ഒരു ദിവസം നിങ്ങള് എത്ര സിഗററ്റ് വലിക്കാറുണ്ട്? എത്രയായാലും ദിവസം 40 സിഗററ്റ് വലിക്കാറുണ്ടോ? ഏതാണ്ട് സമാന അവസ്ഥയാണ് ഡല്ഹിയിലെ അന്തരീക്ഷ മലിനീകാരണമെന്ന് വിദഗ്ദ്ധര്. സ്കോട്ടിഷ് ചരിത്രകാരനായ വില്യം ഡാല്റിംപിളാണ് ഡല്ഹിയിലെ കടുത്ത അന്തരീക്ഷ മലിനീകരണത്തില് ഞെട്ടല് പ്രകടിപ്പിച്ചിരിക്കുന്നത്. ദേശീയ തലസ്ഥാനത്തെ വായു ശ്വസിക്കുന്നതിനെ അദ്ദേഹം ഒരു ദിവസം 40 സിഗരറ്റ് വലിക്കുന്നതിനോട് താരതമ്യപ്പെടുത്തി. ഇക്കാര്യത്തില് ബോധവല്ക്കരണത്തിനായി ഒരു ഇന്ഫോഗ്രാഫിക്കും എക്സില് പങ്കിട്ടു.
പോസ്റ്റില് അദ്ദേഹം ഇങ്ങനെ എഴുതി, '' ഉച്ചയ്ക്ക് 2 മണിക്ക് പോലും റണ്വേക്ക് കുറുകെ 100 മീറ്റര് കാണാന് കഴിയില്ല. ഡല്ഹിയില് മലിനീകരണത്തിന്റെ ആവരണത്തില് പൊതിഞ്ഞ ശ്മശാനത്തില് നഗരം എംബാം ചെയ്തിരിക്കുകയാണ്. നാല്പത് വര്ഷത്തെ ഇവിടുത്തെ ജീവിതത്തിനിടയില് ഇതുപോലൊന്ന് കണ്ടിട്ടില്ല. ഡിജിന്സ് നഗരത്തിന് എന്തൊരു വിധിയാണ് ഇപ്പോഴും. ഏറ്റവും മികച്ച നഗരങ്ങളില് ഏറ്റവും ആകര്ഷകമാണ്. എന്നാല് നിലവില് അതൊരു ദാരുണമായ, ശ്വാസം മുട്ടിക്കുന്ന മരണക്കെണിയാണ്.''
ഡല്ഹിയിലെ വായു ശ്വസിക്കുന്നത് ഒരു ദിവസം 40 സിഗരറ്റ് വലിക്കുന്നതുപോലെയാണെന്ന് ഇന്ഫോഗ്രാഫിക് ചിത്രീകരിച്ചു. അതേസമയം ഉത്തരേന്ത്യയില് ഉടനീളമുള്ള പുകവലി ശരാശരി എട്ട് സിഗരറ്റുകളാണ്. പോസ്റ്റ് ഇതുവരെ മൂന്ന് ലക്ഷത്തിലധികം കാഴ്ചകളാണ് നേടിയിരിക്കുന്നത്. ഡല്ഹിയിലെയും നോയിഡ, ഗാസിയാബാദ്, ഗുരുഗ്രാം എന്നിവയുള്പ്പെടെയുള്ള സമീപ പ്രദേശങ്ങളിലെയും വായുവിന്റെ ഗുണനിലവാരം ചൊവ്വാഴ്ച അപകടകരമായ നിലയിലെത്തി നില്ക്കുകയാണ്. നഗരത്തിലെ വായു മലിനീകരണതോത് പരിശോധിക്കുന്ന മിക്ക എയര് ക്വാളിറ്റി മോണിറ്ററിംഗ് സ്റ്റേഷനുകളിലും രേഖപ്പെടുത്തിയിരിക്കുന്ന റീഡിംഗ് 500 ആണ്. ഇത് വളരെ ഗുരുതരമായ അവസ്ഥയെ സൂചിപ്പിക്കുന്നു.
ദേശീയ തലസ്ഥാന മേഖലയെ മൂടിയിരിക്കുന്ന കനത്ത പുകമഞ്ഞ് തുടര്ച്ചയായി ഏഴാം ദിവസത്തിലേക്ക് കടന്നിരിക്കുകയാണ്. ഇത് ഗുരുതരമായ ആരോഗ്യ പ്രശ്നങ്ങള് ഉയര്ത്തി. വായുവിന്റെ ഗുണനിലവാരം മോശമായതിനെ തുടര്ന്ന്, പ്രതിസന്ധി പരിഹരിക്കുന്നതിനായി വര്ക്ക് ഫ്രം ഹോം നടപടികളും ഒറ്റ-ഇരട്ട വാഹന പദ്ധതിയും നടപ്പാക്കുന്നതിനെക്കുറിച്ച് അധികൃതര് ഉടന് തീരുമാനിക്കുമെന്ന് ഡല്ഹി പരിസ്ഥിതി മന്ത്രി ഗോപാല് റായ് ചൊവ്വാഴ്ച പ്രഖ്യാപിച്ചു. വിദ്യാഭ്യാസമേഖലയും ഓണ്ലൈന് ക്ലാസ്സുകളിലേക്ക് മാറിയിരിക്കുകയാണ്.
