മോസ്ക്കോ: രണ്ടു ഉപാധികള് ഉക്രെയിന് അംഗീകരിച്ചാല് ഏറ്റവും അടുത്ത ദിവസം തന്നെ വെടിനിര്ത്തല് പ്രഖ്യാപിക്കാന് സജ്ജമാണെന്ന നിര്ദേശം മുമ്പോട്ട് വെച്ച് റഷ്യന് ഭരണാധികാരി വ്ളാഡിര് പുടിന്. കഴിഞ്ഞദിവസം രാവിലെ റഷ്യന് വിദേശകാര്യ മന്ത്രാലയത്തില് നടത്തിയ പ്രസംഗത്തിലാണ് പുടിന് ഈ പ്രസ്താവന നടത്തിയതെന്ന് ഇംഗ്ളീഷ് മാധ്യമങ്ങള് റിപ്പോര്ട്ട് ചെയ്യുന്നു.
റഷ്യന് സൈന്യം കൈവശപ്പെടുത്തിയിരിക്കുന്ന നാല് പ്രദേശങ്ങളില് നിന്ന് ഉക്രെയിന് സൈന്യത്തെ പിന്വലിക്കാനും നാറ്റോയില് ചേരാനുള്ള പദ്ധതികള് ഉപേക്ഷിക്കാനും ഉക്രെയ്ന് തയ്യാറാണെങ്കില് വെടിനിര്ത്തല് പ്രഖ്യാപിക്കുമെന്നും ഉടന് സമാധാന ചര്ച്ചകളില് ഏര്പ്പെടുമെന്നും വ്ളാഡിമിര് പുടിന് പ്രഖ്യാപിച്ചു. താമസമില്ലാതെ ചര്ച്ചകള് ആരംഭിക്കാന് തയ്യാറാണെന്നും കൂട്ടിച്ചേര്ത്തു.
അതേസമയം ഉക്രെയ്നിലെ സമാധാനത്തിന് ഒരു 'റോഡ് മാപ്പ്' നിര്മ്മിക്കുന്നതിനായി സ്വിറ്റ്സര്ലന്ഡില് രണ്ട് ദിവസത്തെ സമ്മേളനം നടക്കാനിരിക്കെയാണ് ഈ പ്രഖ്യാപനം. ഉക്രേനിയന് ഭൂമി മോസ്കോയ്ക്ക് അടിയറവെച്ചുകൊണ്ടുള്ള ഒരു കരാര് പരിഗണിക്കാന് ഉക്രെയിന് പ്രസിഡന്റ് വോളോഡിമര് സെലെന്സ്കി പക്ഷേ വിസമ്മതിച്ചു. പുടിന്റെ സമാധാന നിര്ദ്ദേശം വ്യാജമാണെന്ന് മൈഖൈലോ പോഡോലിയാകും പറഞ്ഞു.
ഡൊനെറ്റ്സ്കിന്റെയും ലുഹാന്സ്കിന്റെയും ഗണ്യമായ അളവ് നിയന്ത്രിക്കുന്നത് ഇപ്പോള് പുടിന്റെ സൈന്യമാണ്. 2022 സെപ്റ്റംബറില് മോസ്കോ ഏകപക്ഷീയമായി ആ രണ്ട് പ്രദേശങ്ങളും കെര്സണിന്റെയും സപ്പോരിജിയയുടെയും ഭാഗങ്ങള് കൂട്ടിച്ചേര്ത്തതായി പ്രഖ്യാപിച്ചു. ഇന്ന് രാവിലെ നടന്ന അതേ പ്രസംഗത്തില്, മൂന്നാം ലോകമഹായുദ്ധത്തെ കുറിച്ച് പാശ്ചാത്യ നേതാക്കള് തന്നെ 'തിരിച്ചുവരാന് കഴിയാത്ത അവസ്ഥയിലേക്ക്' തള്ളിവിടുകയാണെന്ന് നേരത്തേ റഷ്യന് പ്രസിഡന്റ് വ്യക്തമാക്കിയിരുന്നു.
