തൃശൂര്: തൃശൂര് റെയില്വേ സ്റ്റേഷനിലെ മേല്പ്പാലത്തില് നവജാതശിശുവിന്റെ മൃതദേഹം കണ്ടെത്തി. ഉപേക്ഷിക്കപ്പെട്ട നിലയില് ബാഗിനുള്ളിലാണ് മൃതദേഹം കണ്ടെത്തിയത്. ഇന്നലെ രാവിലെ 8.45-ഓടെയാണ് സുരക്ഷാജീവനക്കാര് സംശയകരമായ നിലയില് ബാഗ് കണ്ടെത്തിയത്.
രണ്ടു ദിവസം പ്രായമുള്ള ആണ്കുഞ്ഞിന്റെ മൃതദേഹമാണ് ബാഗിലുണ്ടായിരുന്നത്. റെയില്വേ സ്റ്റേഷനിലെ ഒന്നും രണ്ടും പ്ലാറ്റ്ഫോമുകള് തമ്മില് ബന്ധിപ്പിക്കുന്ന മേല്പ്പാലത്തിലാണ് മൃതദേഹം കണ്ടെത്തിയത്. തുണിയില് പൊതിഞ്ഞ് ബാഗിലാക്കി കൊണ്ടുവന്ന് ഉപേക്ഷിച്ച നിലയിലായിരുന്നു മൃതദേഹം. സി.സി. ടിവി ദൃശ്യങ്ങള് ഉള്പ്പെടെ കേന്ദ്രീകരിച്ച് പോലീസ് അന്വേഷണം ഉൗര്ജിതമാക്കി.
അതിനിടെ ഒന്നാമത്തെ പ്ലാറ്റ്ഫോമിലെ വേസ്റ്റ് ബിന്നില്നിന്ന് രക്തക്കറ പുരണ്ട സ്ത്രീയുടെ വസ്ത്രങ്ങള് ലഭിച്ചു. ഇതോടെ ഇൗ വേസ്റ്റ് ബിന്നിന് സമീപത്തെ സി.സി. ടിവി ദൃശ്യങ്ങളും പോലീസ് പരിശോധിച്ചു. എട്ടുമാസം വളര്ച്ചയെത്തിയ കുഞ്ഞിനെ പ്രസവിച്ചത് ആശുപത്രിയിലാണെന്നാണ് നിഗമനം. കുഞ്ഞിനെ പുതപ്പിച്ചിരുന്നത് ആശുപത്രിയിലെ തുണിയാണെന്നും സംശയമുണ്ട്.
ഇതോടെ തൃശൂര് നഗരത്തിലെ ആശുപത്രികളിലേക്കും അനേ്വഷണം വ്യാപിപ്പിച്ചു. അതേസമയം, പോസ്റ്റ്മോര്ട്ടത്തിനു ശേഷമേ, കുഞ്ഞിനെ കൊലപ്പെടുത്തിയതിനു ശേഷം ഉപേക്ഷിച്ചതാണോ അതോ ജീവനോടെ ഉപേക്ഷിച്ചതിനു ശേഷം പിന്നീട് മരണപ്പെട്ടതാണോ എന്നതുള്പ്പെടെയുള്ള കാര്യങ്ങളില് വ്യക്തത വരൂവെന്ന് പോലീസ് അറിയിച്ചു. സംഭവത്തില് റെയില്വേ പോലീസും അനേ്വഷണം നടത്തുന്നുണ്ട്.
