ബോളിവുഡിന് ഏറെയിഷ്ടമുള്ള താരമായിരുന്നു ഋഷി കപൂര്. താരത്തിന്റെ മകനും ബോളിവുഡ് താരവുമായ രണ്ബീർ കപൂറും അഭിനേത്രിയായ ആലിയ ഭട്ടും തമ്മിലുള്ള വിവാഹവും പ്രണയവുമൊക്കെ ആരാധകര് ഏറെ ആസ്വദിച്ചതാണ്. ഇവരുടെ മകള് റാഹ കപൂർ ഇന്ന് ആരാധകർക്കും ഏറെ പ്രിയങ്കരിയാണ്. കപൂർ കണ്ണുകള് ലഭിച്ച പെണ്കുട്ടി എന്നാണ് സോഷ്യല് മീഡിയ റാഹയെ വിശേഷിപ്പിക്കുന്നത്. കപൂർ കുടുംബാംഗങ്ങളില് പലരിലും കണ്ടുവരുന്ന അല്പ്പം ഇളം നിറമുള്ള കണ്ണുകളാണ് റാഹയ്ക്കും കിട്ടിയിരിക്കുന്നത്. ഇളം നീല കണ്ണുകളായിരുന്നു രാജ് കപൂറിന്, കരീഷ്മ കപൂറിനും സമാനമായ ഇളം നീല കണ്ണുകള് ലഭിച്ചപ്പോള് കരീന കപൂറിന് കിട്ടിയത് ഇളം പച്ച കണ്ണുകളാണ്. രണ്ബീറിന്റെ പിതാവായ ഋഷി കപൂറിനും ഇളം നീല നിറമുള്ള കണ്ണുകളായിരുന്നു.
ഇപ്പോഴിതാ ഋഷി കപൂറിന്റെ മകൾ റിദ്ദിമ കപൂർ സാഹ്നി അച്ഛന്റെ 72-ാം ജന്മദിനത്തിൽ റാഹയുമായിട്ടുള്ള ഒരു മധുര കുറിപ്പും ത്രോബാക്ക് ചിത്രവും പങ്കിട്ടിരിക്കുകയാണ്. ആലിയയുടെയും രൺബീറിന്റെയും മകൾ രാഹാ കപൂർ ഋഷി കപൂറിന്റെ മിനി പതിപ്പാണെന്നാണ് റിദ്ദിമ ഇന്സ്റ്റഗ്രാം സ്റ്റോറിയിലൂടെ കുറിച്ചത്. “ഹാപ്പി ബർത്ത്ഡേ പപ്പാ. നിങ്ങളുടെ രണ്ട് പേരക്കുട്ടികളോടൊപ്പം നിങ്ങളുടെ പ്രത്യേക ദിനം ആഘോഷിക്കാൻ നിങ്ങൾ ഇവിടെ ഉണ്ടായിരുന്നെങ്കിൽ എന്ന് ഞാൻ എങ്ങനെ ആഗ്രഹിക്കുന്നു. നിങ്ങളുടെ ബന്ദാരി സാം വളർന്നു, കുഞ്ഞ് രാഹ ഏറ്റവും സുന്ദരിയാണ്- അവൾ നിങ്ങളാണ്. പപ്പാ, ഞങ്ങൾക്ക് പങ്കുവെക്കാൻ കിട്ടിയ ഓർമ്മകളെ ഞാൻ എന്നും നെഞ്ചേറ്റും. ഞങ്ങൾ നിങ്ങളെ വളരെയധികം മിസ് ചെയ്യുന്നു, നിങ്ങളോടുള്ള ഞങ്ങളുടെ സ്നേഹം ഓരോ ദിവസം കഴിയുന്തോറും ആഴത്തിലാകുന്നു ...’’ എന്നാണ് അച്ഛനൊപ്പമുള്ള മനോഹരമായ ചിത്രത്തിന്റെ കൂടെ റിദ്ദിമ കുറിച്ചത്.
