തിരുവനന്തപുരം: കഴക്കൂട്ടത്തുനിന്ന് കാണാതായ പെണ്കുട്ടിക്കായി തെരച്ചില് ഊര്ജിതം. കുട്ടിയെ കാണാതായിട്ട് 24 മണിക്കൂര് പിന്നിട്ടു. കുട്ടി കന്യാകുമാരിയില് തന്നെയുണ്ടെന്നാണ് പ്രാഥമിക നിഗമനം. കന്യാകുമാരിയില് വ്യാപകമായ തെരച്ചില് നടത്തുകയാണ് കേരള പൊലീസ്.
ഇന്നലെ ഉച്ചയ്ക്ക് 1.06 ന് തിരുവനന്തപുരം സെന്ട്രല് റെയില്വേ സ്റ്റേഷനില് നിന്ന് പുറപ്പെട്ട ബാംഗ്ലൂര് കന്യാകുമാരി ട്രെയിനില് കുട്ടി യാത്ര ചെയ്യുന്ന നിര്ണായക ദൃശ്യം പൊലീസിന് കിട്ടി. കുട്ടിയെ കണ്ട് സംശയം തോന്നിയ ഒരു വിദ്യാര്ത്ഥിനി പകര്ത്തിയ ചിത്രം നിര്ണ്ണായകമായി.
ഒരു മാസമായി കഴക്കൂട്ടത്ത് താമസിക്കുകയായിരുന്നു കുട്ടിയുടെ കുടുംബം. അമ്മയും അച്ഛനും മൂന്ന് മക്കളുമാണ് കുടുംബത്തിലുള്ളത്. അച്ഛന് അന്വര് ഹുസ്സൈന് കേരളത്തില് കൂലിപ്പണി ചെയ്യുകയായിരുന്നു. അമ്മ ഫാര്വീന് ബീഗം. സഹോദരിമാരുമായി വഴക്കുണ്ടാക്കിയതിന് അമ്മ ഇന്നലെ രാവിലെ തസ്മിദിനേ ശകാരിച്ചിരുന്നു. അച്ഛനും അമ്മയും ജോലിക്ക് പോയതിന് പിന്നാലെയാണ് കുട്ടി വീടുവിട്ടിറങ്ങിയത്.
കുട്ടിയുടെ ചെന്നൈയിലുള്ള സഹോദരനില് നിന്ന് പൊലീസ് വിവരങ്ങള് തേടി. കുട്ടി ചെന്നൈയിലുള്ള സഹോദരനെ ബന്ധപ്പെട്ടിട്ടുണ്ടോ എന്ന് പരിശോധിക്കാനാണ് ഫോണ് വിവരങ്ങള് പൊലീസ് തേടിയത്. നെയ്യാറ്റിന്കരയില് വെച്ച് പകര്ത്തിയ ചിത്രം തെരച്ചിലിന് നിര്ണായകമായി.
സ്റ്റേഷനിലെ സിസിടിവി ദൃശ്യങ്ങള് അടക്കം പൊലീസ് പരിശോധിച്ചു. തിരുവനന്തപുരം കഴക്കൂട്ടത്ത് നിന്ന് ഇന്നലെ രാവിലെ വീടുവിട്ടിറങ്ങിയ അസം സ്വദേശിയായ പതിമൂന്നുകാരി തസ്മിദ് തംസുമിനെ നാടാകെ അരിച്ചുപെറുക്കി തെരഞ്ഞിട്ടും ഇതുവരെ കണ്ടെത്താനായില്ല.
