ഹൈസ്കൂള് കാലഘട്ടത്തില് തന്റെ അര്ദ്ധസഹോദരനെയാണ് സ്നേഹിച്ചിരുന്നത് എന്നറിഞ്ഞ ഞെട്ടലിലാണ് 39 കാരിയായ വിക്ടോറിയ ഹില് എന്ന യുവതി. ഹൈസ്കൂള് കാലഘട്ടത്തില് സ്നേഹിച്ചിരുന്നത് തന്റെ സഹോദരനെയാണെന്ന് ഏകദേശം എട്ട് വര്ഷങ്ങള്ക്ക് ശേഷമാണ് യുവതി തിരിച്ചറിയുന്നത്. വിക്ടോറിയയുടെ അമ്മയുടെ ഫെര്ട്ടിലിറ്റി ഡോക്ടറാണ് ഇതിനെല്ലാം കാരണമായിത്തീര്ന്നത്. അയാള് തന്റെ രോഗികള്ക്ക് കുഞ്ഞുങ്ങളെ ഗര്ഭം ധരിക്കാനായി അയാളുടെ ബീജം ഉപയോഗിച്ചിരുന്നത്രേ. എന്നാല് അയാളുടെ രോഗികള് ആരും അറിഞ്ഞിരുന്നില്ല. 23 പേരെങ്കിലും ഇതുപോലെ ഡോ്ക്ടറുടെ മക്കളാണ് എന്ന് പറഞ്ഞ് മുന്നോട്ട് വന്നിരുന്നു. ഡിഎന്എ ടെസ്റ്റിലാണ് ഇവരെല്ലാം അമ്മയെ ചികിത്സിച്ച് ഡോക്ടറാണ് തന്റെ അച്ഛനെന്നും തന്റെ മാതാപിതാക്കളുടെ പറയാതെയാണ് അയാള് തന്റെ ബീജം ഉപയോഗിച്ചത് എന്നും അറിഞ്ഞത്.
ഒരു മെഡിക്കല് വിദ്യാര്ത്ഥിയുടെ ബീജം ഉപയോഗിക്കുമെന്ന് പറഞ്ഞാണ് ഈ ഡോക്ടര് വിക്ടോറിയയുടെ അമ്മ മറാലിയെ വഞ്ചിച്ചത്. പകരം സ്വന്തം ബീജമാണ് ഇയാള് ഉപയോഗിച്ചതത്രേ. 23 and Me ഉപയോഗിച്ച് ഡിഎന്എ ടെസ്റ്റ് നടത്തിയതിന് ശേഷമാണ് താന് അച്ഛാ എന്ന് വിളിച്ചിരുന്ന ആളല്ല തന്റെ ശരിക്കും അച്ഛനെന്ന് വിക്ടോറിയ തിരിച്ചറിഞ്ഞത്. ഡോക്ടറാണ് തന്റെ അച്ഛന്നെനും ആ ടെസ്റ്റില് വെളിപ്പെട്ടു. 20 വര്ഷങ്ങള്ക്ക് ശേഷം ഒരു ഹൈസ്കൂള് റീയൂണിയനില് വച്ച് അവള് തന്റെയീ അനുഭവത്തെ കുറിച്ച് വെളിപ്പെടുത്തിയിരുന്നു. അന്നാണ് അവളുടെ പഴയ കാമുകന് തനിക്കും സമാനമായ അനുഭവമുള്ളതായി തോന്നുന്നു എന്ന് പറഞ്ഞത്. ഇതുറപ്പിക്കുന്നതിനായി ഇയാള് ഡിഎന്എ ടെസ്റ്റും ചെയ്തു. അതിന്റെ ഫലം അയാളെ ഞെട്ടിച്ചു കളഞ്ഞു.
എന്നാല് കുറച്ചു ദിവസങ്ങള്ക്ക് ശേഷം വിക്ടോറിയയ്ക്ക് ഒരു മെസ്സേജ് വന്നു. അയച്ചത് പഴയ കാമുകനായിരുന്നു. നീ എന്റെ അര്ദ്ധ സഹോദരിയാണ് എന്നാണത്രേ അതിലെഴുതിയിരുന്നത്. താന് ആകെ ഞെട്ടിപ്പോയി. എന്ത് ചെയ്യണം എന്ന് അറിയാതെയായിപ്പോയി. താന് ശാരീരികമായും അവനുമായി അടുപ്പത്തിലായിരുന്നു. അത് തന്നെ തകര്ത്തുകളഞ്ഞു എന്ന് വിക്ടോറിയ പറഞ്ഞു. പഴയ കാമുകന് മാത്രമല്ല വേറെയും അര്ദ്ധസഹോദരങ്ങളെ അവള് തന്റെ ജീവിതത്തില് കണ്ടുമുട്ടി. ഇതൊക്കെയും അവളെ തീര്ത്തും അസ്വസ്ഥയാക്കി. ഡോക്ടര്ക്കെതിരെ കേസ് കൊടുക്കാനും അയാളെ കോടതിയുടെ മുന്നിലെത്തിക്കാനും വിക്ടോറിയ തീരുമാനിച്ചിരുന്നു. എന്നാല്, ഫെര്ട്ടിലിറ്റി ചികിത്സയുമായി ബന്ധപ്പെട്ട നിയമങ്ങളിലെ ന്യൂനതകളാണ് അവളെ അതില് നിന്നും പിന്തിരിപ്പിച്ചത്.
എന്നിരുന്നാലും, ഹില്ലിന്റെ അര്ദ്ധസഹോദരിമാരില് ഒരാളും സാമൂഹിക പ്രവര്ത്തകയുമായ ജാനിന് പിയേഴ്സണ് ഡോക്ടര്ക്കെതിരെ നടപടികളുമായി മുന്നോട്ട് പോകാനാഗ്രഹിക്കുന്നുവെന്ന് റിപ്പോര്ട്ടുകള് പറയുന്നു. ഡോക്ടറാണ് തന്റെ അച്ഛനെന്നും വേറെയും ഇതുപോലെ ഒരുപാട് കുട്ടികളുണ്ട് എന്നും അറിഞ്ഞപ്പോള് താനും അമ്മയും തകര്ന്നുപോയി എന്നാണ് അവള് സിഎന്എന്നിനോട് പറഞ്ഞത്.
