് ദുരന്തം ഒഴിവാക്കിയത്. റെയില്വേ ഗേറ്റ് അടച്ചിട്ടതിനാല് അഗ്നിരക്ഷാസേനയുടെ വാഹനത്തിന് വിലപ്പെട്ട 15 മിനിറ്റ് നഷ്ടപ്പെട്ടതായി പരിസരവാസികള് ആരോപിച്ചു.
