സിനിമയിലോ രാഷ്ട്രീയത്തിലോ യാതൊരു പിന്ബലവുമില്ലാതിരുന്നിട്ടും കഠിനാധ്വാനവും ഇച്ഛാശക്തിയും നിരന്തരപരിശ്രമവും നിശ്ചയദാർഢ്യവും കൊണ്ട് തലമുറകളെ ത്രസിപ്പിച്ച ബോളിവുഡിന്റെ പ്രിയ താരമാണ് ശത്രുഘ്നന് സിന്ഹ. താരത്തിന്റെ മകളെന്ന ലേബലിലാണ് സൊനാക്ഷി സിന്ഹ ബോളിവുഡിലെത്തിയതെങ്കിലും പിന്നീട് തന്റേതായ ഒരു ഐഡന്റിറ്റി താരം സിനിമയില് ഉണ്ടാക്കിയെടുത്തിരുന്നു. കഴിഞ്ഞ ദിവസങ്ങളില് ഏറ്റവുമൊടുവില് സോഷ്യല് മീഡിയയില് ശ്രദ്ധിക്കപ്പെട്ടത് സോനാക്ഷി സിൻഹ-സഹീർ ഇക്ബാല് വിവാഹമാണ്. ഏഴ് കൊല്ലം നീണ്ട പ്രണയത്തിനൊടുവിലാണ് താരങ്ങളിരുവരും വിവാഹമെന്ന ഉടമ്പടിയില് ഒപ്പിട്ട് ഇവര് ഒന്നായത്.
സാധാരണയായി ബോളിവുഡ് താരങ്ങളുടെ വിവാഹച്ചടങ്ങുകളുടെ ആഡംബരമില്ലായിരുന്നുവെങ്കിലും സോനാക്ഷിയുടേയും സഹീറിന്റേയും വിവാഹവസ്ത്രങ്ങള് തരംഗമാകുകയാണ്.
വിവാഹത്തിന് വെള്ളനിറം തിരഞ്ഞെടുത്ത സോനാക്ഷി റിസപ്ഷനുവേണ്ടി തിരഞ്ഞെടുത്തത് ചുവപ്പുനിറത്തിലെ പട്ടുസാരിയായിരുന്നു. പരമ്പരാഗത ഡിസൈന് സാരിയും അതേ നിറത്തിലുള്ള ബ്ലൗസും പച്ചയും ചുവപ്പും കല്ലുകളുള്ള നെക്ലേസും മാച്ചിങ് ഇയർറിങ്സും നവവധുവായ സൊനാക്ഷിക്ക് കൂടുതല് ഭംഗിയേകി. ചുവന്ന പൊട്ടും സിന്ദൂരരേഖയിലെ ചുവന്നനിറത്തിലെ കുങ്കുമവും സോനാക്ഷിയ്ക്ക് രാജകീയപ്രൗഡിയും നല്കി. സഹീറാകട്ടെ വെള്ളനിറമുള്ള കോട്ടും സ്യൂട്ടുമണിഞ്ഞ് കൂടുതല് സുന്ദരനായിട്ടാണ് റിസപ്ഷനെത്തിയത്.
പ്രമുഖ താരങ്ങള് എത്തിയ റിസപ്ഷന് ഇരുവരും ചേർന്ന് നൃത്തം ചെയ്യുകയും ചെയ്തു. സല്മാൻ ഖാൻ, കജോള്, രേഖ, ഹുമ ഖുറേഷി, അദിതി റാവു ഹൈദരി, ആദിത്യ റോയ് കപൂർ, തബു, അനില് കപൂർ തുടങ്ങിയ താരങ്ങള് റിസപ്ഷനെത്തിയിരുന്നു.
വിവാഹച്ചടങ്ങിന് ഓഫ് വൈറ്റ് നിറമുള്ള ചിക്കൻകാരി സാരിയില് എലെഗന്റ് ലുക്കിലെത്തിയ വധുവും വെള്ള ചിക്കൻകാരി കുർത്തയും ബോട്ടവും ധരിച്ചെത്തിയ വരനും ചടങ്ങിന് റോയല്ലുക്കിലാണ് ആരാധകരുടെ മനസ്സ് കവര്ന്നത്. വിവാഹച്ചടങ്ങിന്റെ ചിത്രങ്ങള് സോഷ്യല് മീഡിയയിലൂടെ വന്നതിനു പിന്നാലെ വിവാഹ റിസപ്ഷന് സോനാക്ഷിയും സഹീറും ധരിക്കുന്ന വസ്ത്രങ്ങളായിരുന്നു പല ആരാധകരും ചര്ച്ച ചെയ്തത്.
