കൊച്ചി: ഗുഡ്സ് ട്രെയിനിനു മുകളില് കയറിയ പതിനേഴു വയസുകാരന് റെയില്വേ വൈദ്യുതി ലൈനില്നിന്നു ഷോക്കേറ്റ് മരിച്ചു. പോണേക്കര കാടിപറമ്പത്ത് റോഡ് വൈമേലില് വീട്ടില് ജോസ് ആന്റണി-സൗമ്യ ദമ്പതികളുടെ ഏകമകന് ആന്റണി ജോസാണ് മരിച്ചത്.
ഇന്നലെ പകല് ഒന്നിന് പോണേക്കര സുബ്രഹ്മണ്യ ക്ഷേത്രത്തിനു സമീപമായിരുന്നു സംഭവം. ഒപ്പമുണ്ടായിരുന്ന കൂട്ടുകാരന്റെ പിറന്നാളിനു കേക്ക് വാങ്ങാനായി ഇറങ്ങിയതായിരുന്നു ആന്റണിയും സുഹൃത്തുക്കളുമെന്ന് എളമക്കര പോലീസ് പറഞ്ഞു. ട്രെയിനിന്റെ അടിയിലൂടെ കൂട്ടുകാര് ആദ്യം ട്രാക്കിനു മറുവശത്തേക്കു കടന്നു. മറുഭാഗത്തേക്ക് ഇറങ്ങാന് ആന്റണി ട്രെയിനിന്റെ വശത്തെ കോണിയിലൂടെ കയറിയതോടെ ഷോക്കേറ്റ് തെറിച്ചു വീഴുകയായിരുന്നു.
വീഴ്ചയുടെ ആഘാതത്തില് തലക്കും ഗുരുതരമായി പരുക്കേറ്റു. കൂട്ടുകാര് സ്റ്റേഷന് മാസ്റ്ററെ വിവരം അറിയിച്ചതിനെത്തുടര്ന്ന് ഉടന് 108 ആംബുലന്സില് സമീപത്തെ ആശുപത്രിയില് എത്തിച്ചു. എളമക്കര പോലീസും സ്ഥലത്തെത്തി. പ്രാഥമിക ചികിത്സയ്ക്കുശേഷം കൊച്ചിയിലെ സ്വകാര്യ ആശുപത്രിയിലേക്ക് മാറ്റി. രാത്രി 7.45 നു മരിച്ചു.
ബി.സി.എ ഒന്നാംവര്ഷ വിദ്യാര്ഥിയാണ്. സംഭവസമയം നാല് കൂട്ടുകാരാണുണ്ടായത്. തൃക്കാക്കര കെ.എം.എം കോളജിലാണ് ആന്റണി പഠിക്കുന്നത്. സ്വകാര്യ മെഡിക്കല് സ്ഥാപനത്തിലെ ജീവനക്കാരനാണ് അച്ഛന് ജോസ്. അമ്മ ലൂര്ദ് ആശുപത്രിയിലെ നേഴ്സാണ്.
