തിരുവല്ല: നഗരത്തിലെ ബാര് പരിസരത്തുണ്ടായ അടിപിടിക്കിടെ യുവാവിന്റെ വൃഷണം കടിച്ചുപറിച്ച സംഭവത്തില് കസ്റ്റഡിയിലിരുന്ന പ്രതി തിരുവല്ല പോലീസ് സ്റ്റേഷനില്നിന്നു രക്ഷപ്പെട്ടു. കുറ്റപ്പുഴ പാപ്പിനിവേലില് വീട്ടില് സുബിന് അലക്സാണ്ടര് (28) ആണ് കഴിഞ്ഞ ആറിനു രാത്രി 10 നു സ്റ്റേഷനില്നിന്നു രക്ഷപ്പെട്ടത്. കുറ്റപ്പുഴ അമ്പാടി വീട്ടില് കണ്ണന് എന്നു വിളിക്കുന്ന സവീഷ് സോമനെ (35) ആക്രമിച്ച സംഭവത്തിലാണ് സുബിന് ആറിനു വൈകിട്ടോടെ പോലീസിന്റെ പിടിയിലായത്.
തിരുവല്ല നഗരത്തിലെ ബാര് പരിസരത്തു വൈകിട്ട് ആറോടെയായിരുന്നു കേസിനാസ്പദമായ സംഭവം. ബാറില്നിന്നു മദ്യപിച്ചിറങ്ങിയ സുബിന് മറ്റാരെയോ ഫോണ് ചെയ്യാനായി സവീഷിന്റെ മൊബൈല് ഫോണ് വാങ്ങി. തുടര്ന്നു മൊബൈല് ഫോണ് തിരികെനല്കണമെങ്കില് 3000 രൂപ തനിക്കു തരണമെന്നു സുബിന് ആവശ്യപ്പെട്ടു. ഇതേത്തുടര്ന്നുണ്ടായ തര്ക്കമാണ് അടിപിടിയില് കലാശിച്ചത്.
വൃഷണത്തില് ഗുരുതര പരുക്കേറ്റ സവീഷിനെ തിരുവല്ല താലൂക്ക് ആശുപത്രിയിലെത്തിച്ച് അടിയന്തര ശസ്ത്രക്രിയയ്ക്കു വിധേയമാക്കി. ബാര് പരിസരത്തുനിന്നു കസ്റ്റഡിയിലെടുത്ത സുബിനെ തിരുവല്ല താലൂക്ക് ആശുപത്രിയില് വൈദ്യപരിശോധനയ്ക്കു വിധേയനാക്കിയിരുന്നു.
കേസെടുക്കുന്നതിനു മുമ്പാണു പ്രതി രക്ഷപ്പെട്ടതെന്ന് എസ്.എച്ച്.ഒ: ബി.കെ. സുനില് കൃഷ്ണന് പറഞ്ഞു. രാത്രി പത്തരയോടെയാണ് സവീഷിന്റെ പരാതിയില് എഫ്.ഐ.ആര്. രജിസ്റ്റര് ചെയ്തതെന്ന് അദ്ദേഹം പറഞ്ഞു.
