സിക്ക് ലീവെടുക്കാന് വ്യാജ മെഡിക്കല് സര്ട്ടിഫിക്കറ്റ് ചമച്ച യുവതിയ്ക്ക് കോടതി മൂന്ന് ലക്ഷത്തോളം രൂപ പിഴ വിധിച്ചു. സിംഗപ്പൂരിലാണ് സംഭവം നടന്നത്. സോഫ്റ്റ് വെയര് ഡെവലപ്റായ സു കിന് ആണ് ഒമ്പത് ദിവസം സിക്ക് ലീവെടുക്കാന് വ്യാജ മെഡിക്കല് സര്ട്ടിഫിക്കറ്റ് നിര്മ്മിച്ചെടുത്തത്. ചൈനീസ് പൗരത്വമുള്ളയാളാണ് സു കിന്. ഇടിസി സിംഗപ്പൂര് എസ്ഇസി ലിമിറ്റഡിലാണ്(ETC Singapore SEC Limited ) ഇവര് ജോലി ചെയ്തുവരുന്നത്.
അമ്മയ്ക്കും തനിക്കും സുഖമില്ലെന്ന് പറഞ്ഞാണ് സു കിന് സിക്ക് ലീവിന് അപേക്ഷിച്ചത്. തുടര്ന്ന് ഫോട്ടോഷോപ്പിലെ സഹായത്തോടെ പഴയൊരു മെഡിക്കല് സര്ട്ടിഫിക്കറ്റില് മാറ്റം വരുത്തി സു കിന് പുതുതായി ഒരു മെഡിക്കല് സര്ട്ടിഫിക്കറ്റ് ചമച്ചു. സെന്റ് ലൂക്ക് ഹോസ്പിറ്റലിന്റെ പേരിലുള്ള സര്ട്ടിഫിക്കറ്റില് താന് ലീവെടുത്ത തീയതികള് കൂടി കൂട്ടിച്ചേര്ത്തു. 2024 മാര്ച്ച് 23 മുതല് ഏപ്രില് 3 വരെ താന് ആശുപത്രിയില് ചികിത്സയിലായിരുന്നുവെന്ന് തെളിയിക്കുന്ന വ്യാജ സര്ട്ടിഫിക്കറ്റാണ് സു കിന് തയ്യാറാക്കിയത്. കൂടാതെ സര്ട്ടിഫിക്കറ്റിലെ ക്യൂആര് കോഡിലും സു കിന് മാറ്റങ്ങള് വരുത്തിയിരുന്നു. എന്നാല് 2024 ഏപ്രില് 4ന് സു കിന് കമ്പനിയില് നിന്ന് രാജിവെച്ചു. പിന്നീട് കമ്പനി അധികൃതര് നടത്തിയ വിശദമായ പരിശോധനയിലാണ് സു കിന് സമര്പ്പിച്ച സര്ട്ടിഫിക്കറ്റ് വ്യാജമാണെന്ന് അറിഞ്ഞത്. സര്ട്ടിഫിക്കറ്റിലെ ക്യൂആര് കോഡില് മാറ്റങ്ങള് വരുത്തിയത് കമ്പനി അധികൃതരുടെ ശ്രദ്ധയില്പ്പെടുകയായിരുന്നു.
ഇതിനെ തുടര്ന്ന് യഥാര്ത്ഥ മെഡിക്കല് സര്ട്ടിഫിക്കറ്റ് ഹാജരാക്കണമെന്ന് കമ്പനി സു കിനിനോട് ആവശ്യപ്പെട്ടു. ഉടനെ ഇവര് വ്യത്യസ്തമായ ക്യൂആര് കോഡ് അടങ്ങിയ മറ്റൊരു വ്യാജ മെഡിക്കല് സര്ട്ടിഫിക്കറ്റ് ഏപ്രില് എട്ടിന് ഹാജരാക്കി. എന്നാല് ഇതും വ്യാജമാണെന്ന് കമ്പനി അധികൃതര് തിരിച്ചറിഞ്ഞു. തുടര്ന്ന് ഇവര്ക്കെതിരെ കമ്പനി പോലീസില് പരാതി നല്കി. അസുഖബാധിതയായ അമ്മയെ നോക്കാനായി ചൈനയില് തന്നെ നില്ക്കാന് ഇവര് അമ്മയുടെ മരണസര്ട്ടിഫിക്കറ്റ് വരെ വ്യാജമായി നിര്മിച്ചുവെന്നും പിന്നീട് നടത്തിയ അന്വേഷണത്തില് വ്യക്തമായി. വ്യാജരേഖ ചമച്ച കേസില് സു കിനിന് കോടതി 5000 ഡോളര് (3.2 ലക്ഷം രൂപ) പിഴ വിധിക്കുകയും ചെയ്തു.
