തിരുവനന്തപുരം: മുണ്ടക്കൈ-ചൂരല്മല ഉരുള്പൊട്ടല് ദുരന്തമുഖത്ത് ഇന്ത്യന് പ്രധാനമന്ത്രി വന്നത് എന്തിനാണെന്ന് ജനങ്ങള് ചോദിക്കുന്നെന്ന് ടി. സിദ്ദിഖ് എംഎല്എ. വയനാട് പുനരധിവാസത്തിലെ അടിയന്തര പ്രമേയ ചര്ച്ചയില് നിയമസഭയില് സംസാരിക്കുക ആയിരുന്നു അദ്ദേഹം.
പ്രധാനമന്ത്രിവന്നത് ഫോട്ടോ ഷൂട്ടിനാണോയെന്നാണ് ജനങ്ങള് ചോദിക്കുന്നെന്നും സംഭവത്തില് കേന്ദ്രം സഹായിക്കുന്നില്ല എന്നത് ഏറെ ദു:ഖകരമായ കാര്യമാണെന്നും ദുരന്തത്തില് പെട്ടവരുടെ കടങ്ങള് എഴുതി തള്ളണമെന്നും അദ്ദേഹം പറഞ്ഞു.
വയനാട് ദുരന്തത്തില് സ്വീകരിച്ച നടപടികള്ക്ക് നന്ദി പറഞ്ഞ എംഎല്എ എല്ലാവരും കൂട്ടായി നിന്ന് ദുരന്തനിവാരണ പ്രവര്ത്തനങ്ങള് നടത്തിയെന്നും വ്യക്തമാക്കി. അതേസമയം തന്നെ പുനരധിവാസത്തിലെ മെല്ലെപ്പോക്കിനെക്കുറിച്ചും പറഞ്ഞു.
കേവലം കോണ്ക്രീറ്റ് ഭവനം പുനരധിവാസമല്ലെന്നും മഴയെ അളക്കാനുള്ള ക്രമീകരണങ്ങള് ഇല്ലാത്തത് ദുരന്തത്തിന് കാരണമായെന്നും പറഞ്ഞു. 200 മില്ലിലിറ്റര് മഴ പെയ്താല് ദുരന്തത്തിന് സാധ്യതയുണ്ട്. എന്നാല് കാലാവസ്ഥ വ്യതിയാനം മുന്കൂട്ടി കാണാന് കഴിയില്ല.
മുന്നറിയിപ്പ് നല്കുന്നതില് വീഴ്ചയുണ്ടായി. ഉരുള്പൊട്ടിയതിനുശേഷമാണ് റെഡ് അലേര്ട്ട് പ്രഖ്യാപിച്ചതെന്നും അദ്ദേഹം ആരോപിച്ചു. പുന രധിവാസത്തിന് ഉടന് സ്ഥലം ഏറ്റെടുക്കണം. സര്ക്കാര് അടിയന്തരമായി ഇടപെടണം. പുനരധിവാസത്തില് തുടക്കത്തില് നമുക്ക് ആവേശം ഉണ്ടാകും. പിന്നീട് മന്ദഗതിയിലാവും. ഒടുവില് വിസ്മൃതിയിലാവുമെന്നും അദ്ദേഹം ഓര്മ്മിപ്പിച്ചു.
