വന്യമൃഗങ്ങള് തമ്മിലുള്ള പോരാട്ടത്തിന്റെ ഒട്ടനവധി വീഡിയോകളാണ് ദിവസവും സോഷ്യല് മീഡിയയിലൂടെ വൈറലായിക്കൊണ്ടിരിക്കുന്നത്. ഇപ്പോഴിതാ അത്തരത്തിലൊരു അതിശയിപ്പിക്കുന്ന അതിജീവന പോരാട്ടം കണ്ട സമൂഹ മാധ്യമ ഉപയോക്താക്കള് കാട്ടിലെ പുതിയ രാജാവായി ജാഗ്വാറിനെ തിരഞ്ഞെടുത്തിരിക്കുകയാണ്. കരയിലും വെള്ളത്തിലും ഒരു പോലെ പോരാടാനുള്ള ജാഗ്വറിന്റെ കഴിവിനെ സമൂഹ മാധ്യമ ഉപയോക്താക്കള് ഏറ്റെടുത്തു. മികച്ച അതിജീവന വീഡിയോ എന്നാണ് സമൂഹ മാധ്യമ ഉപയോക്താക്കള് എഴുതിയത്. കളിയില് എന്നും മുന്നില് നില്ക്കുന്നവനാണ് യാഥാര്ത്ഥ ഗെയിം ചെയ്ഞ്ചര് എന്ന് സമൂഹ മാധ്യമ ഉപയോക്താക്കള് എഴുതി.
ശാന്തമായ ഒരു നദിയില് അധികമായി ഒരു ഓളം പോലും ഉയര്ത്താതെ ജാഗ്രതയോടെ നീന്തുവരുന്ന ഒരു ജാഗ്വറില് നിന്നാണ് വീഡിയോ തുടങ്ങുന്നത്. ജാഗ്വര് നദീ തീരത്തെത്താറാകുമ്പോള് ഒരു മുതല ജാഗ്വറിന് നേരെ നീണ്ടിയടുക്കുന്നു. പിന്നാലെ വെള്ളത്തിനടിയില് ഇരു വേട്ടക്കാരും തമ്മില് പൊരിഞ്ഞ പോരാട്ടം. ആരാണ് അതിജീവിച്ചതെന്ന ആകാംക്ഷ വീഡിയോ എടുക്കുന്നരും പങ്കുവയ്ക്കുന്നു. ഇതിനിടെ വെള്ളത്തില് നിന്നും മുതലയുടെ കഴുത്തിന് കടിച്ച് പിടിച്ച് ജാഗ്വര് കയറിവരുന്നു. മുതലയുടെ അവസാന ശ്വാസവും നിലയ്ക്കാനായി കടി വിടാതെ അവന് ആ നദിക്കരയില് കാത്ത് ചെയ്തിരിക്കുന്ന സമയത്ത് വീഡിയോ അവസാനിക്കുന്നു. ജാഗ്വാര് ഇക്കോളജിക്കല് റിസര്വ് സന്ദര്ശിച്ച മൈക്കിള് എന്നയാളാണ് വീഡിയോ ചിത്രീകരിച്ചത്.
വീഡിയോ ലോകമെങ്ങുമുള്ള വന്യജീവി ആരാധകരുടെ ശ്രദ്ധ നേടി. 'വേട്ടക്കാര് പിന്നീട് വേട്ടയാടപ്പെട്ടു.' ഒരു കാഴ്ചക്കാരനെഴുതി. വെള്ളത്തിലുള്ള ജാഗ്വറിന്റെ കഴിവില് അതിശയിച്ച ഒരു കാഴ്ചക്കാരന് ജാഗ്വറിനെ 'നേവി സീല്' എന്നായിരുന്നു അഭിസംബോധന ചെയ്തത്. ഏകാന്തരായ മൃഗങ്ങള്ക്ക് വലിയ ഇരകളെ പിടികൂടാന് കഴിയുമെന്ന് മറ്റ് ചിലര് കുറിച്ചു. അതേസമയം മുതല കുഞ്ഞായിരുന്നെന്നും അവന്റെ പോരാട്ടം ചെറുപ്പത്തിലെ അവസാനിച്ചെന്നും മറ്റ് ചിലരെഴുതി. എന്നാല്, എന്തും തകര്ക്കാന് ജാഗ്വറിന്റെ ഒരു കടിക്ക് കഴിയുമെന്ന് മറ്റ് ചിലര് ചൂണ്ടിക്കാട്ടി.
