വ്യത്യസ്തത ഉണര്ത്തുന്ന ഒട്ടനവധി വീഡിയോകളും വാര്ത്തകളുമാണ് ദിവസവും സോഷ്യല് മീഡിയയിലൂടെ വൈറലായിക്കൊണ്ടിരിക്കുന്നത്. ഇവയില് ഫാഷന് ലോകുമായി ബന്ധപ്പെട്ട വീഡിയോകള്ക്ക് കാഴ്ചക്കാര് ഏറെയാണ്. ഇത്തരത്തില് പുതിയ വസ്ത്രങ്ങളോ ആഭരണങ്ങളോ മറ്റ് ആഡംബര വസ്തുക്കളോ വിപണിയിലേക്ക് ഇറക്കുന്നതിന് മുമ്പായി ഉത്പന്നങ്ങളെ പരിചയപ്പെടുത്തുന്ന നിരവധി ക്യാറ്റ്വാക്കുകള് നാം കണ്ടിട്ടുണ്ട്. പുതിയ വസ്ത്രങ്ങളും മറ്റ് ഉപകരണങ്ങളും അണിഞ്ഞ് യുവതീ യുവാക്കള് പ്രത്യേകം സജ്ജീകരിച്ച വേദിയില് പ്രത്യേക പാദചലനങ്ങളോടെ നടക്കുന്നതാണ് ക്യാറ്റ് വാക്ക്. സമാനമായ ഒരു ക്യാറ്റ് വാക്ക് സമൂഹ മാധ്യമ ഉപയോക്താക്കളുടെ ശ്രദ്ധ പിടിച്ച് പറ്റി. ഗോ ഫിഷിംഗ് ഇന്തോനേഷ്യ എന്ന് സമൂഹ മാധ്യമ അക്കൌണ്ടിലൂടെ പങ്കുവയ്ക്കപ്പെട്ട ഒരു വീഡിയോയായിരുന്നു അത്.
തിങ്കളാഴ്ച ഫാഷന് ക്രേസി എന്ന കുറിപ്പോടെ പങ്കുവച്ച വീഡിയോയില് ഒരു യുവാവ് ചാള / മത്തി കോര്ത്തെടുത്ത ഒരു വസ്ത്രം ധരിച്ച് തെരുവിലൂടെ നടക്കുന്നതായിരുന്നു ഉണ്ടായിരുന്നത്. നൂറുകണക്കിന് മത്സ്യത്തെ നേര്ത്ത കമ്പിയില് കോര്ത്താണ് മത്സ്യ വസ്ത്രം ഉണ്ടാക്കിയിരിക്കുന്നത്. കഴുത്തില് മത്സ്യങ്ങള് കോര്ത്ത് നിര്മ്മിച്ച ഒരു മാലയും ഇയാള് ധരിച്ചിട്ടുണ്ട്. അതേസമയം നെഞ്ച് മുതല് മുട്ടോളം എത്തുന്ന തരത്തിലാണ് കമ്പിയില് മത്തി കോര്ത്തിരുന്നത്. ഒരോ അടുക്കുകളായി അടുക്കി വച്ച നിലയിലായിരുന്നു മത്തി കൊണ്ടുള്ള വസ്ത്രം. മോഡലിന്റെ കൈയില് വലിയൊരു മത്സ്യത്തെ കമ്പിയില് കോര്ത്ത് ഒരു ഹാന്റ്ബാഗ് പോലെ പിടിച്ചിരുന്നു.
നിമിഷ നേരങ്ങള്ക്കുള്ളില് വൈറലായ വീഡിയോ ഇതിനോടകം 51 ലക്ഷത്തില്പരം ആളുകളാണ് കണ്ടിരിക്കുന്നത്. നിരവധി പേര് വീഡിയോയ്ക്ക് താഴെ കുറിപ്പുകളെഴുതാനെത്തി. 'ഇവര് ബാലന്സിയാഗയ്ക്ക് പുതിയ ഫാഷന് ആശയങ്ങള് നല്കുന്നു.' എന്നായിരുന്നു ഒരാള് എഴുതിയത്. ''ഈ അസംബന്ധങ്ങളുമായി നിങ്ങള് എവിടേക്കാണ് പോകുന്നത്? ഒരു ബോധവുമില്ലാത്ത ആളുകള്. ''മറ്റൊരാള് തന്റെ ദേഷ്യം പ്രകടിപ്പിച്ചു. ''അതിനു വേണ്ടി എല്ലാ മത്സ്യങ്ങളെയും കൊന്നോ? ' എന്നായിരുന്നു മറ്റൊരാളുടെ സംശയം. 'എന്തായാലും അവിടെ പൂച്ചകളില്ലെന്ന് തോന്നുന്നു ' മറ്റൊരു കാഴ്ചക്കാരന് തമാശയായി എഴുതി. അതേസമയം ഫിഷ്, ഫാഷന് എന്നീ രണ്ട് വാക്കുകള് കൂട്ടിചേര്ത്ത് 'ഫിഷന്' എന്ന പുതിയൊരു വാക്ക് തന്നെ വീഡിയോയ്ക്ക് താഴെ ചിലര് എഴുതി.
