ന്യൂഡല്ഹി: അതിശക്തമായ ചൂടിന് പിന്നാലെ ഡല്ഹിയില് വീണ്ടും കാലാവസ്ഥാ മാറ്റം വന്നപ്പോള് കനത്ത മഴയില് നഗരത്തിന്റെ പലഭാഗങ്ങളിലും വെള്ളക്കെട്ട്. ഡല്ഹി വിമാനത്താവളത്തിലെ ടെര്മിനല്-1 ന്റെ മേല്ക്കൂരയുടെ ഒരു ഭാഗം കാറുകള്ക്ക് മുകളില് തകര്ന്നുവീണ് ആറ് പേര്ക്ക് പരിക്കേറ്റു. ടെര്മിനല് 1-ല് നിന്നുള്ള എല്ലാ പുറപ്പെടലും താല്ക്കാലികമായി നിര്ത്തിവച്ചിരിക്കുകയാണ്. സുരക്ഷാ നടപടിയെന്ന നിലയില് ചെക്ക്-ഇന് കൗണ്ടറുകള് അടച്ചതായി ഡല്ഹി വിമാനത്താവള വക്താവ് പറഞ്ഞു.
പുലര്ച്ചെ 5.30 ഓടെ ഡല്ഹി ഫയര് സര്വീസസില് (ഡിഎഫ്എസ്) റിപ്പോര്ട്ട് ചെയ്ത സംഭവത്തില് ക്യാബുകള് ഉള്പ്പെടെ നിരവധി വാഹനങ്ങള്ക്ക് കേടുപാടുകള് സംഭവിച്ചതായി അധികൃതര് അറിയിച്ചു. ഇന്ത്യയിലെ ഏറ്റവും തിരക്കേറിയ വിമാനത്താവളങ്ങളിലൊന്നായ ഇന്ദിരാഗാന്ധി ഇന്റര്നാഷണല് എയര്പോര്ട്ടിലെ ടെര്മിനലിന്റെ പിക്കപ്പ് ആന്ഡ് ഡ്രോപ്പ് ഏരിയയില് പാര്ക്ക് ചെയ്തിരുന്ന കാറുകള്ക്ക് കേടുപാടുകള് സംഭവിച്ചതായി റൂഫ് ഷീറ്റും സപ്പോര്ട്ട് ബീമുകളും തകര്ന്നതായി അധികൃതര് പറഞ്ഞു.
പരിക്കേറ്റ ആറ് പേരില് ഇരുമ്പ് ബീം വീണ കാറില് നിന്ന് ഒരാളെ രക്ഷപ്പെടുത്തി. പരിക്കേറ്റവരെ ആശുപത്രിയിലേക്ക് മാറ്റിയതായും അപകടത്തില്പ്പെട്ട വാഹനങ്ങളില് മറ്റാരും കുടുങ്ങിക്കിടക്കുന്നില്ലെന്ന് ഉറപ്പാക്കാന് തിരച്ചില് ആരംഭിച്ചതായും അധികൃതര് അറിയിച്ചു. ടെര്മിനല് 1 ന്റെ പഴയ ഡിപ്പാര്ച്ചര് ഫോര്കോര്ട്ടിലെ മേലാപ്പിന്റെ ഒരു ഭാഗം ഇന്ന് പുലര്ച്ചെ മുതല് കനത്ത മഴയില് തകര്ന്നതായി ഡല്ഹി വിമാനത്താവളം ഔദ്യോഗിക പ്രസ്താവനയില് അറിയിച്ചു.
ഡല്ഹിയുടെ ചില ഭാഗങ്ങളില് തുടര്ച്ചയായ രണ്ടാം ദിവസവും കനത്ത മഴയാണ്. കത്തുന്ന ചൂടില് നിന്ന് ആശ്വാസം പകരുന്ന മഴ, ദേശീയ തലസ്ഥാനത്തിന്റെ പല ഭാഗങ്ങളിലും വെള്ളക്കെട്ടിന് കാരണമായി. ഡല്ഹിയുടെ ചില ഭാഗങ്ങളില് റോഡുകള് വെള്ളത്തിനടിയിലായതും നീണ്ട ട്രാഫിക്കും കാണിക്കുന്ന അനേകം ദൃശ്യങ്ങള് സാമൂഹ്യമാധ്യമങ്ങളില് എത്തിയിട്ടുണ്ട്. വ്യാഴാഴ്ച പെയ്ത മഴയില് ഡല്ഹിയിലെ താപനില 35.4 ഡിഗ്രി സെല്ഷ്യസായി കുറഞ്ഞു. രാവിലെ 8:30 മുതല് വൈകിട്ട് 5:30 വരെ 5.2 മില്ലിമീറ്റര് മഴയാണ് നഗരത്തില് രേഖപ്പെടുത്തിയത്.
