14 വർഷം മുമ്പ് ഇതുപോലൊരു ജൂലൈ 16 നാണ് മലയാള സിനിമയിലേക്ക് അഞ്ച് താരങ്ങളും ഒരു സംവിധായകനും ഒരു ക്ലബും വെള്ളിത്തിരയ്ക്ക് പരിചിതമായി മാറിയത്. സൂപ്പര് ഹിറ്റായി മാറിയ മലർവാടി ആർട്സ് ക്ലബ്ബ് എന്ന സിനിമയുടെ സംവിധാനവും രചനയും വിനീത് ശ്രീനിവാസനായിരുന്നു. അഭിനേതാക്കളായി എത്തിയത് നിവിൻ പോളിയും, അജു വർഗീസും അടക്കം നാലു കൂട്ടുകാരായിരുന്നു. ഒരുപാട് ഹിറ്റുകൾ സൃഷ്ടിച്ച വിനീതിന്റെ ആദ്യ സംവിധാന സംരഭവും മലർവാടിയായിരുന്നു. എല്ലാ വര്ഷവും ഈ സിനിമയുടെ വാര്ഷികം ആഘോഷിക്കുന്നതില് മുന്പന്തിയിലുള്ളത് അജു വര്ഗീസാണ്.
ഇപ്പോഴിതാ സംവിധായകന് അല്ഫോന്സ് പുത്രനൊപ്പമുള്ള ചിത്രം പങ്കിട്ട് മലർവാടി ആർട്സ് ക്ലബ്ബിന്റെ വാര്ഷികത്തിന്റെ സന്തോഷം പങ്കിടുകയാണ് അജു വര്ഗീസ്. ‘‘മലർവാടി ഇറങ്ങിയ ദിവസം തന്നെ മദ്രാസിലെ വീഥിയിൽ യാദൃച്ഛികമായി നടന്ന ഒരു കൂടിക്കാഴ്ച...പതിവുപോലെ ചാൻസും ചോദിച്ചു...’’ എന്ന് കുറിച്ചാണ് അല്ഫോന്സ് പുത്രനൊപ്പമുള്ള ചിത്രം പങ്കിട്ട് അജു വര്ഗീസ് കുറിച്ചത്.
