ജപ്പാനിലെ മൃഗശാലയില് മൃഗങ്ങളുടെ ഭക്ഷണം മോഷ്ടിച്ച് സ്വന്തം ആവശ്യത്തിന് എടുക്കുകയും വില്പന നടത്തുകയും ചെയ്ത ജീവനക്കാരന് പിടിയില്. പടിഞ്ഞാറന് ജപ്പാനിലെ ഒസാക്ക പ്രിഫെക്ചറിലെ ടെനോജി മൃഗശാലയിലെ ജീവനക്കാരനാണ് പിടിയിലായത്. മൃഗങ്ങളുടെ ഭക്ഷണബാങ്കില് നിന്ന് പഴങ്ങളും പച്ചക്കറികളും തുടര്ച്ചയായി കാണാതായതോടെ നടത്തിയ അന്വേഷണത്തിലാണ് മോഷണത്തിന് പിന്നില് മൃഗശാലയിലെ ജീവനക്കാരന് തന്നെയാണെന്ന് കണ്ടെത്തിയത്.സ്ഥാപനത്തിലെ അനിമല് കെയര് ആന്ഡ് ബ്രീഡിംഗ് ഷോകേസ് ഡിപ്പാര്ട്ട്മെന്റില് ജോലി ചെയ്തിരുന്ന 47 -കാരനായ മൃഗശാലാ സൂക്ഷിപ്പുകാരനാണ് മോഷണം നടത്തിയത് എന്നാണ് പോലീസ് ഒടുവില് കണ്ടെത്തിയത്.
ഇയാളുടെ പരിചരണത്തിന് കീഴില് ഉണ്ടായിരുന്ന കുരങ്ങുകളുടെയും ചിമ്പാന്സികളുടെയും ഭക്ഷണമാണ് ഇയാള് മോഷ്ടിച്ച് വില്പന നടത്തിയത്. മൃഗശാലാ സൂക്ഷിപ്പുകാരന് ചെയ്ത കാര്യമോര്ക്കുമ്പോള് തനിക്ക് വലിയ നിരാശയുണ്ടന്ന് മൃഗശാലയുടെ വൈസ് ഡയറക്ടര് കിയോഷി യാസുഫുകു പറഞ്ഞു. ആളുകളുടെ വിശ്വാസം നഷ്ടപ്പെടുത്തിയതിന് താന് ക്ഷമ ചോദിക്കുന്നതായും കേസ് കര്ശനമായി കൈകാര്യം ചെയ്യുമെന്നും ഇത്തരം പ്രവൃത്തികള് മേലില് ആവര്ത്തിക്കാതിരിക്കുന്നതിനുള്ള നടപടികള് സ്വീകരിക്കുമെന്നും അദ്ദേഹം പറഞ്ഞു.
ഒസാക്കയുടെ ഹൃദയഭാഗത്ത് സ്ഥിതിചെയ്യുന്ന ടെനോജി മൃഗശാലയില് 170 ഓളം ഇനങ്ങളിലായി ആയിരം മൃഗങ്ങള് ഉണ്ട്. മൃഗശാല ജീവനക്കാരന്റെ പ്രവൃത്തിയില് സോഷ്യല് മീഡിയയില് സമ്മിശ്ര പ്രതികരണങ്ങളാണ് ഉണ്ടായത്. ഒരു വിഭാഗം ആളുകള് ജീവനക്കാരനെ വിമര്ശിച്ചപ്പോള് മറ്റൊരു വിഭാഗം ജീവനക്കാരനോട് സഹതാപം പ്രകടിപ്പിച്ചു. മൃഗശാല അതിന്റെ ജീവനക്കാര്ക്ക് ന്യായമായ വേതനം നല്കാത്തത് കൊണ്ടാണ് ആളുകള് ഇത്തരം പ്രവൃത്തികള് ചെയ്യേണ്ടി വരുന്നതെന്നും നിരവധിപ്പേര് അഭിപ്രായപ്പെട്ടു.
