സുരേഷ് ഗോപിക്ക് ജന്മദിനാശംസകൾ നേർന്നുകൊണ്ട് നടി സരയു മോഹൻ. സരയുവിന്റെ ഭർത്താവും സനൽ വി. ദേവൻ സംവിധാനം ചെയ്യുന്ന വരാഹം സിനിമയിൽ നായകൻ ആണ് സുരേഷ് ഗോപി. സനൽ വി. ദേവൻ സംവിധാനം ചെയ്യുന്ന വരാഹം സിനിമയുടെ ടീസറും സുരേഷ് ഗോപിയുടെ പിറന്നാൾ ദിനത്തിനാണ് റിലീസ് ചെയ്തത്. പിന്നാലെയാണ് സരയുവിന്റെ ആശംസാപോസ്റ്റ്.
തീപ്പൊരി സംഭാഷണങ്ങൾ പറയുന്ന ഹീറോയോടുള്ള ഒരു കൊച്ചു പയ്യന്റെ ആരാധനയിൽ ആണ് തുടക്കമെന്ന് ഉറപ്പ്...ആ ആരാധന സിനിമയിലേക്ക് കൂടെ അടുക്കാൻ ഒരു വലിയ കാരണം തന്നെ ആയിരുന്നു...എന്റെ "സുരേഷ്ഗോപി" സിനിമകളും സനലിന്റെ "സുരേഷ്ഗോപി" സിനിമകളും രണ്ടാണ്... രണ്ട് ലോകമാണ് അത്...ഞാൻ ഇന്നും ഡെന്നിസിലും നരേന്ദ്രനിലും ഒരു പരിധി വരെ മേജർ ഉണ്ണികൃഷ്ണനിലും വട്ടംകറങ്ങുമ്പോൾ സുരേഷേട്ടന്റെ ഈ പിറന്നാളിന് സനൽ എന്ന സംവിധായകൻ സ്വന്തം നായകനെ പരിചയപെടുത്തുകയാണ്...
അടുത്ത് അറിയുമ്പോൾ, അറിയേണ്ടിയിരുന്നില്ല എന്ന് തോന്നുന്ന സിനിമ പൊയ്മുഖങ്ങൾക്കിടയിൽ അറിയുമ്പോൾ കൂടുതൽ സുന്ദരമാകുന്ന, മധുരങ്ങൾ സമ്മാനിക്കുന്ന, മനസ്സിൽ നിന്ന് വാക്കുകൾ പങ്കുവെയ്ക്കുന്ന ഞങ്ങളുടെ ഹീറോയ്ക്ക് ജന്മദിനാശംസകൾ- സരയു കുറിച്ചു.
'നീ ജെല്ലിക്കെട്ട് കണ്ടിട്ടുണ്ടോ ജെല്ലിക്കെട്ട്. കാളയുടെ ഊന്നിൽ പിടിച്ച് തൂങ്ങൂമ്പോൾ. അതു മണ്ണിൽ തല മുട്ടിച്ചൊരു പാച്ചിലുണ്ട്. കാളയുടെ തല താഴെ മുട്ടിന്ന് പിടിച്ചു കിടക്കുന്നവനു തോന്നണം. ആ നിമിഷം ശരിക്കും കാളയുണ്ടാക്കുന്നതാ... അവനെ കൊമ്പിൽ കോർത്തെടുക്കണം...' സുരേഷ് ഗോപിയുടെ ശബ്ദത്തിലുള്ള പ്രതികാരം നിറഞ്ഞ വാക്കുകളോടെയാണ് വരാഹത്തിന്റെ ടീസർ പുറത്തുവന്നത്.
നവ്യ നായർ, പ്രാഞ്ചി ടെഹ് ലാൻ, ശ്രീജിത്ത് രവി, സന്തോഷ് കീഴാറ്റൂർ, സാദ്ദിഖ്,സരയു തുടങ്ങിയവരാണ് മറ്റു പ്രമുഖ താരങ്ങൾ. മാവെറിക് മൂവീസ് പ്രൈവറ്റ് ലിമിറ്റഡ്, സഞ്ജയ്പടിയൂർ എന്റർടൈൻമെന്റ്സുമായി സഹകരിച്ച് വിനീത് ജെയിൻ, സഞ്ജയ്പടിയൂർ എന്നിവർ ചേർന്ന് നിർമിക്കുന്ന സുരേഷ് ഗോപിയുടെ ഇരുന്നൂറ്റിയമ്പത്തിയേഴാമത്തെ ചിത്രമാണിത്.
