സോഷ്യല് മീഡിയ തരംഗമായി മാറിയതോടെ കലാസാംസ്കാരികസാമൂഹിക മേഖലയിലുള്ളവരുടെ മാത്രമല്ല രാഷ്ട്രീയ മേഖലയിലുള്ളവരുടെ വാര്ത്തകള് പോലും സെക്കന്റുകള്ക്കുള്ളില് ട്രോളുകളിലും മീമുകളുമായി മാറാറുണ്ട്. ഇലക്ഷന് തീരുമാനിച്ചതോടെ പല രാഷ്ട്രീയ നേതാക്കന്മാരുടെയും പ്രവൃത്തികളും വാക്കുകളുമൊക്കെയും സോഷ്യല് മീഡിയ ട്രോളുകളില് ഇടം പിടിക്കുന്നുണ്ട്. കഴിഞ്ഞ ദിവസം യുഡിഎഫ് സ്ഥാനാർത്ഥി രാഹുല് മാങ്കൂട്ടത്തിന്റെ നേതൃത്വത്തില് പാലക്കാടുള്ള ഹോട്ടലില് ട്രോളി ബാഗില് കള്ളപ്പണം എത്തിച്ചെന്ന ആരോപണം വലിയ ചർച്ചകള്ക്ക് വഴിവയ്ക്കുന്നുണ്ട്. സംഭവത്തിന് പിന്നാലെ, കോണ്ഗ്രസിനും രാഹുല് മാങ്കൂട്ടത്തിലിനുമെതിരെ വൻ ട്രോളുകളാണ് ഉയരുന്നത്.
ഇപ്പോഴിതാ നടൻ ഗിന്നസ് പക്രു ഫേസ്ബുക്കില് പങ്കുവച്ച ഒരു പോസ്റ്റും അതിന് രാഹുല് മാങ്കൂട്ടത്തില് കൊടുത്ത മറുപടിയുമാണ് വൈറലാവുന്നത്. സ്യൂട്ട് കേസ് പിടിച്ചുകൊണ്ട് നില്ക്കുന്ന ഒരു ഫോട്ടോ ആണ് ഗിന്നസ് പക്രു ഫേസ്ബുക്കില് പങ്കുവച്ചത്. ‘‘നൈസ് ഡേ...’’ എന്ന് അതിന് പക്രു അതിന് ക്യാപ്ഷനും നല്കിയിട്ടുണ്ട്.
ഇതിനു താഴെ കമന്റ് ബോക്സില് ‘കെപിഎമ്മില് അല്ലല്ലോ...’ എന്നാണ് രാഹുല് മാങ്കൂട്ടത്തിലിന്റെ കമന്റുമുണ്ട്. അതോടെ പക്രുവിന്റെ പോസ്റ്റിന് താഴെ നിരവധി പേരാണ് രാഹുല് മാങ്കൂട്ടത്തിലിനെ ട്രോളിക്കൊണ്ട് കമന്റ് ചെയ്തിരിക്കുന്നത്. ‘കെപിഎമ്മില് ആണെങ്കില് തന്നെ ആ 12-ാമത്തെ മുറിയില് താമസിക്കരുത്, ട്രോളി ഡേ, ആശാനേ ആശാനും, ഭാഗ്യം നീല അല്ല, ട്രോളി ബാഗ്, ദൈവമേ പക്രു ചേട്ടനും...’ തുടങ്ങി നിരവധി കമന്റുകളാണ് പോസ്റ്റിനു താഴെ വരുന്നത്.
ട്രോളി ബാഗില് കള്ളപ്പണം എത്തിച്ചെന്ന ആരോപണത്തില് പോലീസ് ഇതുവരെയും കേസെടുത്തിട്ടില്ല. ട്രോളി ബാഗില് കള്ളപ്പണമല്ലെന്നും അങ്ങനെയെങ്കില് ഇത്ര ലാഘവത്തോടെ ഹോട്ടലിലൂടെ കൊണ്ടു പോവില്ലെന്നുമുള്ള വിലയിരുത്തലിലാണ് പോലീസ്. നീല ട്രോളി ബാഗില് കള്ളപ്പണം കൊണ്ടുവന്നുവെന്ന വിവരത്തിന്റെ അടിസ്ഥാനത്തില് വനിതാ നേതാക്കളായ ബിന്ദു കൃഷ്ണയും ഷാനിമോള് ഉസ്മാനും താമസിച്ചിരുന്ന ഹോട്ടല് മുറിയിലാണ് അർദ്ധരാത്രിയില് റെയ്ഡ് നടന്നത്.
