മുംബൈ: മരണാനന്തര ബഹുമതിയായി കീര്ത്തി ചക്ര ലഭിച്ച ക്യാപ്റ്റന് അന്ഷുമാന് സിങ്ങിന്റെ ഭാര്യ സ്മൃതി സിങ് എന്നു തെറ്റിദ്ധരിച്ചു പ്രശസ്ത ഫാഷന് ഇന്ഫ്ളുവന്സറും മലയാളിയുമായ രേഷ്മ സെബാസ്റ്റിയനെതിരേ സൈബര് ആക്രമണം. ഏതാനും ദിവസം മുമ്പാണു മരണാനന്തര ബഹുമതിയായി ഭര്ത്താവിന് ലഭിച്ച കീര്ത്തി ചക്ര സ്മൃതി ഏറ്റുവാങ്ങിയത്.
രേഷ്മ സെബാസ്റ്റിയന്റെ ഫാഷനെക്കുറിച്ചുള്ള പോസ്റ്റുകളാണ് ഒരു വിഭാഗത്തെ പ്രകോപിപ്പിച്ചത്. 'ഇത് സ്മൃതി സിങ്ങിന്റെ (ഇന്ത്യന് ആര്മി സൈനികന് ക്യാപ്റ്റന് അന്ഷുമാന് സിങ്ങിന്റെ വിധവ) പേജ് / ഇന്സ്റ്റഗ്രാം അക്കൗണ്ട് അല്ല. ആദ്യം പ്രൊഫൈല് വിശദാംശങ്ങള് വായിക്കുക. തെറ്റായ വിവരങ്ങളും വിദ്വേഷ കമന്റുകളും പ്രചരിപ്പിക്കുന്നതില്നിന്ന് ദയവായി വിട്ടുനില്ക്കുക'- രേഷ്മ കുറിച്ചു.
ആര്മി ഓഫീസറുടെ ഭാര്യയെ ട്രോളുന്ന ഒരാളുടെ ഫെയ്സ്ബുക്ക് പോസ്റ്റിന്റെ സ്ക്രീന്ഷോട്ടും അവര് പങ്കുവച്ചിട്ടുണ്ട്. 'സ്മൃതി സിങ്ങിനെക്കുറിച്ച് തെറ്റായ വിവരങ്ങള് പ്രചരിപ്പിക്കാന് എന്റെ ഐഡന്റിറ്റി ഉപയോഗിച്ചു. ഞങ്ങള് നിയമനടപടികളുമായി മുന്നോട്ട് പോകും'- അവര് വ്യക്തമാക്കി. ഭര്ത്താവിനും മകള്ക്കുമൊപ്പം ജര്മ്മനിയിലാണു രേഷ്മ താമസിക്കുന്നത്. ഇപ്പോള് കേരളത്തിലുണ്ട്.
