ഡറാഡൂണ്: സ്ത്രീകളെപ്പോലെ വേഷമിട്ട് അടിവസ്ത്രങ്ങള് ഉള്പ്പെടെ അവരുടെ വസ്ത്രങ്ങള് ധരിച്ച് മേക്കപ്പും ചെയ്ത് സീനിയര് എയര്പ്പോര്ട്ട് അതോറിറ്റി ഉന്നതോദ്യോഗസ്ഥനെ ദുരൂഹമായ സാഹചര്യത്തില് തൂങ്ങിയ നിലയില് കണ്ടെത്തി. ഔദ്യോഗിക വസതിയില് സീലിംഗ് ഫാനില് തൂങ്ങിക്കിടക്കുന്ന നിലയില് കണ്ടെത്തുകയായിരുന്നു. സ്ത്രീകളുടേതായ അടിവസ്ത്രങ്ങള്, പൊട്ട്, ലിപ്സ്റ്റിക്, വളകള് എന്നിവയെല്ലാം ഇട്ട് സ്ത്രീകളുടെ വസ്ത്രവും ധരിച്ച നിലയിലാണ് മൃതദേഹം. ഔദ്യോഗിക വസതിയില് ഈ സമയത്ത് ഭാര്യ ഉണ്ടായിരുന്നില്ല.
ഇയാള്ക്കൊപ്പം വീട്ടില് ഉണ്ടായിരുന്ന രണ്ടു ബന്ധുക്കളും സഹപ്രവര്ത്തകരും മുറി തുറന്നു നോക്കിയപ്പോഴായിരുന്നു ഉദ്യോഗസ്ഥനെ തൂങ്ങിയ നിലയില് കണ്ടെത്തിയത്. ഉടന് ആശുപത്രിയില് പ്രവേശിപ്പിച്ചെങ്കിലും ഈ സമയത്ത് ഇയാള് മരണപ്പെട്ടിരുന്നു. മുറിയിലേക്ക് ബലം പ്രയോഗിച്ച് കൊണ്ടുപോയതിന്റെ ഒരു ലക്ഷണവുമില്ല. മുറി അകത്തു നിന്നും പൂട്ടിയ നിലയിലായിരുന്നു. മറ്റു ബലപ്രയോഗങ്ങളുടെ ലക്ഷണങ്ങളും ഉണ്ടായിരുന്നില്ല.
മരണമടയുന്ന രാത്രിയില് വീട്ടില് ഇയാള്ക്കൊപ്പം രണ്ടു ബന്ധുക്കള് ഉണ്ടായിരുന്നു. പിറ്റേന്ന് രാവിലെ ബന്ധുക്കളുമായി അടുത്തുള്ളവരെ കാണാന് പോകാനിരിക്കുകയായിരുന്നെന്ന് പോലീസ് പറഞ്ഞു. തലേദിവസം കാണാനെത്തിയ ബന്ധുക്കളെ രണ്ടുപേര്ക്കുമായി ഒരു മുറി നല്കിയ ശേഷം മറ്റൊരു മുറിയിലാണ് ഇയാള് ഉറങ്ങാന് പോയത്. ഞായറാഴ്ച മൂന്നുപേരും ഒരുമിച്ച് പുറത്തുപോയി അത്താഴവും കഴിച്ചിരുന്നു.
രാത്രി തിരിച്ചുവന്ന ശേഷം പിറ്റേന്ന് രാവിലെ സമീപത്തെ ഒരു മാന്തോപ്പ് സന്ദര്ശിക്കാന് പദ്ധതിയിട്ടിരുന്നു. എന്നാല് രാവിലെ ഉദ്യോഗസ്ഥന് എഴുന്നേല്ക്കാതിരുന്നതിനെ തുടര്ന്ന് ബന്ധുക്കളായവര് പല തവണ വിളിക്കുകയും പ്രതികരണം ഇല്ലാതെ വന്നപ്പോള് സമീപത്തുള്ള സഹപ്രവര്ത്തകരെ വിളിച്ചറിയിക്കുകയുമായിരുന്നു. വാതില് ബലംപ്രയോഗിച്ച് തുറന്നപ്പോഴാണ് ഒരു ദുപ്പട്ടയില് തൂങ്ങിയ നിലയില് കണ്ടെത്തിയത്.
