യൂറോകപ്പില് റൊമേലു ലൂക്കാക്കുവിന്റെ ഇരട്ടഗോളുകള് നിഷേധിക്കപ്പെട്ടതിനെ തുടര്ന്ന് ബെല്ജിയം അട്ടിമറിക്ക് ഇരകളായപ്പോള് ലോകകപ്പിലെ ഫൈനലിസ്റ്റുകളായ ഫ്രാന്സിന് കഷ്ടിച്ച് ജയം. റുമാനിയ യൂറോകപ്പില് ചരിത്രജയം കുറിക്കുകയും ചെയ്തു.
ഇന്നലെ നടന്ന മത്സരത്തില് സ്ളോവാക്യയാണ് ബെല്ജിയത്തെ കീഴടക്കിയത്. കളിയുടെ ഏഴാം മിനിറ്റില് ഷ്രാണ്സ് നേടിയ ഗോളിലായിരുന്നു സ്ളോവാക്യ ജയിച്ചു കയറിയത്. ഫ്രാങ്ക്ഫര്ട്ട് അരീനയില് ഏറെ നേരം പന്ത് കൈവശം വെയ്ക്കുകയും അനേകം അവസരം ഉണ്ടാക്കിയെടുക്കുകയും ചെയ്തെങ്കിലും ബെല്ജിയത്തിന് മുതലാക്കാനായില്ല. പന്ത് വലയില് എത്തിച്ചപ്പോഴെല്ലാം വാര് വിനയാകുകയും ചെയ്തു.
ലൂക്കാക്കുവിന്റെ രണ്ടു ഗോളുകളാണ് വീഡിയോ റഫറി നിഷേധിച്ചത്. ആദ്യ തവണ താരം ഓഫ് സൈഡായി വിധിക്കപ്പെട്ടപ്പോള് രണ്ടാം തവണ ഹാന്ഡ്ബോളില് കുടുങ്ങുകയും ചെയ്തു. മൂന്നിലധികം അവസരങ്ങള് ലൂക്കാക്കു നഷ്ടമാക്കുകയും ചെയ്തതോടെ ബെല്ജിയത്തിന്റെ വിധി തോല്വിയോടെ തുടങ്ങാനായിരുന്നു. അടുത്ത രണ്ടു മത്സരങ്ങളും ജയിക്കണമെന്ന രീതിയിലായ ബെല്ജിയത്തിന് അടുത്തതായി നേരിടേണ്ടത് മൂന്ന് ഗോളുകള്ക്ക് ഉക്രയിനെ മടക്കിയ റുമേനിയയെയാണ്. ഉക്രെയിനെതിരേ സ്റ്റാന്സിയു, മാരിന്, ഡ്രാഗസ് എന്നിവരുടെ ഗോളുകളിലാണ് റുമാനിയ വിജയിച്ചത്. 20 വര്ഷങ്ങള്ക്ക് ശേഷമാണ് റുമാനിയ യൂറോയില് ഒരു മത്സരം ജയിക്കുന്നത്.
2000 ല് ഇംഗ്ളണ്ടിനെ ഗ്രൂപ്പ് സ്റ്റേജില് 3-2 ന് തോല്പ്പിച്ചതായിരുന്നു ഇതിന് മുമ്പ് ഇവര് നേടിയിട്ടുള്ള വിജയം. 2022 ല് റഷ്യന് അധിനിവേശം ഉണ്ടായതിന് ശേഷം ഉക്രെയിന് ആദ്യമായിട്ടായിരുന്നു ഒരു പ്രധാന ടൂര്ണമെന്റില് കളിക്കുന്നത്.
മൂന്ന് വര്ഷം മുമ്പ് യൂറോയില് ക്വാര്ട്ടറില് എത്തിയ ടീമാണ് ഉക്രെയിന് സ്ളോവാക്യയാണ് ഉക്രെയിന്റെ അടുത്ത എതിരാളികള്. അതേസമയം മുന് ചാംപ്യന്മാരായ ഫ്രാന്സിന് ഇന്നലെ കഷ്ടിച്ച് രക്ഷപ്പെടലായിരുന്നു ഉണ്ടായത്. ഓസ്ട്രിയയ്ക്ക് എതിരേ വൂബറിന്റെ സെല്ഫ് ഗോള് വേണ്ടി വന്നു ഫ്രാന്സിന് യൂറോയില് ആദ്യം ജയം നേടാന്. എംബാപ്പേയ്ക്ക് പരിക്കേറ്റത് അവര്ക്ക് തിരിച്ചടിയായി മാറി.
