ശക്തമായ കഥാപാത്രങ്ങളിലൂടെ മികച്ച പ്രകടനം കാഴ്ചവച്ച് പ്രേക്ഷകരെ അമ്പരപ്പിക്കുന്ന തെന്നിന്ത്യന് താരമാണ് അനുഷ്ക ഷെട്ടി. ബാഹുബലിയിലെ ദേവസേന എന്ന കഥാപാത്രം മാത്രം മതി അനുഷ്കയുടെ അഭിനയമികവ് മനസ്സിലാക്കാന്. ദേവസേനയ്ക്ക് ശേഷം വെള്ളിത്തിരയില് നീണ്ട ഒരു ഇടവേളയെടുത്തിരിക്കുകയായിരുന്നു സൂപ്പര്താരം.
ഇതിനിടെയാണ് താരം ആദ്യമായി മലയാളത്തിലെത്തുന്നു എന്ന വാര്ത്തകളും വന്നത്. ജയസൂര്യ കേന്ദ്ര കഥാപാത്രമായി എത്തുന്ന കത്തനാർ എന്ന ചിത്രത്തിലൂടെയാണ് അനുഷ്ക മലയാളത്തിൽ എത്തുന്നത്. പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ത്രീഡിയില് ഒരുങ്ങുന്ന കത്തനാരില് നിള എന്ന കഥാപാത്രമായിട്ടാണ് അനുഷ്ക എത്തുന്നത്.
ഇപ്പോഴിതാ താരത്തിന്റെ ജന്മദിനത്തില് സിനിമയിലെ ക്യാരക്ടര് വീഡിയോ അണിയറ പ്രവര്ത്തകര് പുറത്തുവിട്ടിരിക്കുകയാണ്. സെക്കന്റുകള് മാത്രമുള്ള വീഡിയോയില് നിള എന്ന കഥാപാത്രത്തിന്റെ പേരും അവതരിപ്പിക്കുന്നുണ്ട്. പല നിറങ്ങളിലുള്ള നൂലൂകള് ചേര്ന്നെത്തി കഥാപാത്രത്തിന്റെ രൂപം നെയ്തെടുക്കും പോലെയാണ് ഈ വീഡിയോ ഒരുക്കിയിരിക്കുന്നത്. നെയ്ത്തുകാരിയായാണ് അനുഷ്ക ചിത്രത്തില് എത്തുന്നതെന്നാണ് കാരക്ടർ വീഡിയോ നല്കുന്ന സൂചന. അനുഷ്ക വസ്ത്രം നെയ്യുന്നതാണ് വീഡിയോയിലുള്ളത്.
അനുഷ്കയും ക്യാരക്ടര് പോസ്റ്റര് പങ്കുവച്ചിട്ടുണ്ട്. ‘‘കത്തനാരിലേക്ക്... നിളയായി വരുന്നു...നിങ്ങളെപ്പോലെ ആവേശത്തിലാണ്...’’ എന്ന ക്യാപ്ഷനൊപ്പമാണ് അനുഷ്ക ഷെട്ടി പോസ്റ്റര് ഷെയര് ചെയ്തിരിക്കുന്നത്.
അനുഷ്ക ഷെട്ടിക്ക് പിറന്നാള് ആശംസകളും അണിറയപ്രവര്ത്തകര് നേര്ന്നിട്ടുണ്ട്. ‘‘കത്തനാർ ദ വൈല്ഡ് സോർസറർ എന്ന ചിത്രത്തിലെ ആകർഷകമായ കഥാപാത്രത്തിലൂടെ, മലയാള സിനിമയിലേക്ക് ഗംഭീര ചുവടുവയ്പ്പിന് ഒരുങ്ങുകയാണ് അനുഷ്ക ഷെട്ടി...’’ എന്നാണ് കാരക്ടർ വീഡിയോ പങ്കുവച്ചുകൊണ്ട് അണിയറ പ്രവർത്തകർ കുറിച്ചത്. സെക്കന്റുകള് മാത്രം ദൈർഘ്യമുള്ള വീഡിയോ സോഷ്യല് മീഡിയയില് തരംഗമാവുകയാണ്.
തോമസ് സംവിധാനം ചെയ്ത് ജയസൂര്യ പ്രധാന വേഷത്തിലെത്തുന്ന ചിത്രം കടമറ്റത്ത് കത്തനാരുടെ കഥയാണ് പ്രേക്ഷകർക്ക് മുന്നിലെത്തിക്കുന്നത്. രണ്ട് ഭാഗങ്ങളിലായി ഒരുങ്ങുന്ന ചിത്രത്തിന്റെ ആദ്യ ഭാഗമാണ് റിലീസിന് ഒരുങ്ങുന്നത്. ചിത്രത്തിന്റെ പോസ്റ്റ് പ്രൊഡക്ഷൻ വര്ക്കുകള് നടക്കുകയാണ്.
