തിരുവനന്തപുരം: ജീവിതയാഥാര്ഥ്യങ്ങളോടു നന്നേ ചെറുപ്പത്തില്ത്തന്നെ പോരാടേണ്ടി വന്നപ്പോള് ക്ലാസ്മുറികള് അന്യമായത് ഇന്ദ്രന്സിനെ എന്നും വേട്ടയാടിയിരുന്നു. കുടുംബം പോറ്റാന് തയ്യല്പ്പണിയിലേക്കും അവിടെനിന്ന് വസ്ത്രാലങ്കാരത്തിലുടെ സിനിമയുടെ മായലോകത്തേക്കും പിച്ചവച്ചപ്പോള് പഠിക്കാനുള്ള മോഹം അകലെത്തന്നെ തുടര്ന്നു. അഭിനയലോകത്തു വേറിട്ട പാതയില് സഞ്ചരിച്ച് പിന്നീട് ദേശീയ അവാര്ഡ് വരെ സ്വന്തമാക്കിയെങ്കിലും ആ മോഹം മനസില് വേദനയായി കിടന്നു.
എന്നാല് വര്ഷങ്ങള്ക്കിപ്പുറം ഇന്ദ്രന്സ് ഇപ്പോള് ഹാപ്പി ആയിരിക്കുകയാണ്. സാക്ഷരതാ മിഷന് നടത്തുന്ന ഏഴാം ക്ലാസ് തുല്യതാപരീക്ഷ വിജയിച്ചാണ് അദ്ദേഹം ആഗ്രഹസാഫല്യം ഭാഗികമായി പൂര്ത്തിയാക്കിയത്. ഏഴു കടന്ന നടന് ആവേശം ഒട്ടും ചോരാതെ പത്തിന്റെ കടമ്പ കടക്കാനുള്ള ഒരുക്കത്തിലാണിപ്പോള്. തിരുവനന്തപുരം അട്ടക്കുളങ്ങര സെന്ട്രല് സ്കൂളിലാണ് അറുപത്തിയെട്ടാം വയസില് ഇന്ദ്രന്സ് പരീക്ഷ എഴുതിയത്. വിജയവിവരം മന്ത്രി വി. ശിവന്കുട്ടി തന്നെയാണ് അദ്ദേഹത്തെ വിളിച്ചറിയിച്ചത്.
നവകേരള സദസിന്റെ ചടങ്ങില് പങ്കെടുക്കവേയാണ് തുടര്പഠനത്തിന് ഇന്ദ്രന്സ് താത്പര്യം അറിയിച്ചത്. തുടര്ന്ന് പത്താം ക്ലാസിലേക്കുള്ള അപേക്ഷ കൈമാറിയെങ്കിലും ഏഴാം ക്ലാസ് ജയിച്ചാലേ പത്തില് പഠിക്കാനാവൂ എന്നതാണ് സാക്ഷരതാമിഷന്റെ ചട്ടം. ഇതനുസരിച്ചാണ് താരം ഏഴാംക്ലാസ് പരീക്ഷ എഴുതിയത്. ചെറുപ്പത്തില് നാലാം ക്ലാസ് വരെയേ പഠിച്ചിട്ടുള്ളൂവെന്നാണ് ഓര്മയെന്ന് അദ്ദേഹം പറഞ്ഞിരുന്നു. എന്നാല് ഏഴുവരെ പോയിട്ടുള്ളതായി സഹപാഠികള് സാക്ഷ്യപ്പെടുത്തുന്നുണ്ടെന്നാണ് സാക്ഷരതാമിഷനു ലഭിച്ച വിവരം. തിരുവനന്തപുരം കുമാരപുരം സ്കൂളിലായിരുന്നു അദ്ദേഹത്തിന്റെ പ്രാഥമിക വിദ്യാഭ്യാസം.
സ്കൂളില് പോകാന് പുസ്തകവും വസ്ര്തവുമില്ല എന്ന അവസ്ഥയിലാണ് താന് വിദ്യാഭ്യാസം നിര്ത്തിയതെന്ന് ഇന്ദ്രന്സ് വെളിപ്പെടുത്തിയിട്ടുണ്ട്. വായനാശീലം വിടാത്തതിനാല് കുറേ കാര്യങ്ങള് മനസിലാക്കാന് സാധിച്ചെന്നും ജീവിതത്തില് അത് വലിയ മാറ്റങ്ങളുണ്ടാക്കിയെന്നും അദ്ദേഹം പറയാറുമുണ്ട്. ആളൊരുക്കം എന്ന ചിത്രത്തിലെ പ്രകടനത്തിന് മികച്ച നടനുള്ള കേരള സംസ്ഥാന അവാര്ഡ് അദ്ദേഹത്തിനു ലഭിച്ചു.
വെയില്മരങ്ങള് എന്ന ചിത്രത്തിലെ അഭിനയം സിംഗപ്പൂര് സൗത്ത് ഏഷ്യന് ഇന്റര്നാഷണല് ഫിലിം ഫെസ്റ്റിവലില് മികച്ച നടനുള്ള പുരസ്കാരത്തിന് ഇന്ദ്രന്സിനെ അര്ഹനാക്കി. ഹോം എന്ന സിനിമയിലൂടെ ദേശീയ അവാര്ഡ് കമ്മിറ്റിയുടെ പ്രത്യേക പരാമര്ശവും അദ്ദേഹത്തിനു ലഭിച്ചിരുന്നു. ഇന്ദ്രന്സിനും ഒപ്പം വിജയിച്ച 1483 പേര്ക്കും മന്ത്രി വി. ശിവന്കുട്ടി സമൂഹ മാധ്യമത്തിലൂടെ അഭിനന്ദനങ്ങള് നേര്ന്നു.
