ന്യൂഡല്ഹി: ബജറ്റ് പ്രസംഗത്തില് എല്ലാ സംസ്ഥാനങ്ങളുടെയും പേര് നല്കാനാവില്ലെന്ന് പ്രതിപക്ഷത്തിനെ തിരിച്ചടിച്ച് ധനമന്ത്രി നിര്മ്മല സീതാരാമന്. ബജറ്റ് വിഹിതത്തില് വിവേചനം കാണിക്കുന്നുവെന്ന പ്രതിപക്ഷത്തിന്റെ ആരോപണങ്ങളെ തളളി. ബജറ്റ് 2024 അവതരിപ്പിച്ചതിന് തൊട്ടുപിന്നാലെ പ്രതിപക്ഷ പാര്ട്ടികള് ഭരിക്കുന്ന സംസ്ഥാനങ്ങളോട് വിവേചനം കാട്ടിയെന്ന് ആരോപിച്ച് പാര്ലമെന്റിന്റെ ഇരുസഭകളിലും പ്രതിപക്ഷം രംഗത്ത് വരികയും വാക്കൗട്ട് നടത്തുകയും ചെയ്തിരുന്നു. ഇതിന് പിന്നാലെയായിരുന്നു ധനമന്ത്രിയുടെ പ്രതികരണവും.
ഇന്നലെ ബജറ്റിനെക്കുറിച്ച് കേട്ട കാര്യങ്ങളെക്കുറിച്ച് അഭിപ്രായം പറഞ്ഞ പ്രതിപക്ഷം, പ്രത്യേകിച്ച് മുതിര്ന്ന നേതാവ് മല്ലികാര്ജുന് ഖാര്ഗെ എഴുന്നേറ്റുനിന്നത് നിര്ഭാഗ്യകരമാണ്. ജനാധിപത്യത്തിന്റെ ബഹുമാനാര്ത്ഥം, പ്രതിപക്ഷമെങ്കിലും എനിക്ക് പറയാനുള്ള മറുപടി കേള്ക്കാന് ഇവിടെ നില്ക്കാമായിരുന്നു എന്നും പറഞ്ഞു. ഞാന് പല സംസ്ഥാനങ്ങളുടെയും പേര് പറഞ്ഞിട്ടില്ലെന്നും രണ്ട് സംസ്ഥാനങ്ങളെ കുറിച്ച് മാത്രമാണ് സംസാരിച്ചതെന്നുമാണ് മല്ലികാര്ജ്ജുന ഖാര്ഗേയുടെ ആരോപണം. എന്നാല് ഈ രാജ്യത്ത് വളരെക്കാലമായി അധികാരത്തില് ഇരുന്നവരാണ് കോണ്ഗ്രസ് പാര്ട്ടി. നിരവധി വ്യത്യസ്ത ബജറ്റുകള് അവതരിപ്പിക്കുകയും ചെയ്തിട്ടുണ്ട്. എല്ലാ ബജറ്റിലും ഈ രാജ്യത്തെ എല്ലാ സംസ്ഥാനങ്ങളുടെയും പേര് നല്കാന് നിങ്ങള്ക്ക് അവസരം ലഭിക്കില്ലെന്ന് തനിക്ക് വ്യക്തമായി അറിയാമെന്നും പറഞ്ഞു.
ഫെബ്രുവരി ഒന്നിനോ ഇന്നലെയോ നടത്തിയ ബജറ്റ് പ്രസംഗത്തില് ഒരു പരാമര്ശവും കാണാത്ത മഹാരാഷ്ട്രയുടെ ഉദാഹരണവും ധനമന്ത്രി എടുത്തുകാട്ടി. പ്രധാനമന്ത്രി മോദിയുടെ നേതൃത്വത്തില് മന്ത്രിസഭയാണ് മഹാരാഷ്ട്രയിലെ വധവനില് ഒരു വലിയ തുറമുഖം സ്ഥാപിക്കാന് തീരുമാനിച്ചത്. 76,000 കോടി രൂപ പ്രഖ്യാപിച്ചു. പേര് പരാമര്ശിക്കാത്തതിനാല് മഹാരാഷ്ട്ര അവഗണിക്കപ്പെട്ടുവോ എന്നും ചോദിച്ചു. പ്രസംഗത്തില് ഒരു പ്രത്യേക സംസ്ഥാനത്തെ പരാമര്ശിക്കുന്നില്ലെങ്കില്, അതിനര്ത്ഥം ഇന്ത്യന് സര്ക്കാരിന്റെ പദ്ധതികള്, ഇന്ത്യാ ഗവണ്മെന്റിന്റെ പരിപാടികള്, നമുക്ക് ലഭിക്കുന്ന ബാഹ്യ സഹായങ്ങള് ഈ സംസ്ഥാനങ്ങളിലേക്ക് പോകുന്നില്ല എന്നാണോയെന്നും ചോദിച്ചു.
എന്ഡിഎ ഇതര കക്ഷികള് ഭരിക്കുന്ന സംസ്ഥാനങ്ങള്ക്ക് ഒന്നും നല്കുന്നില്ലെന്ന ധാരണ ജനങ്ങളില് എത്തിക്കാനുള്ള കോണ്ഗ്രസിന്റെ നേതൃത്വത്തിലുള്ള പ്രതിപക്ഷത്തിന്റെ ബോധപൂര്വമായ ശ്രമമാണിതെന്നും അവര് ആരോപിച്ചു.
