ഇന്ന് സോഷ്യല് മീഡിയയിലൂടെ തട്ടിപ്പിനിരയാകുന്നവരുടെ എണ്ണം വര്ദ്ധിച്ചുവരുകയാണ്. കാരണം എങ്ങനെയാണ് പറ്റിക്കപ്പെടുക എന്ന കാര്യത്തില് യാതൊരു വിധ ഉറപ്പും ഇല്ല. ആര് വേണമെങ്കിലും എപ്പോള് വേണമെങ്കിലും പറ്റിക്കപ്പെടാമെന്ന സ്ഥിതിയിലേക്ക് കാര്യങ്ങള് മാറിയിരിക്കുകയാണ്. കണ്ണടച്ച് തുറക്കുന്ന നേരം മതി കയ്യിലെ കാശ് പോവാന്. എത്ര സൂക്ഷിച്ചു എന്ന് പറഞ്ഞാലും ചിലപ്പോള് അറിയാതെ നമ്മളും ഈ പറ്റിക്കപ്പെടലിന്റെ ഇരകളായി മാറിയേക്കാം. ഇത്തരത്തില് അടുത്തിടെ തട്ടിപ്പ് നടത്തിയ രണ്ട് യുവാക്കളെ ഹരിയാനയില് അറസ്റ്റ് ചെയ്ത വാര്ത്തയാണ് ശ്രദ്ധ നേടുന്നത്.
തട്ടിപ്പ് പരസ്യങ്ങള് നല്കി ആളുകളെ പറ്റിക്കാന് ശ്രമിച്ചതിനെ തുടര്ന്നാണ് യുവാക്കള്ക്കെതിരെ കേസെടുത്തിരിക്കുന്നത്. എന്തായിരുന്നു ആ പരസ്യം എന്നല്ലേ? യുവതികളെ ഗര്ഭിണികളാക്കാന് പുരുഷന്മാരെ ആവശ്യമുണ്ട് എന്നായിരുന്നു പരസ്യം. അജാസ്, ഇര്ഷാന്ത് എന്നിവരെയാണ് പോലീസ് അറസ്റ്റ് ചെയ്തത്. കുട്ടികളെ വേണം എന്ന് ആഗ്രഹമുള്ള സ്ത്രീകള്ക്ക് കുട്ടികള് ജനിക്കുന്നതിനായി അവരെ ഗര്ഭിണികളാക്കാന് പുരുഷന്മാരെ ആവശ്യമുണ്ട് എന്നായിരുന്നു ഇവര് വിവിധ സോഷ്യല് മീഡിയകളില് പരസ്യം നല്കിയത്. ഗര്ഭിണിയാക്കേണ്ടുന്ന സ്ത്രീകളുടേത് എന്ന് പറഞ്ഞ് ചില സ്ത്രീകളുടെ ചിത്രങ്ങളും പരസ്യത്തിനൊപ്പം നല്കിയിരുന്നു. ഈ പരസ്യത്തില് ചിലര് വീണുപോവുകയും ചെയ്തു.
ഇങ്ങനെ വിളിച്ചയാളോട് ആദ്യം രജിസ്ട്രേഷന് ഫീസും പിന്നെ ഫയല് ചെയ്യാനും മറ്റുമായി എന്നു പറഞ്ഞും പണം കൈക്കലാക്കുകയായിരുന്നു. ശേഷം ഇവരെ ബ്ലോക്ക് ചെയ്തു. പിന്നാലെയാണ് പരാതിയുമായി ആളുകള് രംഗത്ത് വന്നത്. നാല് വ്യാജ ഫേസ്ബുക്ക് അക്കൗണ്ടുകളും നിരവധി വ്യാജ പരസ്യങ്ങളും അന്വേഷണത്തില് പോലീസ് കണ്ടെത്തി. ശനിയാഴ്ചയാണ് പ്രതികളെ അറസ്റ്റ് ചെയ്ത് കോടതിയില് ഹാജരാക്കിയത്. ഇവരെ ജുഡീഷ്യല് കസ്റ്റഡിയില് വിട്ടിരിക്കുകയാണത്രെ.
