കെ.ജി.എഫ് എന്ന ഒറ്റ സിനിമ മാത്രം മതി യഷ് എന്ന താരത്തെ പ്രേക്ഷകര് ഇഷ്ടപ്പെടാനും ആരാധിക്കാനും. ഇന്ത്യന് സിനിമയിലെ തന്നെ ഏറ്റവും വലിയ വിജയമായിരുന്നു കെ.ജി.എഫിന്റെ രണ്ടു ഭാഗങ്ങളും. പാന് ഇന്ത്യന് കന്നഡ ഫ്രാഞ്ചൈസി കെജിഎഫ് ഭാഷാപരമായ അതിര്വരമ്പുകള് താണ്ടി കന്നഡ സിനിമയെ പ്രേക്ഷകര്ക്ക് പരിചയപ്പെടുത്തിക്കൊടുത്തു. പക്ഷേ കെജിഎഫ് 2 ന് ശേഷം യഷ് നായകനായ ഒരു ചിത്രം ഇതുവരെ തിയറ്ററുകളില് എത്തിയിട്ടില്ല.
എന്നാല് കുറച്ചു നാളുകള്ക്ക് മുമ്പ് പാന് ഇന്ത്യന് പ്രേക്ഷകരെ ആവേശത്തിലാഴ്ത്തി യഷിന്റെ പുതിയൊരു സിനിമ എത്തുന്നു എന്ന വാര്ത്ത വന്നു. ഗീതു മോഹന്ദാസ് സംവിധാനം ചെയ്യുന്ന ടോക്സിക് എന്ന ചിത്രത്തില് അഭിനയിച്ചുകൊണ്ടിരിക്കുകയാണ് യഷ് ഇപ്പോള്. ചലച്ചിത്ര മേളകളിലും അവാര്ഡ് പ്രഖ്യാപനങ്ങളിലുമൊക്കെ നിറഞ്ഞുനിന്ന ലയേഴ്സ് ഡൈസും മൂത്തോനും ഒരുക്കിയ ഗീതു എന്ന സംവിധായികയ്ക്കൊപ്പം യഷ് എത്തുന്നു എന്നതിന്റെ ആവേശം ഓരോ പ്രേക്ഷകര്ക്കുമുണ്ട്. പക്ഷേ അടുത്തിടെ യഷ് ഉപേക്ഷിച്ചുവെന്നുവരെ അടുത്തിടെ സോഷ്യല് മീഡിയയില് പ്രചരണം വന്നു. അതിനെ പുറന്തള്ളി ഭംഗമൊന്നും വരാതെ ഇപ്പോഴും പുരോഗമിക്കുകയാണ് ടോക്സിക്കിന്റെ ചിത്രീകരണം.
ഇപ്പോഴിതാ കെജിഎഫിന് ശേഷം ഗീതു മോഹന്ദാസ് ചിത്രത്തില് നായകനാവുന്നതിനെക്കുറിച്ച് യഷ് തന്നെ പറയുകയാണ്. ഗീതു മോഹന്ദാസ്, യഷ് അങ്ങനെ രണ്ട് വ്യത്യസ്ത ലോകങ്ങള് എങ്ങനെ ഒരുമിച്ചു എന്ന ചോദ്യത്തിനാണ് യഷ് പ്രതികരിച്ചത്.
‘‘അത് വളരെ ലളിതമാണെന്നാണ് എനിക്ക് തോന്നുന്നത്. അവരുടെ പാഷനാണ് ഞാന് നോക്കിയത്. ഏത് തരത്തിലുള്ള പ്രോജക്റ്റ് ആണ് അവര് കൊണ്ടുവന്നിരിക്കുന്നത് എന്നതും. ഗീതു മുന്പ് സംവിധാനം ചെയ്ത ചിത്രങ്ങള് അടുത്തകാലം വരെ ഞാന് കണ്ടിരുന്നില്ല. കൃത്യമായ കാഴ്ചപ്പാടും പാഷനുമായി എത്തിയ വ്യക്തിയായിരുന്നു ഗീതു. അവര് ഈ പ്രോജക്റ്റിനുവേണ്ടി ഏറെ സമയം മുടക്കിയിരുന്നതും എന്നില് ബഹുമാനമുണ്ടാക്കി. എന്താണ് ചെയ്യേണ്ടത് എന്നതിനെക്കുറിച്ചും അവര്ക്ക് കൃത്യമായ ധാരണയുണ്ടായിരുന്നു. അത് മാത്രമേ ഞാന് നോക്കിയുള്ളൂ. പിന്നെ രണ്ട് വ്യത്യസ്തങ്ങളായ ലോകങ്ങള് ഒത്തുചേരുക എന്നത് ഗംഭീരമല്ലേ. സിനിമയില് കഥ പറയുന്ന കാര്യത്തില് വ്യത്യാസമൊന്നുമില്ല.
ഒരു കഥ പറയാനുണ്ടെങ്കില് അത് ഗംഭീരമായി പറയുക എന്നതേയുള്ളൂ. ആ കഥ എല്ലാ പ്രേക്ഷകര്ക്കും ആകര്ഷകമായി തോന്നുമ്പോഴാണ് അതൊരു വാണിജ്യ വിജയം ആവുന്നത്. ഗീതു മുന്പ് ചെയ്തിരുന്നത് വ്യത്യസ്തമായ ചിത്രങ്ങളായിരിക്കാം. അതില് നിന്നൊക്കെ തികച്ചും വ്യത്യസ്തമായ ഒരു ചിത്രമാണ് ഇത്തവണ ഞങ്ങള് ചെയ്യുന്നത്...’’ യഷ് പറയുന്നു.
ഈ തെരഞ്ഞെടുപ്പിനെക്കുറിച്ച് ചുറ്റുമുള്ളവരോട് വിശദീകരിക്കാന് ബുദ്ധിമുട്ടിയോ എന്ന ചോദ്യത്തിനും യഷ് മറുപടി പറയുന്നുണ്ട്. ‘‘മറ്റുള്ളവര് പറയുന്നതല്ല, എന്റെ ഹൃദയം പറയുന്നതാണ് ഞാന് കേള്ക്കാറ്. ഒരു ചെറിയ ത്രെഡമായാണ് ഗീതു ആദ്യം വന്നത്. ചര്ച്ചകള്ക്കിപ്പുറം അത് വികസിച്ചത് മറ്റൊന്നായാണ്. ഞങ്ങളുടെ കാഴ്ചപ്പാടുകളാണ് ഒരുമിച്ച് ചേര്ന്നത്. മാസിന്റെ പള്സ് അറിയാവുന്ന സംവിധായികയാണ് ഗീതു. ഒരു മാസ് എന്റര്ടെയ്നര് ആശയവുമായാണ് ഗീതു കാണാനെത്തിയത്. അത്തരം ഒരു ചിത്രം തന്നെയായിരിക്കും ടോക്സിക്...’’ ടോക്സിക്കിനെക്കുറിച്ച് യഷ് പറയുന്നു. ദി ഹോളിവുഡ് റിപ്പോര്ട്ടര് ഇന്ത്യയ്ക്ക് നല്കിയ അഭിമുഖത്തിലാണ് യഷ് ഇത് പറഞ്ഞത്.
