ബോളിവുഡിന്റെ പ്രിയ താരദമ്പതിമാരാണ് ആലിയ ഭട്ടും രണ്ബീര് കപൂറും. രണ്ടുപേരുടെയും പ്രണയവും വിവാഹവും മാതാപിതാക്കളായതുമൊക്കെ സോഷ്യല് മീഡിയ ഏറെ ആഘോഷിച്ചതാണ്. ജീവിതത്തിലെ എല്ലാ സന്തോഷങ്ങളും ആഘോഷങ്ങളും ആലിയ ആരാധകരുമായി പങ്കിടാറുള്ളത് സോഷ്യല് മീഡിയ വഴിയാണ്. പ്രണയവും വിവാഹവും അമ്മയായതുമൊക്കെ ആലിയ അതിലൂടെ പങ്കിട്ടിട്ടുണ്ട്.
ഇപ്പോഴിതാ രണ്ബീറിന്റെ 42-ാം ജന്മദിനം ചിത്രങ്ങളിലൂടെ ആഘോഷമാക്കുകയാണ് ആലിയ. തങ്ങളുടെ ജീവിതത്തിലെ ഏറ്റവും അമൂല്യമായ നിമിഷങ്ങള് കോര്ത്തിണക്കിയ ചിത്രങ്ങളും ഹൃദയസ്പര്ശിയായ കുറിപ്പും പങ്കിട്ടാണ് ആലിയ രണ്ബീറിന് ജന്മദിനാശംസകള് കുറിച്ചിരിക്കുന്നത്.
‘‘ചിലപ്പോൾ നിങ്ങൾക്ക് വേണ്ടത് ഒരു ഭീമാകാരമായ ആലിംഗനം മാത്രമാണ്, നിങ്ങൾ ജീവിതം ഒന്നായി തോന്നിപ്പിക്കുന്നതാണത്...ഹാപ്പി ബര്ത്ത്ഡേ ബേബി...’’ എന്ന ക്യാപ്ഷനും നല്കിയാണ് ആലിയ ഭട്ട് താനും രണ്ബീറും അവരുടെ മകൾ റാഹയും ഉൾപ്പെടുന്ന ഹൃദയസ്പർശിയായ ഫോട്ടോകൾ പങ്കിട്ടിരിക്കുന്നത്.
അവർ മൂവരും ഒരു മരത്തെ കെട്ടിപ്പിടിക്കുന്നതാണ് ആലിയ പങ്കിട്ടിരിക്കുന്ന ആദ്യ ചിത്രം. അടുത്ത ചിത്രത്തിൽ, രൺബീർ തന്റെ കൈകളിൽ റാഹയെ എടുത്തു കൊണ്ട് നടക്കുന്നത് കാണാം. പാരീസിലെ അവരുടെ അവധിക്കാലത്തെടുത്ത ചിത്രമായിരിക്കുമത്. മറ്റൊരു ചിത്രത്തില് രൺബീർ ആലിയയെ പിടിച്ചിരിക്കുന്നതും കാണാം.
രൺബീറിന്റെ ബ്രാൻഡിന്റെ ഒരു ടീസർ പങ്കിട്ടാണ് അമ്മ നീതു കപൂറിന്റെ ആശംസ. 2022 ലെ ബ്രഹ്മാസ്ത്രയിലെ ഒരു സീനാണെന്ന് തോന്നിപ്പിക്കുന്ന തരത്തിലുള്ള ടീസറാണത്. ‘‘മകൻ, സഹോദരൻ, ഭർത്താവ്, അച്ഛൻ, ഇപ്പോൾ സ്ഥാപകൻ. ജന്മദിനാശംസകൾ രൺബീർ, എആര്കെഎസ്സിന്റെ ജനനം ഇതിനെ കൂടുതൽ സവിശേഷമാക്കുമെന്ന് പ്രതീക്ഷിക്കുന്നു. നിന്റെ യാത്ര തുടക്കം കുറിക്കുന്നത് കാണാൻ കാത്തിരിക്കാനാവില്ല. എന്റെ അനുഗ്രഹങ്ങളും സ്നേഹവും...’’ എന്ന് കുറിച്ച് ഹാര്ട്ട് ഇമോജിയും നല്കിയാണ് നീതു കപൂറിന്റെ ആശംസ.
